METHIU 26

Jisu Thatnatu Inruk a Amitel

(Mak 14:1–2; Luk 22:1–2; Jon 11:45–53)

1 # Met 7:28; 11:1; 13:53; 19:1 Jisu in mah naamte i asonche, aroi ankuungah asonei, 2#Mak 14:1–2; Luk 22:1–2; Jon 11:47–53“Nannih in nanrom mah chuvah nijannih aknua laalna buhdoon i thlengusa, che miivaa Asa kupata thingkharh ah mathlunatu amilantu.”

3Mahche Kaipha tih a an ong thiimpu aklok kurungkool a akthloi thiimpu miivaa anparuul in inboomsei, 4Che Jisu ta inruk a suura mathlunatu inboomma intelsei. 5Chuta anmah in anson, “Miikaara derderta asuuknoh natu buhdoon suunga tlohnohrei.”

Jisu ta Bethani ah Thao Apoih

(Mak 14:3–9; Jon 12:1–8)

6 # Mak 14:3–9; Jon 12:1–8; Luk 7:36–38 Ipek Jisu in Bethani a amlai reichi in amlom Simon inna, 7#Luk 7:37,38Jisu in buh asaaklai kumei khat in aman khalmo chaal amrimtui thaobeel khat thlenna akuungah thlengsa, mahchu akangchunga apoihpei. 8Chuta aroiin mahchuta anmuh in anmilung inhaanga anson, “Mah i jarelna ampaam peime? 9Alamva mah thao i aman khalmo tamma ajurhche, inranring kuungah malan ajata.” 10Mahchuta Jisu in aromma, ankuungah asonei, “Jarelna kumei ita namilahme? Alamva amah in akthra thlouta keikuungah atlohpei. 11Alamva nannihva anran anringsoh injomma amjouchou; chuta nannihva keisoh injomma amjounoh uchou. 12#Jon 19:40Mah thao i kei kiruungchunga suunga keita kanphuumnatu athlourang turelna amah in atlohpei. 13Keiin nankuungah tak a kisonchou, tukleiram apumtea mah akthra trongi raannatu amun naamtea amah kumei in atlohthlou i amahta intheihna veia insontu.”

Judas in Jisu ta Ajurhnatu Rou Aja

(Mak 14:10–11; Luk 22:3–6)

14 # Mak 14:10–11; Luk 22:3–6 Chunna akming Judas Iskariot somlei innih ankaarna khatin akthloi thiimpu ankuungah seh a 15asonpei, “Keiin amahta nankuungah nanimlan angleva keikuungah jangnanpek tungme?” Cheva anmah in akuungah harngou baobeh sopthum amilanpei. 16Che mah chunnata Jisu ta malannatu amah in taancha aphahnatu amjonpei.

Jisu in Aroisoh Laalna Buhdoon Asaak

(Mak 14:12–21; Luk 22:7–13,21–23; Jon 13:21–30)

17 # Mak 14:12–16; Luk 22:7–13 Pek chol jaonoh laalna buhdoon matsah akniah aroiin Jisu kuungah thlenga ansonpei, “Laalna Buhdoon saaknatu nang turella ramma thlouraang namitlohja ungme?” 18#Met 26:45; Jon 7:6; 12:23; 13:1; 17:1Amah in ason, “Khuuboomma luut choulaia mii khat kuungah sonve, ‘Lulok in ason, keitu lai innaisa, nang inna kei kiroisoh laalna buhdoon kansaaknatu.’ ” 19#Met 21:6Che Jisu in ankuungah amtheih nujuih a, aroiin laalna buhdoonkha tlohnatu amichaangpei.

20 # Mak 14:17–21; Luk 22:14,21–23; Jon 13:21–30 Khulouhram aphah in, aroi somleinihsoh tebor kuungah inbokjousei; 21che anmah in ansaaksuunga, anmahta asonei, “Keiin nankuungah tak a kisonchou, nankaarna inkhat in keita lonna nanjurhtung.” 22Che anmah in anril khalmo lahsei, che anmah in khatleh khat inrui amithronpei, “Akpu, mahchu keisangme?” 23Amah in amsangei, “Tarpenga keisoh kut akpuurjou miital khanna keita kamlantung. 24#Luk 24:25; 1 Kor 15:3; Noon 17:2–3; Met 18:7Miivaa Asa kupa rella injih nujuih a seh, chuta miivaa Asa kupata amlan miikhava lahnasa! Amah miikhan poknoh leva ralla thra uta.” 25Amahta akjuur Judas in amsang, “Akpu, keisangme?” Amah in akuungah ason, “Nangin nisonluungpei.”

Akpu vaa Buhdoon

(Mak 14:22–26; Luk 22:14–20; 1 Kor 11:23–25)

26 # Mak 14:22–25; Luk 22:17–19; 1 Kor 10:16; 11:23–26; Met 14:19; 15:36 Ipek anmah in ansaaklai, Jisu in tol loua doi amlanpei, che mahchuta khoia aroi ankuunga malanna asonei, “Loua saave, mah i kei kiruungsa.” 27Mahche kuchaita loua ampaakche, mahchuta ankuunga malanna asonei, “Nannaam mah i loua iinve, 28#Met 20:28; Mak 1:4; Hib 9:20alamva mah i mii chahchah anlehta ipnatu akluung trongirhnavaa kei kithiisa. 29Keiin nankuungah kitihchou, kipavaa kurung ramma nannihsoh inruuia akthar iinphu i iinjounatu amah aknikha athlengnohmiil, mah nganglirah atuii i keiva veikhat iinnoh usang.”

30 # Mak 14:26–31; Luk 22:33–34,39; Jon 14:31; 18:1; 13:36–38 Che anmah in laatloh a, chorphol muulla sehsei.

Pitar in Andahsam Jisu in Matsah a Aphoong

(Mak 14:27–31; Luk 22:31–34; Jon 13:36–38)

31 # Jon 16:32 Chunna Jisu in ankuungah asonei, “Mi in khulouh keirella nannih nannaamte vaisi vei usachou; alamva mah i injihchesa, ‘Keiin sadamkemta kamrattu, che sadamte loom in inthek invorhtuei.’ 32#Met 28:7,10,16Chuta keita kamringche aknua, nannih nanmaa a keiin Kalili a lousehtung.” 33Pitar in akuungah ason, “Anmah annaamte in nangrella vaisi vei seilakho, keiva tiknikho kivaisi suuknohtung.” 34Jisu in akuungah ason, “Keiin nikuungah tak a kisonche; mi in khulouh aarkhong in ankhuungnoh amaa a, nangin keita veithumkhek kandah uche.” 35Pitar in akuungah ason, “Keiin nangsoh inruuia thijou samelakho, keiinva nangta nandahnohtung.” Mahchunanga aroi annaam inkho ansonpei.

Jisu in Ketsemani ah Angen

(Mak 14:32–42; Luk 22:39–46)

36 # Mak 14:32–42; Luk 22:40–46 Cheva Ketsemani antih amunna Jisu in aroisoh sehjousei, che aroi ankuungah asonei, “Kei ousonna vaa a kingenlai, onna louamve.” 37Che amahsoh inruuijoua Pitar leh Jebidi asa kupa innihta asehpiei, cheva aril lah a inlaang amthronpei. 38#Jon 12:27; Hib 5:7–8Mahlai anmah kuunga asonei, “Kei kikli i thih ajaphah a khalmo klahsang; onna louamve, keisoh inruuia doujouve.” 39#Jon 18:11; Met 20:22Che amaatonga ste avache akhuptlop a intolh a angenpei, “Pa o mah i vei ajaleva kei kuungnata kuchai i keilourosa; chuta keiin kimdon veinoh a, nangin nimdon veiso.” 40Che aroi ankuungah athlenglai anmahva inna louam aphah ei, che Pitar kuungah ason, “Nannih in keisoh inruuia pungkhatruva doucheknoh choume? 41#Met 6:13; Luk 11:4Nannih in madoina a nanluutnoh natu doutrangve; li inva amdonta ruung inva marnopsachou.” 42#Jon 4:34; 5:30; 6:38Khatla veinih tihpitu veia seh a angenla, “Pa o, keiin mah kuchainata iinnoh angkleva, mah i ralcheknohtung, nangin nimdon veiso.” 43Che veikhatla athlengin anmah in inna louam antuukpiei, alamva anmahva khalmo an ihmu thonoh a anmit klahsei. 44Chela khatla anmahta amah eiche seh a matsah angenna trongsoh intrimma, veithum tihpi veia angen. 45#Met 26:18; Jon 12:23; 13:1; 17:1Cheva aroi ankuungah thlenga asonei, “Nannih pekphah inna ammang choume? Anve, pungi innaisa, miivaa Asa kupata aleh am ankut ah ajurhpei. 46Inthouvesa, seh raseio, anve, keita kamlansam miikha inihkuung innaisa.”

Jisu ta Ansuur

(Mak 14:43–50; Luk 22:47–53; Jon 18:3–12)

47 # Mak 14:43–50; Luk 22:47–53; Jon 18:2–11 Jisu in tronga amlai, somleinih ankaarna inkhat Judas in akthloi thiimpu eisoh mahche miivaa anparuul tingnasoh chemsei leh sung choia miitam amahsoh thlengsei. 48Pekva amahta akjuurin anmah kuungah daangkhat malanna asonei; “Keiin abing kimchohsam mii khasa, amahta suurve.” 49Kak hanga amah in Jisu kuungah ason, “Akpu kimthruunche!” Che amah abingta amchohpei. 50#Met 20:13; 22:12Jisu in amah kuungah ason, “Ruullo, onna jangtlohtu thlengcheme?” Mahlaia thlenga anmah ankuttal in Jisu ta ansuurpei. 51Cheva anve, Jisu soh inruui ankaarna khatin chemsei akjuukche, thiimpu aklok roijuihta atuk inva amkuurta apheklokpei. 52#Mad 13:10Mahlai Jisu in amah kuungah ason, “Nang chemseikha akhumsuungah thunro, alamva chemchoi mii in chemma maangtuei. 53Ringraan lijan somleinih ralla kikomma pektal mathlahnatu keiin Pa kuungah nihcheknoh tuta nimdonme? 54Mahchuta mainanga tlohmeleva ringjih in mah i nga tloh a suuktuta asonkha khatloh a tlungume.” 55#Luk 19:47; Jon 18:19–21; Luk 21:37Mah pungtal chunna Jisu in miitamta asonei, “Inruraan aksuinanga chemsei mahche sungsoh inruuia keita keisuureita thleng sachoume? Anirel Ringpu mathruunna thlaamma matheih a inbok a kiamlaiva keisuurnoh choua, 56chuta mah naamte i ringraanei ringjihta atlungnatu suuksa.” Cheva aroi naamtein amahta mathlah a tlaankirsei.

Jisu ta Jama Anmaa ah Anthlen

(Mak 14:53–65; Luk 22:54–55,63–71; Jon 18:13–14,19–24)

57 # Mak 14:53–72; Luk 22:54–71; Jon 18:12–27 Mahlai Jisu ta aksuur raalmii eiin ringjih lulok mahche anparuul annaam anbomna a Thiimpu aklok Keipha kuungah Jisu ta anphurhpei. 58Chuta Pitar invah Thiimpu aklok innmai phah Jisu ta inlabep a aknu ajuih mahche asuung luut a khakha suuk umeta annatu amah in santri eisoh inbok a akbirh. 59Pek akthloi Thiimpu leh jama annaamtea Jisu ta thatnatu chimnoh sakhi anjonpei, 60chuta chimnoh sakhi khalmo thlengslakho, anmah in jakhatkho tuuk cheknoh ei, Juktoolla mii innih in thlenga, 61#Met 24:2; 27:40; Noon 6:14; Jon 2:19“Keiin Ringpu mathruunna thlaam i kikthritche, nijanthum suunga tloh kichektu” tih a amah mii in ason. 62Che Thiimpu aklok in inthoua amah kuungah ason, “Nangin jakhatkho masangnoh ucheme? Nang nichunga anmah in sakhi anmailan i jarelname?” 63#Met 27:11; Jon 18:33Chuta Jisu invah rimta amsa. Mahche Thiimpu aklok in amah kuungah ansonla, “Ringpu Asa kupa Khrista kha nangche, nangnohche nisonnatu akring Ringpu minga suitasoh inruuia trong kiruiche.” 64#Met 16:28Jisu in amah kuungah ason, “Nangin nisonluungpei, chuta keiin nikuungah kisonche, mah i aknua miivaa Asa kupa in amtik liin akchangah inbok mahche ringram sumphai chungah thleng nannih in nanmuhtu.” 65#Noon 14:14Mahlai Thiimpu aklok in anluut insuulta akthritche atih, “Amah in Ringpu usitnoh a trongsa. Maiche aktlei sakhi darkaar ammangme? Amah in Ringpu ta usitnoh a trongkha nantheihpei. 66Nannihva kha namidonme?” Anmah in amisang, “Amah i thituru.” 67Cheva amah amaia amichil, anhai che arouin anbeeng. 68Mahche antih, “Khrista o, tunang in nanhaime kaniphoongro?”

Pitar in Jisu ta Indah

(Mak 14:66–72; Luk 22:56–62; Jon 18:15–18,25–27)

69Pek Pitar in innmaia inbok a am. Mahcheva rungaak khat in thlenga amahkuunga ason, “Nangkho Kalili na Jisu soh inruuijou miinoh cheme?” 70Chuta anmah kuungah indah a ason “Mah nisonkha jangnitihname romnoh ang khame?” 71Mahche innmuk ah anthruhlai aktlei rungaak khatin amahta amuh a mah khanna ak am ankuunga asonei, “Mahmii i Najareth na Jisu soh inruuijou khare.” 72Chunna amah in suita tloh a “Keiin mahmii i romnohluung ang” tiha indahsa. 73Kak amche amahta akrom eiin thlenga amah kuungah anson, “Tak a nangkho anmah ankaarnahche, alamva nang niroolhou in inromche.” 74Mahlai chunna, “Mahmii i keiva romnohluung ang” tih a akroua phool inpea che suita tloh a inso amthronpei. Mah laitalla aarkhong in inkhuungsa. 75#Met 26:34Mahcheva “Aarkhong in ankhuungnoh amaa a, nangin keita veithumkhek kandah uche” ta Jisu in amahkuunga ason trongkha Pitar in intheihsa. Mahcheva apaalla inthruh a aril sok a trapsa.

Currently Selected:

METHIU 26: TARAOBSI

Highlight

Copy