MATHI 25

Ilimi Chighi pesu Kimighipiyekeu

1“Kungugha yehkipeye ilimi chighino amizu kulu pesu kulapuu sasu kushoniye wukeu kimihi shi nani. #Lk 12.35 2Panoqo gholo punguye mbomzumi eno punguye alokutsumi. 3Mbomzumiqoye panongu kulu peche kemu amizu lukumkhashi pemove; 4ikemu alokutsumiqoye panoqo kululo amizu chhitoi pewue. 5Kulapuu ighinikeu munuve kehu panongu kumtsu inguwuve eno zuwuve. 6Ikemu zubumta shivekethiuno ashekushu sutsa lakhi chilu, ‘Kulapuu cheae! Pa sasu kusho kepushi ighilo!’ 7Ilimi chighi kumtsu ithu puzu panoqo kulu kuqu thue. 8Mbomzumiqono alokutsumiqo vilopi, ‘Ni kulu inhe wu cheake nongu mizu ta ningu tsulo.’ 9Ikemu alokutsumiqono ishi khochile, ‘Ningu kumtsu ghenguno lukumkha shini chemoe; nonguye je chekemi lau wuno nongu sala qhulukeu pavie.’ 10Ikehu panonguno amizu qhuwuniye wuve kelono kulapuu hu ighive. Ilimi pungu khunoqono kutope akeno panonguye pa sasu kulakupu ghulhulo ilove eno ahukikhaye khave. 11Athiuno ilimi kutamiqo ghi ighino, ‘Oh Akijeu! Akijeu, ningu khaqhisulo!’ ipi. 12Ikemu kulapuuno ishi khochileve, ‘Kuchouno niye nongu mthae.’ #Lk 13.25 13Tighenguno khejukuto alo kughengu nonguye atsala momu atuqhudo mthake.

Aqemi kuthu pe Kimighipiye

(Lk 19.11-27)

14“Kungugha yehkipeye timi lakhino izuwuve niye pa qemi kukumqono pawu tinhemgha pesu panoqo pichevetsu keu hutoike. #Lk 19.11-27 15Milakhi khino kiu shilukepu qhemi keno tipau kiqi lono pano milakhi lau ghuka 5000 tsu, milakhi lau ghuka 2000 tsu, eno milakhi lau ghuka 1000 tsue. Tishi puzu pa ye wuve. 16Aqemi khipauno ghuka 5000 ithulu keno mtazu wupuzu tipaqo pesu kimije, eno ghuka 5000 no alaushi kimijeluve. 17Tihutoi, ghuka 2000 ithulukeu ghi tipaqo pesu ghuka 2000 alau kimijeluve. 18Ikemu aqemi khipauno ghuka 1000 ithulu keno, paye wupuzu ayeghilo aqoh chhu eno pa mipeu wu pisa kusupe qhive.

19“Ado kushuwa thiu, aqemi tipaqo mipeu hu ideighino panoqo launo pawu pisa khukutsujue. 20Aqeu khipau lau ghuka 5000 tsukeno pano ghuka 5000 alau pesu ighi eno ishipi, ‘Akijeu, nono ghuka 5000 itsuke; ino ghuka 5000 alau shiluke hi anie.’ 21Pa mipeuno pa vilopi, ‘Aghile shivae! Noye akivi eno pukhubekulu qeuke; noye kitila lomu pukhubekulu shike; ino opelo kutomo shou ampeu shipeni; ompeu lokivi gholo sulo!’ 22Tipathiu, ghuka 2000 tsukeu aqeu hughi ighi eno ishipi, ‘Akijeu, nono ghuka 2000 itsuke; ino ghuka 2000 alau shiluke hi anie,’ 23Pa mipeuno pa vilo ishipi, ‘Aghile shivae! Noye akivi eno pukhubekulu qeuke; noye kitila lomu pukhubekulu shike; ino opelo kutomo shou ampeu shipeni; ompeu lokivi gholo sulo!’ 24Ghuka 1000 tsukeu aqeu hughi ighino ishipi, ‘Akijeu, noye mutsumkayi kemi kepi ino ithi ani, nono shosumo keu-a lomu xolu cheni, eno nono vesumokeu-a lomu kichekutsulu cheni ishie. 25Ikehu niye msaveke eno ino wupuzu owu pisa ayeghilo kusupe qhiveke. Owu pisa hu hi anie.’ 26Tileno pa mipeuno ishi pa vilo pi, ‘Noye kixikila eno akipichi qeuke! Nono ithi anike, ino shosumo keu-a lomu niye xolu cheni eno ino vesumokeu-a lomu niye kichekutsulu cheni. 27Tishi aye, noye iwu pisa pesu akighishepu-alo sukepushi ake eno ino ighi kelo iwu pisa khije keno tipau gholo akighishe suno itsu kepushi ake. 28Pa launo pisa hu luvelo eno ghuka 10000 akeu hu tsu velo. 29Kughengu khunono ani keno tinguno alau tsu nani, eno panoye kupukunoshi alupe nani; ikemu khunono kuha keno pa launo kitila aghikeu ikhisuwuve nani.’ #Mt 13.12; Mk 4.25; Lk 8.18 30Avehupu kuhakeu qeu hipauye pa kughape khalau akuzulo vephevelo; tileno pa hu tsughububushi qah nani. #Mt 8.12; 22.13; Lk 13.28

Ashiayeh shou Kughathabeni

31“Kughou Timi Nu no ajukuvu lono kungumi kumtsu pa gholo sasu ighini keno tile pano pawu akimthe jukuvu lakhulo iqa nani. #Mt 16.27; 19.2 32Ashiayeh kumtsu pa zulo kumqowo ngo nani eno bherikheuno bheri ngo ane kututa shike toi panoqo pesu lakhino lakhi launo kututa shitsu nani. 33Pano bheriqo pesu pa-u ajeu qhi nani, ikemu aneqo pesu pa-u piyiu qhi nani. 34Tileno Akukauno pa-u ajeu akeqo vilo ishi pi nani, ‘Nongu ipuhno kumghatsukeqo, ighilo! Ayeghiqha lhophe kelono nongu ghenguno kutope puakeu yehkipeqha pe nongu mheghishi lulo. 35Kughengu ino muzuthi akelo nonguno achuqupu itsu; ino tughuthi akelo nonguno yekepu itsu; ino inami lakhi shi akelo nongu kilo isasu; 36ino u-mini kepu kuha kelo nonguno u-mini kepu itsu; ino kusukini shi akelo nonguno itucho; ino akughukilo akelo nonguno iputsa ighie.’ 37Tileno achipikalu cheqono ishi pa khochile nani, ‘Ampeu kughono nono muzuthi aghikeu nino ithuluno okughulhu; momu nono tughuthi aghino yekepu otsu kya? 38Kughono nono inami shi aghikeu nino ithuluno ningu kilo osasulu, momu nono u-mini kepu kuhakelo u-mini kepu otsu kya? 39Kughono nono kusukini shi aghikeu momu nono akughukilo aghikeu nino ithuluno oputsa ighi kya?’ 40Akukau huno ishi panoqo khochile nani, ‘Kuchouno ino nongu vilo pini, nonguno ithikuzumi hipaqo gholo akitilau lau kiu shitsu keno nonguye ilau shitsuake.’ ”

41Tileno pano pa-u piyiu akeqo vilo ishipi nani,”Ilauno chevelo, nongu Alhou no musuinivekeqo! Tughami ngo pawu kungumiqo ghenguno alhomi kutope puakelo ilovelo! 42Kughengu ino muzuthi akelo nonguye achuqupu itsumoe; ino tughuthi akelo nonguye yekepu itsumoe; 43ino inami shi akelo, nongu kilo isasumoe; ino u-mini kepu kuha kelo nonguye u-mini kepu itsumoe; ino kusukini shi akelo eno akughukilo akelo nonguye iputsa ighimoe.” 44“Tileno panongu ghi ishi pa khochile nani,’Ampeu, kughono nono muzuthi tughuthi akeu, momu inami shi akeu eno u-minimo momu kusukinishi eno akughukilo akeu ninguno ithulu puzu okuphumove kya?’ 45Tileno panoqo vilo pano ishipi nani,’Kuchouno ino nongu vilo pini, nonguno hipaqo gholo akitilau lau shitsumovekeu hu, nonguye ti ilau shitsumoveke.’ 46Panonguye alhoghimepulo puwuve nani, ikemu achipikalu chekeqoye lhokta kuxulo wu nani.” #Dane 12.2

Currently Selected:

MATHI 25: SUMIBSI

Highlight

Copy