METHIU 25

Kumei Somvaa Pandam

1 # Luk 12:35–38; Mak 13:34 “Chunna ringram huunnachu antak antak mitton choia changri intuukpinatu akseh rungaak som nangjimtu. 2#Met 7:24–27Rungaak rangava kmongei chuta rangavah ksingei. 3Alamva kmong rangava anmah mitton anchoilai, thaova maruuinohsei; 4chuta aksing rangava anmah mitton soh inruuia thao abuura amiruui. 5Changri in athil inva annaam mitchua inkirsei. 6Chuta khulouh jaanjaia onga, ‘Anve, changri! Intuukpi natu inthruhvesa.’ 7Mahlai rungaak in inthoua anmah mittonta antaarpei. 8Che kmong rangain ksing ranga ankuunga anson, ‘Nannih nanthao ste kanimlanve, alamva kannih mitton thisamsei.’ 9Chuta ksing rangain amisang, ‘Kannihkho che nannih turelkho inkhopnoh aja, akjuurkuungah seh a nannih turella leive.’ 10#Mad 19:9Che aklei ansehnua, changrikha thlengsa, thlouraang akcheva amahsoh inruuia changvaangbuh doonna ah luutsei, che innkho ankhaarpei. 11#Luk 13:25; Met 7:21–23Mahchu aknua aktlei rungaak inkho thlenga anson, ‘Akpu, akpu, inn kanimhoongro.’ 12Chuta amah in amsangpei, ‘Tak a keiin kisonchou, keiin naniromnoh ang.’ 13#Met 24:42; Mak 13:35; Luk 12:40Alamva jih trangve, nannih in aknikho apungkho romnohchou.”

Roijuih Inthumvaa Pandam

(Luk 19:11–27)

14 # Luk 19:12–28 “Alamva mah i mii khat in ramlah ah asehtum amah roijuih eita onga adoon akhaal naamte amsilkir khanangsa; 15Amah roijuih inkhatkuungah talen ranga amlan, aktleikhat kuungah innih, mahche aktleikhat kuungah inkhat amlanei, anmah anmah in anchektu chaanga amlannei. Che amah atakva aklah ramma sehsa. 16Talen ranga akphah in kak hanga seh a amlat in, ranganata ranga amchuungpei. 17Mahchunanga talen innih akphah inkho innihnata innih amchuungpei. 18Chuta talen inkhat akphahva seh a tuklei achohche, amah Akpu vaa baobehta amthupei. 19#Met 18:23Pekva lai khalmo asotnua roijuih ei akpu athlenglai, anmahsoh inruuia baobeh anmilatna akseh akthleng an anjoupei. 20Che talen ranga akphah in akuunga luut a akchuung talen rangasoh thlenna ason, ‘Akpu, nangin talen ranga namlan ang; anro keiin talen ranga kamchuungpei.’ 21#Luk 16:10; Met 24:45Amah Akpu in akuungah ason, ‘thra nitlohpei, akthra khatkho malot aja roijuih; nangva thlou andih a malot aja taningcheva, nangta thlou akliinna kampuih uche; nang akpu vaa aroomthokna a luutrosa.’ 22Che talen innih akphah inkho akuungah luut a amah in amchuung talen innihkho thlenna ason, ‘Akpu, nangin talen innih namlan ang, anro, keiin talen innih kamchuungpei.’ 23Amah Akpu in akuungah asonpei, ‘Thra nitlohpei akthra khatkho malot aja taningcheva, nangta thlou akliinna kampuih uche; nang akpu vaa aroomthokna a luutrosa.’ 24Talen inkhat akphah inlakho akuunga luut a ason, ‘Akpu, nangva linnoh a niluh mahche, vornoh a amtlonche, karaang miicheta kiromche; 25chunna keiin naktrih anga seh a nang talenta tuklei choua tukleisuungah kimthup. Nangtakha oire.’ 26Chuta amah Akpu in akuungah amsang, ‘Thranoh che aktal roijuih! Keiin linnoh a kiluh, che vornoh a kamtlon tih a nirompei? 27Chunna kei baobehkha baobeh amlattheih ankuungah namlan uta, mahche kithlenglai keitakha akchuungsoh kphah uta. 28Chunna akuungnah talenkha loua talen som ak amkuungah malanve. 29#Met 13:12; Mak 4:25; Luk 8:18Alamva ak am ankuungah ralla kimlantu, che thloia an amna veitu, chuta tukhat ak amnoh akuungah amah in asihkhakho kilohtu. 30#Met 8:12; 13:42,50; 22:13; Luk 13:28Che akanana amnoh roijuih iva apaal anthimna kaa a lonve, mahchunna sinthruui ah anmah anha amikettu.’ ”

Achena Pichaar

31 # Met 16:27; 19:28 “Miivaa Asa kupa in amah paarthrasoh che ringroi annaamsoh inruuia anthlenglai, amah paarthra phompii chunga inbok usa. 32Jatih naamte in amah kuungah inchuntuei, sadamkem in keelnata sadam athreknanga, anaamte khatleh khat athrektuei, 33che sadam in amah akchanga, chuta keel in amah akveitonga asihtuei. 34#Luk 12:32; Met 5:3; Mad 13:8; 17:8Chunna kurung in akchangtong ak ameita asontuei, ‘Thlengve, Pa adoi akphah eio, tukleiram amthron lainata nannih turel machaanga asih kurung arami changvesa; 35#Jem 1:27; 2:15–16; Hib 13:2; 2 Tim 1:16alamva keiin kitraamlai saakphu namilanang, keiin tuii kraallai iinphu namilanang, keiin rapkhei kiveilai nanlousoongang, 36keiin athlaia kiamlai nannih in puun namilanang, keiin kinat kisatlai nannih in saakphu namisaak ang, keiin simma kiamlai nannih in kikuungah thlengchou.’ 37Chunna akchimlamseh in akuungah anmisangtu, ‘Akpu, tik a traam kanmuhchea saakphu kamisaakcheme, chunoh a tik a tuii niraallai iinphu kamilancheme? 38Che tik a rapkhei veia kanmuhchea kanlousoong cheme, chunohle athlaia niamlai puun kamilancheme? 39Che tik a ninat nisatlai chunoh a simma niamlai kannih in kanmuhchea nikuungah thlengsungme?’ 40#Met 10:42; Mak 9:41; Hib 6:10Che kurung in ankuungah amsangtuei, ‘Atak a nankuungah kisonchou, kei kiuh kinao antool antaangrem inkhatta nannih in vachah nantloh i nannih in mahkha keita nantloh ang.’ 41#Mak 9:48; Luk 16:23; Mad 20:10Chunna akveitong ak am ankuungah asontuei, ‘Phool akphah eio, kikuungnata insenga repnanga che amah ringroi turella amchaang ache amnoh meia sehve; 42alamva kitraamlai saak iin kamlannohchou, tuii kraallai iinphu kamlannohchou, 43rapkheia kiamlai keilousoong nohchou, athlaia kiamlai puun kamlannohchou, kinat kisatlai mahche simma kiamlai keita keian thlengnohchou;’ 44mahlaia anmah inkho anloumasangtu, ‘Akpu, nitraamlai, tuii niraallai, rapkhei veia niamlai, athlaia niamlai, ninat nisatlai, chunohle sim a niamlai tik a kanmuhchea nangta rou naktlohnoh sungme.’ 45Chunna ankuungah amsangtuei, ‘Keiin nankuungah tak a kisonchou, khalmo antool antaangrem inkhatta rou nantlohnoh i nannih in mahkha keita rou keitlohnohchou.’ 46#Jon 5:29Che anmah in ache amnoh tanti a sehtuei, chuta akchimlamseh eiva ache amnoh ringna a sehtuei.”

Currently Selected:

METHIU 25: TARAOBSI

Highlight

Copy