MARK 12

Ngangli Billa Lampaar Saavaa Pandam

(Met 21:33–46; Luk 20:9–19)

1 # Met 21:33–46; Luk 20:9–19 Che amah in pandam veia ankuunga trong amthronpei, “Kupakhat in nganglibil atloh, che mahchuta inhiilla pal amkhah, mahche ngangli atuii asornatu khur khatkho achoh, che stlaankhat athah, che mahchuta lampaar amsaalpei, cheva atakva khuuboom aktleia sehsa. 2Laichu aphah inva, amah in lampaar aksaa ankuungnata akrah ste aphahnatu amah roijuihta amthlah ei; 3che anmah in ansuurche ankhonpei, che anmahta aruuk a amilengpei. 4Veikhatla amah in ankuunga aktlei roijuih amthlahla, che anmah in akanga amiratche aminuihpei. 5Che amah in aktleita amthlahlaei, che anmah in anthatpei, arouta ankhon che arouta anthatpei. 6Amah in arilvol asa kupakhat asihmang; achena a amah in ankuunga amthlah, ‘Anmah in kisa kupata injah tuei ta amdon.’ 7Chuta lampaar aksaa in khatleh khat insonsei, ‘Mah i pipasa; thlengve, amahta thatreio, che amah in achang khaankha inih ita veitu.’ 8Che amahta ansuurche anthatpei, che nganglibil apaalla anlonpei. 9Mahchu nganglibil Akpu in kha atloh tueime? Amah in thlengtu che lampaar aksaaeita ammaang tuei, mahche ngangli bilkha aktleikuunga amlantu. 10#Noon 4:11; 1 Pit 2:7Nannih in mah ringjih i paanohchoume; ‘Inntloh mii in andahtal lungta akiinga kukchopii louveisa. 11Mahchu Akpu in atloh, che mahchu nanmit in salungkhou same?’ ”

12 # Mak 11:18 Che amahta ansuurnatu insuulsei, chuta miitamta trihsei, alamva anmahta indah a pandam amlankha anrompei; chunna amahta mathlah a sehsei.

Roithaang Malan relna Anrui

(Met 22:15–22; Luk 20:20–26)

13 # Met 22:15–22; Mak 3:6; Luk 11:54; 20:20–26 Che amah atronga ansuurnatu anmah in Pharisi ste leh Horodia mii steta akuunga amithlahpei. 14Che anmah in anthlengche akuunga anson, “Lulok, kannih in nangi chimche ta kanrom, mahche nangin tukhatkho thousanohche; alamva miivaa inkaang phomkho injahnoh luungche, chuta Ringpu lam akchimta namtheihning. Keisaar kuunga roi malanni trongsuura tlohphume nohle tlohphunohme?” 15Kannih in kamilan ume, chunohleh malannohtu ungme? Chuta anmah in akthra anveisinkha aromma, amah in ankuunga asonei, “Jarella keita chaang nan an angme? Baobeh apumkhat keithlenve, che keiin mahchu antang.” 16Che anmah in baobeh apumkhat anthlenpei. Che amah in ankuunga asonei, “Onna injih i tunangsoh intrimme che tumingme?” Anmah in akuunga anson, “Keisaar.” 17#Rom 13:7Jisu in ankuunga asonei, “Keisaar kuunga malanphukha Keisaar kuunga malanve, che Ringpu kuunga malanphukha Ringpu kuunga malanve.” Che anmah in akuunga salungkhousei.

Thinata Ring Rella Anrui

(Met 22:23–33; Luk 20:27–40)

18 # Met 22:23–33; Luk 20:27–38; Noon 23:8 Che thinata ring amnoh aktih Sadukis in amahkuunga thlengsei; che anmah in akuunga trong anrui, 19“Lulok, Moses in kannih turella amjihpei mah chuvah kupakhat in athiche akmeita mahle, chuta asa amnohle, amah unaoin akmeichu lou aja, che auh anao turella asa apokche koolkem aja. 20Unao kupa sirih ammei; matsahrem in akmei aneihpei, che amah in athi inva asa amnohsa; 21che innih tihpi in amahta alohpei, che thisa, asa amnohsa; che inthum tihpikho mahchusoh intrimma suuksa; 22Che sirih tihpi inkho asa amnohsa juktoolremva kumei khakho thisa. 23Thinata anring laiva mahchu tunang akmei vei ume? Alamva sirih in anmei amiveipei.”

24Jisu in ankuunga asonei, “Nannih in Ringpu atuuikho ringjihkho romnohchou, mairella nannih in inlaalnoh choume? 25Alamva anmah in thinata anring laiva, innpaal nohle changvaanga malanchu amnoh usa, chuta ringramna ringroi nangjim usei. 26Che akthinata ringi, Moses nirik ah nannih in paanohchoume, inbang kaarna tronghou kharella, khatloh a Ringpu in akuunga asonme, keivah Abraham vaa Ringpu ang? 27Amahvah akthivaa Ringpu noh, chuta akring turella; nannih in khalmo nanlaalpei.”

Kliin Trongthuun

(Met 22:34–40; Luk 10:25–28)

28 # Met 22:34–40; Luk 20:39–40; 10:25–28 Che ringjih lulok ankaarna khat in athlenglai anmah in khatleh khat trong inteleita atheihpei, amah in thratea amsangkhata amuh in, “Jaknang trongthuun in anaamte kaar a matsahremme?” ta akuunga arui. 29Jisu in amsang, “Matsahrem chuva, rugaive, Israel o; inihvaa Akpu Ringpu i Khalekning; 30che nangin niril apumte, niruungvaa nikli apumte, nimdon apumte, mahche niklii apumtein nang Akpu Ringpu ta rilvolro; 31#Rom 13:9; Kal 5:14; Jem 2:8innih tihpi in maisa, nangin nantongpita nitaktal nanga rilvolro, mah ichunga ralla trongthuun kliin aktlei amnohsa.” 32Che ringjih lulok in akuunga ason, “Nang chimsache, Lulok; nangin chimma nisonpei, mah chuvah amahvah khalekning, aktlei jakhatkho amnoh chuta amahning; 33#Met 9:13che amahta malung apumtein, anaamte bahaptla a akloutheih ril apumtein, mahche ikli apumtein amahta rilvol mahche intongpi miita khalek veia rilvolro, mah naamtein meia haalla inkat apumte chunga akralremsa.” 34Che amah in ksinga amsangpei ta Jisu in aromma, amahkuunga ason, “Nangin Ringpu vaa kurung huunna khannata inlahnoh sache.” Mahchu aknua tukhat inkho intrinoh luunga akuunga trongrui cheknohsei.

Misaiah Relna Anrui

(Met 22:41–46; Luk 20:41–44)

35 # Met 22:41–46; Luk 20:41–44 Che Jisu in mathruunna thlaamma amtheih suunga, amah in ason, “Khatloh a Khrista ta Devit vaa Asa kupa tih a ringjih lulok in asonme? 36#Noon 2:34–35; Hib 1:13Devit ataktal in, akseeng li a chuunga sonna amdangpei,

“ ‘Kei Akpu in Akpu ninga asonpei,

“ ‘kei kikchangtonga nanboksoot,

“ ‘nang nak andah eita nikehthuuia keiin kisihtu.’

37“Devit ataktal inkho amahta Akpu ta aong; chunna khatloh a amahta amah asa kupa vei ume?”

Trongsuur Lulok kuunga Jisu in Amthritei

(Met 23:1–36; Luk 20:45–47)

Che miitam in inlomma roomthoksoh inruuia amahta anrungeihpei. 38#Met 23:5–7; Luk 20:46–47; 11:43Che amah in matheih a a atih ei, “Ringjih lulok eita cheksilve, anmahta keithilla mii in injah a amithruunnatu lungluut insuul silh a seh andit 39che sinakok ah akthrarem inbokna phomma che injahna aja buhdoonna phomma inbok andit, 40anmah in trulmeinu an innta ansutche sootkhak a akngen veisinnei. Anmah in ralla klah kanang anphatu.”

Trulmeinu in Adoon Amlan

(Luk 21:1–4)

41 # Luk 21:1–4; Jon 8:20 Che amah in poot ankatna amaa a inboksa, mahche miitam in pootkatna a baobeh amilanta amah in jih a am. Doon akhaal ei in baobeh tam amilan. 42Che anran trulmeinu inkhat in thlengsa, amah in kuri baobeh apum innih amlan, mahchu pulla lupakhat. 43Che amah in aroita aongeiche ankuunga asonei, “Atak a, keiin nankuunga kisonchou, mah anran trulmeinuin poot akat i annaamte in ankatchunga amah in ralla akatpei. 44Alamva anmahva andoonpot suungnata ste louva ankatning chuta amahvah adoonpoot aringna apumteta amlanpei.”

Currently Selected:

MARK 12: TARAOBSI

Highlight

Copy