METHIU 28

Jisu in Veikhat Ringsa

(Mak 16:1–10; Luk 24:1–12; Jon 20:1–10)

1 # Met 27:56; Mak 16:1–8; Luk 8:2; 24:1–9; Jon 20:1–2 Ipek sabat achesoh; kouhtu matsahni ram didata avaarsoh, Makadalini Meri mahche aktlei Meri in rusuun ak an sehsei. 2#Met 27:51,60Mahche anve, runaangnu tranga thousa, alamva Akpu vaa ringroi khatin ringramnata trumma lungta amlatche, achunga inboksa. 3Amah ameelva kini inthlanang, che apuunrei in hurnanga inngou. 4#Met 27:62–66Che rusuun akngaak in amahta trihseia inchuunsei cheva akthi miinangsei. 5Chuta ringroiin kumei kuungah asonei, “Intrinohve, mah chuvah thingkharh ah anthat Jisu ta nanjon ta keiin kirom. 6Amahvah onna amnohsa, alamva amah in ason khananga thinata ringsa. Thlenga ansihna amun i anve. 7#Met 26:32; 28:16; Jon 21:1–23Pek intha seh a amah aroi ankuunga sonvesa mah chuvah Akpu vah thinata ringsa, mahche anve, nannih nanmaa a amah in Kalili ah lousehsa; nannih in mahkhan ameelta nanmuhtu. Anve, keiin nankuungah kisonpeichou.” 8Mahchunna anmah in intrisoh khalmo roomthoksoh inruuia innotslamma rusuunta anmahche amah aroi ankuunga ansonnatu tlaansei. 9#Jon 20:14–18Cheva anve, Jisu in anmahta intuukpia asonei, “Doiphah veive,” cheva amahninga thlenga akehta matuh a amithruunpei. 10Mah laitalla Jisu in ankuungah asonei, “Intrinohve; seh choulaia kiuh kinaoin Kalili ah ansehnatu soneive, mah khanna keita kanmuhtung.”

Rusuun Akngaak Ankuungah Antong

11 # Met 27:62–66 Anmah in ansehlai anve, rusuun akngaak ankaarna mii ste in khuuboomma seh a aksuuk thloukhata akthloi thiimpu kuungah antongpei. 12Chuche anmah in anparuul eisoh inboomjoua trong intelsei, raalmii ankuunga baobeh tam malannatu 13anrouva intelsei, “Amah aroi in thlenga khulouh kan ihsuunga amirukpei,” ta mii kuungah sonve. 14Che mah i rampuui in theihle amah aril mathlanna nannihta klah knang nanimphahnoh natu kantlohtu. 15Nga tloh anmah in baobehta anlohche, ankuungah amitheih khananga antlohpei; che mah i Judi ankaara mi in phah ansonmang.

Jisu in Aroi Ankuungah Atakta Ammuh ei

(Mak 16:14–18; Luk 24:36–49; Jon 20:19–23; Noon 1:6–8)

16 # Met 26:32; Mak 14:28; Jon 21:1–23; 1 Kor 15:5 Ipek aroi somleikhat in Kalili a Jisu in amtheihna muulla sehsei. 17Cheva amahta anmuh in amithruunpei; chuta arou invah chingnasei. 18#Met 11:27; Luk 10:22; Phil 2:9; Eph 1:20–22Cheva Jisu in ankuungah thlenga asonei, “Ringram mahche thaleia am amtik amneh naamte keikuungah kamlan peiang. 19#Luk 24:47; Noon 1:8Churella nannih in seh choulaia jaat naamteta aroi seemve che anmahta Apavaa, Asa Kupa vaa, mahche Li Akseengvaa miinga lup eive. 20#Met 13:39,49; 24:3; 18:20; Noon 18:10Keiin trongthuun pumte kamlanchoukha, anmah in amijuihnatu matheih eive, che anve, juk achenohmiil phah a keiin nannihta lai amrel kanruuipi uchou.”

Currently Selected:

METHIU 28: TARAOBSI

Highlight

Copy