MATHI 11

Johan Baptist no Aghinimi Puwu

(Lk 7.18-35)

1Jisu no pa khopemi chighi kini vilo hipaqo pitave puzu paye tipa- a lono wuveno tipa sukumxalo taun akeqolo kutsu eno atsakiviu pesu asheshu nike wuve.

2Ikelo, Johan Baptist ye akughukilo akelono Khristo no mlakeqo ghili chilu puzu pa khopemi khami puwu no 3ishi inijuwupe, “Milakhi ighiniepi chekeuhu no keo, ikeo ninguye kutamiu laju alopi kya?” 4Tile Jisu no ishi khochile,”Wu puzu Johan vilo nonguno kiu chilu eno kiu ithulu keno pilo: 5anhethi kighichemino ithulu ani, apukhu kighichemino ala chelu ani, apugha kupumi shikimithevetsu ani, akini kughupomino chilu ani, kithimi xuputhuvetsu ani eno kumlhomi vilo lokivipu sutsa pikulhavetsu ani. 6Ijupesu lipi vemo kemi kumghae!”

7Johan khopemino wuchekelo Jisu no timi aqokitikhi vilo Johan ghili pesu ishi pithuve: “Nonguye timi kughunamokeu alo kiu juniye wu kya? Amlhuno ayeghu fukinikeu juwu kesha? 8Timi lakhino muduniyikeu phimini pepuaghikeu juniye kesha? Julepi, muduniyikeu phimini ukemiye kukami kilo achenike! 9Tishima-aye nonguye kiu juniye wu kya? Alhou wu tungkupu lakhi juniye wu kesha? Tishiputsa| Ino nongu vilo pini, Alhou wu tungkupu nguno alau lakhi nonguno ithulupuani! 10Kuchoyesulo Johan ghenguno ishi pipuani, ‘Julo, ino ighinikishiu azuuno puwu ani, pano azuuno alaghi kutope qhitsu nani.’ #Mala 3.1 11Kuchouno ino nongu vilo pini, totimino punuke gholo timi khumu Johan Baptist qhemi kije ipeghi mphi, ikeghi Kungugha yehkipe qholoye kumtsu nguno akitilauno panguno akijeue. 12Johan Baptist tsala lono ishi kutolo kungugha yehkipe le ighi ani kemu aminhimino angkano suxaluve ani. 13Kughengu Alhou wu tungkupmi kumtsu eno Muse no sughikeu yezah no Johan ighike kutolo hipau yehkipe vehu picheke; #Lk 16.16 14eno nonguno tipanoqo sutsa ikhikulupushi pulo aghi aye, Johan ye Elija ighiniepi chekeu huke, #Mala 4.5; Mt 17.10-13; Mk 9.11-13 15Tishiaye, khunono ininishi ani keno pa pelo ini pelo!

16“Itehi niye kiu pesu hipa tiqhelimi sasu kimighipiyeni kya? Hipa tiqhelimiye itimino alhikishialo ghavashi akeqo toike. Aqo lakhino aqo lakhiu vilo ishi igha pi, 17‘Nino nongu ghenguno kulakupule alebo pesu pheke, ikemu nonguno ilhe moe! Ninguno akumo qhokelole pheke, ikemu nonguno qah moe!’ 18Kughengu Johan no ighi puzu kumvu che eno paye aji shomoe, ikelo timiqono ishi pi, ‘Pa philo tughami anie!’ 19Timi Nu huno ighi puzu chukeghi chu eno shokeghi shoe, ikelo timiqono ishi pi, ‘Julepi, paye akimihemi eno ajikumxomi lakhi, eno paye asuqha kuqhami ngo haphevekeqo kusaue!’ Ikemu Alhou lokutsuye kuchou kepi tipau kumlano piyeke.”

Pulumokeu Phughiqo

(Lk 10.13-15)

20Tile Jisu no aphughi khipaqolo pano akuka kumzapu mlakeno tipaqo lomi pithue, kughengu timiqo no pano xine lono xaideghimoe. 21“Khorazin, oghenguno ahasapu anie! Bethsaida, oghenguno ahasapu anie! Kughengu nongu gholo akumzapu kumla shikeu hu Tur ngo Sidon lo shitsuke aye, panonguye khaghino yeqhiye phi pepu eno ayevu pesu aphi nupu puzu panongu mlo Alhou lau xaideghivekeu piyeve aghini cheke! #Isa 23.1-18; Ezek 26.1—28.26; Joyil; Amus 1.9-10; Zekha 9.2-4 22Ino nongu vilo pini, kughakutha tsala lo panongu lau nguno alau Tur ngo Sidon kuma lau Alhou no kimiyeqiyi keu ananie. 23Kapernaum, noye atsutsu kutolo olikhi osuqhenishi ani kesha? Noye ami pesu aghime tsukeu-alo vesuve nani. Kughengu akumzapu kumla ogholo shikeu hu Sodom lo shike aye, tiye ishi kutolo aghini cheke! #Isa 14.13-15 24Ino nongu vilo pini, kughakutha tsalalo nongu lau nguno alau Sodom lau Alhou no kimiyeqhiyikeu ananie!” #Mt 10.15; Lk 10.12

Ilau ighi no Akulho Qhilo

(Lk 10.21-22)

25Tipau tuqhulo Jisu no ishi pi, “O Apuo, kungugha eno ayeghi shou Ampeu, ino oshikimthi ani, kughengu nono alokutsumi eno ithikuthuluve kemi launo hipaqo vehu kusupe qhive eno kumthami lau pephepiyeke. #Jn 3.35; 1.18; 10.15 26Iye, Apuo, kughengu hiye ogho opulou shikeuke.

27“Ipuh no thwokha kumtsu itsuvae. Apuh likhino kumoaye khuu nomu Anu mthae eno Anu likhino kumoaye khuu nomu Apuh mthae, eno Anu no khunoqo pelo Apuh ithipe nike pephepiye nikeno tipaqono kumoaye khuunomu Apuh mthae.

28“Nongu akhokimshi xapu lhovekemiqo kumtsu ilau ighilo, ino nongu kulho qhitsu nike. 29Iwu kuwokhasu ikhilu no ti pepulo eno ilauno shikalulo, kughengu niye amlo kumtsha kughuvumi eno aqhokighemike; eno nonguye akulhokiqi phulu nani. #Jere 6.16 30Kuwokhasu ino nongu tsuniye akeu huye pepukivike eno amakho ino nongu pipeniye akeu huye muthutheyike.”

Currently Selected:

MATHI 11: SUMIBSI

Highlight

Copy