METHIU 27

Jisu ta Pilat Kuunga Anthlen

(Mak 15:1; Luk 23:1–2; Jon 18:28–32)

1 # Mak 15:1; Luk 23:1; Jon 18:28 Juktiing asuuk in, akthloi Thiimpu annaam leh miivaa anparuul eiin Jisu ta thatnatu intelsei; 2amahta ankhitche rampuui kuungah anmilanpei.

Juda in Thi

(Noon 1:18–19)

3 # Met 26:15; Noon 1:16–20 Jisu ta amlan Juda in mahmii i amaraal amnohmii kamlanpeita arompeia, aril athlenga, harngou baobeh sopthumta akthloi Thiimpu leh anparuul ankuunga veikhat thlenna asonei, 4“Keiin amaraal amnoh thiita kimlaalli alehsang.” Anmah in anson, “Mahkha kanthlou ammangme? Mahkha nitak nikroua romrosa.” 5Cheva Ringpu mathruunna thlaamma amah in harngou inbaobehta lonna amahche inthruhsa; mahche seh a rui inthoia thisa. 6Chuta akthloi Thiimpu in baobehta anlohche anson “Mah i akseeng baobeh sihna thlaamma sihmele trongsuur in jaonoh, alamva mah i miithii aman.” 7Chunna anmah in intella, rapkheimii phuumnatu beel loupuk tih a amah baobeh chunna ramchuta anleipei. 8Ohchurella mah loupukchu pekphah thiivaa loupuk antihpei. 9Churella Israel ste in mah chuvah aman ngirhna chaang nujuih a, harngou sopthumta anlohpei, 10“Che Akpu in keita alam kamtheih nanga anmah in beel loupuk amanturella mahchuta amilanpei” ta ringraan Jeremiah in asonkha mahlaichun atlungna veisa.

Pilat in Jisu ta Trong Arui

(Mak 15:2–5; Luk 23:3–5; Jon 18:33–38)

11 # Mak 15:2–15; Luk 23:3,18–25; Jon 18:29—19:16 Pek Jisu in rampuui kuungah ngirsa; che rampuui in amahta trong arui, “Nangi Judiei kurung cheme?” Jisu in amsang, “Nangin nisonkhasa.” 12Khattingla akthloi Thiimpu leh anparuul eiin amahta lonna antronglai atakin jakkatkho masangnohsa. 13Mahlai Pilat in amahta ason, “Anmah in nichungah sakhi khalmo amilanni theihnoh cheme?” 14#Luk 23:9; Met 26:62; Mak 14:60; 1 Tim 6:13Chuta amah in akuungah jakhatkho masangnoh luungsa, mahchunna rampuui in khalmo salungkhousa.

Jisu Atak ah Tandi Tla

(Mak 15:6–15; Luk 23:13–25; Jon 18:39—19:16)

15Buhdoon niah miitam in andit nujuih a rampuui in mii khatkhat simnata mathlah i tloh a thleng. 16Mahlai thranoh tloh ah akmingseh Barabbas an ong mii khat simma thunna ansih. 17Miitam inchunlai Pilat in ankuunga asonei, “Nannih turella tunangta mathlahro nantih angme, Barabbas tameh chunoh a Khrista an ong Jisu tameh?” 18Alamva amahta ak andah eiin keikuungah anthlenpeita amah in arom. 19#Luk 23:4Amah in phompii ah anboklai, amah akmei tingnata trong thlenga, “Akchimlamseh mii i achungah nangin jakhatkho tlohnohro, alamva mahmii irella khulouh kikmanga khalmo klah kphah.” 20Akthloi Thiimpu mahche anparuulei inva Barabbas ta mathlahnatu nihkanga Jisu ta thatnatu miitamta amisoh. 21#Noon 3:13–14Rampuui in ankuungah asonei, “Anmah innih kaara tuta mathlahro nantih angme?” Che anmah in anson, “Barabbas ta.” 22Pilat in anmah kuungah asonei, “Chuleva Khrista an ong Jisu i keiin kha kitloh ume” Annaam in anson, “Amahta thingkharh a mathluro.” 23Che anmah kuungah asonei, “Jarelnasame, amah in jaknang thranohthlou atlohpeime?” Chuta anmah in “Amahta thingkharh ah mathluro” ta thloithloi a ongsei. 24Nga tloh a Pilat in thloui mapaang janohsa, chuta mahchu ngut a ralladom housuuk aveinanigta amuhpeia tuii loua miitam anmaikuungah akut aksilche asonei, “Mah miivaa athii irella kei kamraal jakhatkho amnoh; mah i nannih nanthlouning.” 25#Noon 5:28Miitam in amisang, “Amah athii kannih kanchunga che kansa antakchunga tlaso.” 26Cheva Pilat in Barabbas ta anmah turella amthlahpei, che Jisu ta tranga marat a thingkharh ah mathlunatu anmah kuungah amsilei.

Raaalmii in Jisu ta Aminuih

(Mak 15:16–20; Jon 19:2–3)

27 # Mak 15:16–20; Luk 23:11; Jon 19:2–3 Mahlai rampuuivaa raalmii in Jisu ta rampuui kool asuunga anhonche, raalmii akpul annaam Jisu kuungah inboomsei. 28Cheva amah apuunsilhta anlohche in aang puunta amisilhpei. 29Mahche kuling lukhumkhat sak a akangah amikhum, che akut akchanga raphalsung khat amichoih. Che amah kuungah ankhuk makamma inkhup a che manuih a anson, “Judiei kurung, nangta kimithruunche!” 30Che amahta machilla, sunga akanga anhai. 31Anmah in aminuihche asilhpuunta liimma, amah apuunsilh saakta amisilhpei, mahche thingkharh ah mathlunatu anphurhpei.

Jisu ta Thingkharh ah Amithlu

(Mak 15:21–32; Luk 23:26–43; Jon 19:17–27)

32 # Mak 15:21; Luk 23:26; Jon 19:17; Hib 13:12 Anmah in ansehlai, akming Simon an ong Sirini na kupa khatta anmah in thingkharhta mapuihnatu namma anmijapei. 33#Mak 15:22–32; Luk 23:33–39; Jon 19:17–24Mahche Kolkotha amunna anthleng in (mahchu arthava luisipmun), 34anmah in masingkhasoh inpool nangli atuiita a iinnatu amilan, chuta mahchu amtem in iinnohsa. 35Mahche thingkharh ah amahta mathlua, anmah in rasi anna Akpu apuunta ankaara insemsei; 36che anmah in ohchunna inbok a Akpu ta ngaak a amsei. 37Che akangchunga amahta lonna trong injihkha antaarpei, mahchuva, “Mah i Jisu, Judiei Kurung khare.” 38Mahlai chunna amahsoh inruuia inruraan mii innih, inkhat in akchangtonga, che inkhat in akveitonga thingkharh ah thirkit hemma anjampei. 39Amahta vanna akseh akloon eiin ankang lek lek a injakna veia manuih a, 40#Met 26:61; Jon 2:19; Noon 6:14anson, “Ringpu mathruunna thlaamta thrit a nijanthum suunga akseemsam nang, nikroua inkalro khame! Nangin Ringpu vaa Asa kupa chele, thingkharh nata trumro khame.” 41Mahchunanga akthloi thiimpuei ringjih lulok khatkho anparuul eisoh amahta manuih a anson, 42“Aktlei miiva akalche; atak anrouva inkahlcheknoh, amahvah Israel kurung; pek amah in thingkharh nata trumso, chunna inih in amahta malotrei, 43amah in Ringpu ta amlot; Ringpu in amahta innarhle, ipek amahta kalso; alamva amah in anson, ‘Keiva Ringpu asa kupa ang.’ ” 44Che amahsoh inruuijouva thingkharh ah thirkit hemma anjamjou inruraan inkho mahchunga innangtronga manuih a trongsei.

Jisu in Thi

(Mak 15:33–41; Luk 23:44–49; Jon 19:28–30)

45 # Mak 15:33–41; Luk 23:44–54; Jon 19:28–30 Ipek pung kuruknata ku phah a ram naamte inthimsa. 46Che pungku atlaktumma Jisu in arool inkaanga ongsa, “Eli, Eli, lama sabakhthani” Mahchuva, “Kei Ringpu o, kei Ringpu o, keita jarella namthlah peiangme?” 47Che amahta ak an, akmuh mii in mahchuta antheih in ansonpei, “Amah in Elijah ta aong.” 48Cheva kak hanga anmah ankaarna khat in tlaanna spankhat loua, mahchu tuiibuh akthuur a aphuumche raphalsung apaara khit a amahta am iinnatu amlan. 49Chuta aktlei in anson, “Inngairo, Elijah in thlenga amahta akalume anrei.” 50Cheva Jisu in veikhatla ahou inkaanga aongche amah ali amthlahpei. 51#Met 28:2; Hib 9:8; 10:19Chunna anve, Ringpu mathruunna thlaam akseeng munna injaarpuun achungnata athlangphah innih suuk a inthrelsa; thaleikho inloksa, che lungkho koisei, 52Rusuunkho inhoongsei, che ak inche akseeng anruungkho inthousei, 53mahche Akpu in rusuunnata aringnua amah in rusuunnata inthruh a akseeng khuuboomma luut a miikuungah atakta ammuh ei. 54#Met 3:17; 17:5Raalmii reijapuui leh amahsoh inruuia Jisu ta akngaak raalmii eiin, runaangnu thou khatkho mah aksuukthlouta anmuh in, khalmo intrisei, cheva atihpei, “Tak a mahmii i Ringpu vaa Asa kupasa!”

55 # Luk 8:2,3 Kumei tam in klahbeb a anna ammei, anmahchuva Jisu ta rou aktloh Kalili nata aknu anjuih; 56#Luk 24:10anmah ankaar a Makadalini Meri, Jems leh Joseph annu Meri, che Jebidi asa kupa vaa annuei.

Jisu ta Anphuum

(Mak 15:42–47; Luk 23:50–56; Jon 19:38–42)

57 # Mak 15:42–47; Luk 23:50–56; Jon 19:38–42; Noon 13:29 Khulouhram aphah in Arimathia na kdoon mii khat akming Joseph atakkho Jisu aroi veiin thlengsa. 58Amah in Pilat kuungah seh a Jisu aruungta anihpei. Mahlai Pilat in mahchuta malannatu jathang amlanpei. 59Mahche Joseph in Jisu aruungchuta loua akthra bulapuunna tuumma, 60amah in lungpiita viit a aseem amah atasaak akthra rusuunna mahchuta asihpei; mahche rusuun akhaar a lung inrolkhat amdolhche amahpei. 61Makadalini Meri mahche aktlei Meri in rusuun amaatalla inbok a ammei.

Rusuunta Angaak

62Tungvah nanga, mah chuvah thlouraangni aknua, akthloi thiimpu leh Pharisi eiin Pilat kuungah inchunna, 63#Met 16:21; 17:23; 20:19; Mak 8:31; 9:31; 10:33,34; Luk 9:22; 18:31–33anson, “Lulok, amah miileemtheih kupa in aringlai, ‘Nithum aknua keiin rusuunnata veikhat ringtung’ ta asonkha kannih in intheih ung. 64Mah churella nithumphah a rusuunta ngaaknatu jathang malanro, chunohleva amah aroiin thlenga amah aruungta amiriukche ‘Amah in kthinata ringsang’ ta miikuungah tong aja; mahche matsahna miileemtheih khachunga juktoolna miileemtheih in ralla thranoh vei aja.” 65Pilat in anmah kuunga asonei, “Akngaaktu raalmii louve; seh a nannih in ansoinoh natu thra seella ngaakve.” 66#Met 27:60; 28:11–15Mahchunna anmah in seh a akngaaktu raalmii eisoh lungta chum namma rusuunta thra a amingaakpei.

Currently Selected:

METHIU 27: TARAOBSI

Highlight

Copy