MATHI 12

Sabat Pinye vehu Inijukeu

(Mk 2.23-28; Lk 6.1-5)

1Tishiwo kushuwa kumolo Jisu no Sabat tsalalo aghilu lakhi vechesu wuche. Pa khopemiye mzuthive, ikehu panonguno aghipe muxu pesu chuche. #Zaki 23.25 2Ikehu Farisimino ti ithulu puzu Jisu vilo ishipi, “Julo, okhopemino Sabat tsala lono hitoi shikeu hiye ni-yezah hebide anie.” 3Jisu no ishi khochile, “Kughou David ngo pa gholo chekemino mzuthive keno kiu shikeno nonguye phuju mphi kesha? #1 Samu 21.1-6 4Pano Alhou kilo ilo puzu pa eno pa gholo chekemino Alhou mllakeu sho chu, panoqo ghenguno asho tipau chunikeu Ayezah lo kuhae, ikemu achinemi likhino tipau chulunikeu shiae. #Achine 24.9 5Momu Sabat atsu-tsu achinemino achinekilo Sabat tsala kitiqeve acheni keghi panoqo shou akipimi shitsu chemo kepi nonguye ayezahlo phimla kesha? #Akiki 28.9-10 6Ino nongu vilo pini, achineki nguno akijeu kiukela hile lakhi ani. 7Kuchoyesulo, ‘Niye lhoxu heqhino mllakeu lunishi moe ikemu kimiyekeu lunishie’ ipi puakeu nonguno kuchouno ithike aye, nonguye akipimi shimokemi pevemo nicheke. #Mt 9.13; Hosi 6.6 8Kughengu ni Timi Nuye Sabat pinye shou Ampeu ke.”

A-u Kithimi lakhi

(Mk 3.1-6; Lk 6.6-11)

9Jisu no tileno chesu wuve puzu Sinagog lo ilo. 10Timi lakhi a-u thivekemi tile a. Tile akeqo gholo khamino Jisu no akumou shikeu ngukuni kehu panonguno pa vilo ishi iniju, “Sabat tsala lo shipivi kepu ayezahlo anima?” 11Jisu no khochile, “Nongu gholo timi khuuno pano bheri lakhi aghini eno tino Sabat tsalalo azulakilo ilulove aye tipau tshupesu sunhephevemoni kya? #Lk 14.5 12Timi lakhiye bheri nguno shishe amekushoe! Tishiaye, Sabat tsalalo akumla kivi shinikeu ayezahlo anie.” 13Tishi puzu pano timi vilopi, “O-u xachholo!” Timi huno pa-u xachhoe eno pa-uye tuxau hutoi vithayive. 14Ikemu Farisimiye ipeve puzu kishieno Jisu pithive nikeno kuchughu auve.

Alhou no Kishephekeu Aqeu

15Jisu no tipau chiluve puzu tipa-a lono xaidesu wuve. Timi kutomono pa papewu. Pano kusukinimi kumtsu shipivitsu, 16eno kutami vilo pa ghili pikevilopi panoqo vilo tsatsayi pive. 17Hiye Isaya tungkupuno ishi pipuakeu shikupuni kehue:

18“Julo, ino kisheluvekeu iqeu,

Ino qhuivulai chekeu, pa shou imlo kiqi acheni.

Ino pa shou iGhungu betsu nani,

Pano Ashiayeh jeliqo vilo iwu kughakutha sheshu tsu nani. #Isa 42.1-4

19Ikemu paye kutsalamo nani momu ighamukumo nani.

Paye alaghilalo asutsa-kumgha shimo nani;

20Paye sukuho puakeu yeghu suchhemo nani, momu inhemimi keu kulu pinhevetsumo nani.

Kuchou xakutha pelo theqhiluvepe moke kutolo pano sache nani;

21Eno Ashiayeh jeliqono pa lau lakujupu anani.”

Jisu eno Belzebul

(Mk 3.20-30; Lk 11.14-23)

22Tile anhethi kighichekemi lakhi tughamino pa lolo akeu ghenguno atsa piphemla keu Jisu lau saighi. Jisu no timi hu shipivivetsu ikelauye timi huno atsa piluve eno anhethino ithuluve. 23Timi kumtsuno akumzaqhiyive eno ishi pi, “Paye David Nu kekumo kesha?” 24Ikemu Farisimino ti chilu puzu ishipi, “Timi hipauno tughami haphelu akeuye tughami shou Belzebul no akuka pa tsukehuke.” #Mt 9.35; 10.25 25Panonguno kiu kumsu puzu hipau pikeno Jisu no ithi akehu panoqo vilopi, “Akukaqha lakhino pano dolo kijetha aye kushuwa kumolo hauve cheni. Aphughi momu akibo khipauno pututa shelo kijethani keno ipopinyive cheni. 26Ike Satan no Satan haphe napiaye pa likhi pa kijethave ani, tishiaye pa kukaqhaye kishi puzu puthugholuni kya? 27Nonguno pikeuno Belzebul no akuka itsukeu pesu tughami haphe cheni ke ipike, tishiaye khuno nongu papechekemiqo akuka tsupuzu tipaqo haphelu chenipe kya? Nongu papechekemiqono nongu shou kughakuthau shiauvae. 28Ikemu Alhou Ghungu lono ino tughami haphe ani, ike tiye Alhou yehkipe nongu lau ighi anie. . 29Momu timi khuno timi akumtomi lakhi kilo ilono pa nhemgha puka puwuluni kya? Atughushi timi akumtomi hu tshupe qhive paghi masae, tishianguno pano pa kilo puka puwulu nanie.

30“Khunono igholo kumo keno ighumie, eno khuno ipelo hekutsu pemo keno paye kutholeve anie. #Mk 9.40 31Tighenguno ino nongu vilo pini, timino axine shikeu eno alhoksa piqhikeu kiu kiu namu pevetsulu nani; ikemu Aghungu Kimthe shou thaigha keu pikeuye pevetsumla nani. 32Khualano ni Timi Nu shou kiuala pipuaghimu ti pevetsulu nani, ikemu khunono Aghungu Kimthe shou kiuala pini keno itehina itowu namu pevetsumla nani.” #Lk 12.10

Asubo eno Tipau xathi

(Lk 6.43-45)

33“Asubo akivi kughulhono tipa xathi akivi pithi lupelo, tikumoaye asubo alhoksa kughulho puzu tipa xathi alhoksa pithi peniae; kughengu asuboye tipaxathi pithi keuno ithive cheni. #Mt 7.20; Lk 6.44 34Nongu apighi lojiqo| Nonguye alhoksake kishi puzu akivi piqhilunikya? Kughengu amlolo kiu kupukunoshi ani keno tipau akichino piphe cheni. #Mt 3.7; 23.33; 15.18; Lk 3.7; 6.45 35Timi kivimino pawu akivi pekutsupuakeu alono akivi ikhiphe cheni, eno timi lhoksamino pawu alhoksa pekutsu puakeu-a lono alhoksa ikhiphe chenie.

36“Ino nongu vilo hi pini, kughakutha tsalalo timi lakhikhino pano kutokupuyimono piqhivekeu tsa kumtsu kihikulayi tsumasa nani. 37Kughengu otsa piqhikeu pesu oshou kughathabe puzu okughape achipiu shipe kepu shina momu okughape akuqu- u shipekepu shinamu titoi shitsu nani.”

Amchipu lakhi Khukeu

(Mk 8.11-12; Lk 11.29-32)

38Tileno Ayezah kutsuchekemi ngo Farisimino pa vilo pi, “Ninguye opelo amchipu lakhi shipesu nipiye penishi ani.” #Mt 16.1; Mk 8.11; Lk 11.16 39Ikemu Jisu no ishi khochile, “Hipa tiqhelimiye alhoksa eno Alhou phimokeqo kehu amchipu likhi phu acheni; ikemu Jona tungkupu pesu amchi shipiyevekeu thono amchipu kutauye tsumo nani. #Mt 16.4; Mk 8.12 40Jona no pucho tsala kuthu putho tsala kuthu akha kije polo ngoke hutoi Timi Nu ghi pucho tsala kuthu putho tsala kuthu ayeghi qhou ngo nani. #Jona 3.5 41Kughakutha tsalalo Nineve ghamino puthugho puzu hipa tiqhelimi ngukuno kideqhive nani, kughengu Jona no asheshu ighikelo panonguye Alhou lau amlo xaide ighike; eno jukutolo, Jona nguno akijeu kiuala hilehi anike! 42Kughakutha tsalalo Apeu Akukaliuno puthugho puzu hipa tiqhelimi ngukuno kideqhive nani. Kughengu lino Solomonw alokutsu ininiaye ayeghi halau lono izu-susu ighi; eno jukutolo, Solomon nguno akijeu kiuala hilehi anike!” #1 Kuka 10.1-10; 2 Yeki 9.12

Tughakusano Xachileighi

(Lk 11.24-26)

43“Kughou tughakusano timi launo ipeve puzu wuveni keno, tino akulhoqhiniye qhayike chhighalo itsu-susu a-a lakhi phu cheni. Tsala tino a-a phumlave aye, 44tino ishi picheni, ‘Ino qhivekeu kilo niye idewojuni.’ Kughou tino ide-ighi keno, aki huye abo kumsa eno khukide kudayi puzu thwokha hekutsukiyipe puaghikeu ithulu. 45Tileno tipauno wupuzu pa nongu alhoksau aghahwu tsuni saighi puzu iloghino tile ngove. Timi tipau lhoye atughulo nguno ashekha launo alhoksau shikitheve. Tihutoi lhokusakugha tiqhelimi hipaqo lau tishitsu nani.”

Jisu Paza eno Pa thikuzumi

(Mk 3.31-35; Lk 8.19-21)

46Jisu no timiqo putsa aphilono pa za ngo pa thikuzumi ighi puzu khalacheu puthughono pa putsani kepi inijua. 47Ikehu timi lakhino Jisu vilo ishipi, “Oza ngo othikuzumiye khalau puthugho anike julo, panonguye oputsa nike iniju ani” 48Tile Jisu no pa vilo pikeu vilo ishi khochile, “Izaye khuu kya? Ithikuzumiye khunoqo kya?” 49Pano a-u chhopuwo pa khopemi kiche puzu ishipi, “Iza ngo ithikuzumiqo hi anike julo! 50Kughengu timi khuuno iPuh kungughalo akeu ghoapulou shini keno tipaqono ithikuzumi, ichelimi eno izake.”

Currently Selected:

MATHI 12: SUMIBSI

Highlight

Copy