MATHI 24

Achineki Kutsavenikeu

(Mk 13.1-2; Lk 21.5-6)

1Jisu no achineki lono ipeghi no wu chekelo pa khopemino pa lau ighino achineki shipuakeqo kichepiye. 2Panongu vilo pano ishi pitsu, “Nonguye hipaqo kumtsu ithulu ani kema? Kuchouno ino nongu vilo pini, hile atu lakhimu lakhi shou bepe ngo move nani, hipaqo kumtsu tule qhive nani.”

Shiluksa eno Shikighime keu

(Mk 13.3-13; Lk 21.7-19)

3Jisu no Oliv toghilo iqa akelo, akhopemino lomo shighi pa lau ighi eno ishi iniju, “Kughono hi shini cheni keno nivilo pitsulo eno nono ighinikeu ngo hipa yeghi aghuloki shekha shini kelo kiu michipu shi nani kya?”

4Jisu no ishi panoqo khochile, “Kutokupuyi alo eno khuu pelomu nongu sakughuzu sawuvepe kevilo. 5Kughengu timi kutomono ije lono ishi piighi nani, ‘Niye Mesiya ke,’ eno tipaqono timi kutomo sakughuzu sawuve nani. 6Nongu kupunulo aghushi akeu chilu nani, aghachelo aghushi anie pikeu sutsa nongu vilo pi nani, ikemu nonguye thughuyive kepu kumoe. Hikithipu ighimasae, ikemu tiye ashekha tsala ighiveake kumoe. 7Kughengu ashiayeh lakhino ashiayeh lakhi sasu aghushi nani, ayehkipeqha lakhino ayehkipeqha lakhi le nani. Puqumiyekeu ngo ayeghi ithakeuno aqha kumtsulo anani. 8Hipaqo kumtsu apunu kusu huthu akeu toike.

9“Tileno timino nongu shikighime nike kughaluve nani eno nongu pithive nani. Nonguye ilaumi ke ghenguno timi kumtsuno nongu ju axesu nani. #Mt 10.22 10Tipa ghulokilo timi kutomono pano kupulu pheve nani, lakhino lakhi pesu thechu shi nani, eno lakhino lakhi ju axesu nani. 11Kichile tungkupmi kutomo ipeghi puzu timi kutomo sakughuzu sawuve nani. 12Ayezah phimokeuno ihulove kehu timi kutomono kimiyekeulo mukomghayive nani. 13Ikemu timi khunono ashekha kutolo tsuqupe aghini keno tipano xaluve nani. #Mt 10.22 14Kungugha yehkipe sutsa kiviu hipau pesu ayeghiqha kumtsulo kutsuwo nani eno tino ashiayeh kumtsu lau thopi lakhi shi nani eno tithiuno ashekha tsala ighi nani.

Akuighupu Kutsakungo

(Mk 13.14-23; Lk 21.20-24)

15“Akuighupu kutsakungo keu khikhi Danel tungkupuno pipuani keno tipauno akimthe-alo puthugho aghikeu nonguno ithulu aye, (phi akeuno hipau kiqiye kiu keno ithi kututa shilulo), #Zaki 9.2; 11.31; 12.11 16khunoqono Judia lo ani keno naghutolo povelo. 17Aki kutsuqalo akemino pa ki alou anhemgha lunike aqhou iqi kepu kumoe. 18Alulo huakemino pa kuuphi lunike ideighi kepu kumoe. #Lk 17.31 19Atsala tipaqo loye mishi chekemi ngo anga pinichekemi ghenguno ahakusapue! 20Susu tsala momu Sabat tsala lono koha-pokepu shipemo nike Alhou vilo khuini alo! 21Kughengu ayeghiqha huthuke lono ishi kutolo hitoi shimphikeu eno khilemu hitoikeu shinichemo keu ghime kitikhi tileno shini chenie. #Zaki 12.1; Piye 7.14 22Tipa tsalaqo Alhou no kihi kughukhovetsumo keaye timi khumu puxumoni cheke. Ikemu kisheluvekemiqo ghenguno Alhou no tipaqo tsala kihi kughukhove tsuni cheni.

23“Tilehi khualano nongu vilo, ‘Julo, Mesiya ye hile anie!’ momu ‘Paye hule anie!’ ipi aye, tipau pulu kevilo. 24Kughengu kichile Mesiya eno kichile tungkupumi ipeghi nani eno panonguno amchipu ngo akumzapu kumla shipe piye puzu, shikulupu shi aye kisheluvekemi ghi sakughuzu sawuve nikeu shi nani. 25Julo! ino asheazu shi nongu vilo hi pive ani. 26Ikehu, khualano nongu vilo, ‘Julo paye timi kughunamokeu-alo anie!’ ipi namu, tilau wu kevilo; momu panonguno, ‘Paye hilau itshu anie! ipi namu, tipau pulu kevilo. #Lk 17.23-24 27Kughengu tsutsu kukulono kipelau ipeghi kelo kulolau kutolo yepuvuke toi Timi Nu ghi tihutoi ighi nani. 28Khile no akithi kumo ani keno tilehi aluquqono kuho kumqo nani. #Lk 17.37

Timi Nu ighini keu

(Mk 13.24-27; Lk 21.25-28)

29“Atsala tipaqolo aghime kitikhi shive kemtsa tsukinheno zumoyive nani, aqhino vuqayi move nani, ayepuqono atsutsu lono ikiqive nani eno atsutsulo akuka jeli akeqo sukiniqhi nani. #Isa 13.10; 34.4; Ezek 32.7; Joyil 2.10,31; 3.15; Piye 6.12-13 30Tileno Timi Nu michipu atsutsulo ipeghi nani, ayeghilo ashiayeh kumtsu mlo-qah nani, Timi Nu no khungkusu lo akuka eno akimthe jukuvu lono chekeu timiqono ithulu nani. #Zaki 7.13; Zekha 12.10-14; Piye 1.7 31Afuko ghugha kije igha nani, pano pawu kungumi ayeghi cheku bidi kutolo puwu nani eno ayeghi shekha halau lono halau kutolo kisheluvekemi panonguno hekutsu nani.

Khughubo launo Kichepiye

(Mk 13.28-31; Lk 21.29-33)

32“Khughubo pe kimighipiye keu lakhi nonguno ithi lulo. Kughono tipa loka apishe ipeghi puzu ani mini ipeghive nikeno mutsu tsala shiwo chea kepi nonguno ithi cheni. 33Tihutoi, nonguno hipaqo thwokha kumtsu ithulu kelo aghulokiye kupunuvae eno ahukikha tove akepi nonguno ithilo. 34Kuchouno ino nongu vilo pini, itodolo xuakemi kumtsu thikhamphi lono hipaqo kumtsu shi nani. 35Atsutsu ngo ayeghiye hauve nani, ikemu itsaye khilemu hauvemo nani.

Khunomu Ado Mthae

(Mk 13.32-37; Lk 17.26-30,34-36)

36“Ikemu tipa tsala eno tipa tuqhudoye khunomu mthae, kungumi thotsu mthae, anu ghi mthae, ikemu Apuh likhino ithi anie. 37Noha tsalalo kiu shikeno Timi Nu ighi nikelo ghi tihutoi shi nani. #Bothu 6.5-6 38Azuno yimikeu tsala ighimphi lono-wo Noha no ashukakilo iloke tsala kutolo timiqoye chu shoa eno kulakupu shi ake. 39Azuno yimi ighike kutolo panonguno kumsu chilelumono ake lono kumtsu yipesu wuve. Timi Nu ighi keloghi tihutoi shi nani. #Bothu 7.6-24 40Tilehi timi kini alulo hu akelo lakhi sawuveno lakhiuye qhive nani. 41Totimi kini a-o shesu akelo lakhi sawuveno lakhiuye qhive nani. 42Tighenguno kutope khealo, kughengu kiu tsala lono nongu Mpeu ighi nani keno nonguye mtha. 43Ikemu hi ithi alo aki mipeuno putholo kiu ghuloki lono kupkami ighini keno ithi ake napi aye, paye kheani cheke eno kupkami pelo pa ki hepho iloghi pemo nicheke. 44Hi ghenguno nongu ghi kutope khe-amasa, kughengu Timi Nu ghi nonguno huqhe moke ghuloki lono ighini cheni. #Lk 12.39-40

Pukhubekulu momu Pukhubekumla Qeu

(Lk 12.41-48)

45“Tishiaye, khuno pukhubekulu eno alokutsu qeu kya? Paye pa mipeuno pa pelo aqemi kutamiqo peitha peniye qhike, tipaqo ado achipi lono kuchukusho tsupeniyeke. 46Aqeuno tishi mla ake lono pa mipeu akilo ighi puzu ithulu aye aqeu tipauye alokivipue! 47Kuchouno ino nongu vilo pini, pa mipeuno aqeu tipau pelo akuakini kumtsu pa lau kulhuqhive tsu nani. 48Ikemu aqeu lhokusa huno pa likhi pa vilo, ‘Imipeuye munu ighini cheni’ ipi puzu 49pa kusami aqemi ghaqhini, eno chumzu shomzukemi sasu kuchukusho shi aye, 50pano huqhejumoke tsala lakhi lono eno pano mthakeu tuqhudo lono, amipeu ighive nani. 51Ampiu huno pa kughape ghaqhitha piniyive nani, eno kuhakughamiqo gholo qhive nani, tilehi pa ye igha qah ahu-tsughu nani.”

Currently Selected:

MATHI 24: SUMIBSI

Highlight

Copy