MATHI 10

Apostolmi Chighikini

(Mk 3.13-19; Lk 6.12-16)

1Jisu no pa khopemi chighikini kulu puzu panongu pelo tughakusa haphelu, kusukini jeli eno tomo-chhimo keu kusu jeli shipivilu pe nike pano akuka pesu panoqo tsu. 2Apostolmi pano chighikini jeye hipaqo: atughushi Simon, paje pesu Pitor ipi kuvetsu, eno pa thikuzuu Andrew; Zebedi nu Jems ngo pa thikuzuu Johan pama; 3Filip ngo Bartholomew; Thoma ngo asuqhakuqhau Mathi; Alfaius nu Jems ngo Thadaius; 4Simon aza yeghi kimiyekiniu ngo Jisu kughaluvepe nike atheshi keu Judas Iskariot ishie.

Chighikini Kumlapusaje

(Mk 6.7-13; Lk 9.1-6)

5Jisu no hipano chighikini vilo tsaquyi piputo puzu puwue, “Ashiayeh kutami ghakhulo wu kevilo momu Samariami taunlo ilo kevilo, 6ikemu Israilmi gholo puhavekeu bheriqo lau wulo. 7Nonguno wuchekelo ishi asheshu pilo, ‘Kungugha yehkipeye kupunu ighivae.’ 8Kusukini shipivilo, kithimi xuputhulo, apughami shikimthe tsulo, tughami haphetsulo. Ame kiumu tsumono nonguno ithulue, ikehu ame lumono tsulo. 9Shuna mu tsandiyi mu eno ayikuhuno shikeu pisamu nongu phimini pucholo puwu kevilo. 10Nongu ghuzulalo timi vilo khusupu kepu jolabo pu kevilo, aphikuzu kini pu kevilo, apukhu kuqho momu akusu pe kevilo, kughengu akumlami lakhiye pano kiu avehupu shi aghi nikeno pa tsukepue. #1 Kori 9.14; 1 Timo 5.18

11“Nonguno khuno ghami phulo momu taunlo iloni keno, tilehi khuno no nongu ikhilu nishi aghi nikeno phujulo eno tipa-a phemoke kutolo nonguye pa gholo ngolo. 12Kughou nonguno akilo iloni keno, ‘Alokughuno ogholo apeniu’ ipi pilo. 13Aki tipaulo akemino nongu ikhilu nishi aghi aye, nonguno alokughuno tsa pikeu tipaulo apelo; ikemu panonguno nongu ikhilu nishimo aye, nongu lokughunotsa hu ikhichile luvelo. 14Khunono nongu ikhilumo nikeno momu nongu tsa initsumo nikeno, nonguye tipa phu momu tipa taun qhiveno wu chekelo nongu pukhulo ayeghi mukhu kukhu qhivelo. #Aposto 13.15 15Kuchouno ino nongu vilo pini, kughakutha tsalalo Alhou ye tipano ghami nguno alau Sodom ngo Gomora shou kimiyeqhiyi keu akijeu shi nani| #Mt 11.24; Bothu 19.24-28

Shikimighi Ighiniye akeu

(Mk 13.9-13; Lk 21.12-17)

16“Julo! Ino nongu pelo bherino atine gholo ilolu aketoi puwu ani. Nonguye apighi toi tsukhuyi shimasae eno amqhi toi ivunheyi masae. #Lk 10.3 17Timiqo jukutokupuyi alo, kughengu panonguno nongu sasu kughakutha-alo sawu nani eno panonguno Sinagog lono nongu ghaqhi nani. 18Ighenguno ayehkipemi eno kukami zulo nongu sunhe sawu nani, tilano panoqo vilo eno Ashiayeh kutamiqo vilo atsakiviu shepe shipeni kehue. 19Kughou panonguno nongu sasu atsakukughalo wunikeno, nonguye kishi pinikela momu kiu pinikela pi amlo-thoghu thoghu kevilo, kughengu nonguno kiu pikepu kela tipa tuqhudo lono nongu tsu nani. 20Kughengu nonguno atsa kiu pini keno tiye nonguno kekumoe, ikemu nongu paPuh Ghungu no nongu vechewo pi nani.

21“Athikuzumino athikuzumi kughapesu pithive peniaye tsuve nani, eno apuhno pa tianuli shou tipaphi shive nani; anuliqono apuaza shou akumou shi ithughive nani eno panoqo pithivepe nani. 22Ije ghenguno timi kumtsuno nongu mithi nani. Ikemu timi khunono ashekha kutolo kutu-u khealu nikeno tipano xalu nani. #Mt 24.9,13; Mk 13.13; Lk 21.17 23Kughou timino taun lakhi lono nongu shikimighiqhini keno kutau lakhilo koha povelo. Kuchouno ino nongu vilo pini, nonguno Israil lo taun kumtsulo wukhamla aphi lono Timi Nu ye ighive nani.

24“Kiphimi khumu paw shikukau nguno akijeu kumoe momu aquaxemi khumu pa mipeu nguno akijeu kumoe. #Lk 6.40; Jn 13.16; 15.20 25Kiphimi huye pawu shikukau paphi shilukeuye lumkhae eno aquaxemino pa mipeu paphi shilu keuye lukumkhae. Tsala timino akibo lakhi mipeu vilo thotsu Belzebul ku tsu aye, tinguno alau aje kusa nongu tsu nani! #Mt 9.34; 12.24; Mk 3.22; Lk 11.15

Khuu Musakepu kya?

(Lk 12.2-7)

26“Tishiaye, timi msakepu kuhae, kughengu pephe piyevemo nikeu kiumu nhape puamoe. #Mk 4.22; Lk 8.17 27Ino nongu vilo akuzu lono kiu pi keno nonguye akuvu lono ti piwulo; eno nonguno tuqhouno kiu chilukeno aki-kutsuqa lono asheshulo. 28Angulho pithive tsumla kepushi aye tathono, aphimpi pithivetsukulumiye msa kevilo; ikemu Alhou no aphimpi eno angulho kinikujo Alhomi yizu lono pithive tsulu nanike pa msalo. 29Tughachoqhi kiniye pisa lakhi lono jecheni, ikeghi tipaqo lakhimu nongu paPuh no pulosutsumo keloye ayeghi shou iluqivepe chemoe. 30Ikemu nongu ghenguye nongu kutsusa kutolo kumtsu kihipe puani. 31Tighenguno nonguye msa kevilo, tughachoqhi kumzapu nguno nonguno amekushoue!

Kutami zulo Khristo Piphetsu

(Lk 12.8-9)

32“Tishiaye, khunono timi zulo paye igholomike ipi nikeno, nighi iPuh kungughalo akeu zulono tipaphi shi pitsu nani. 33Ikemu khunono timiqo zulo paye imthae pini keno, nighi iPuh kungughalo akeu zulono niye mtha pi nani. #2 Timo 2.12

Alakishi kumo ikemu Azuta

(Lk 12.51-53; 14.26-27)

34“Niye ayeghilo alakishi sughitsu niye ighi kughashi kumsu kevilo. Niye alakishi kumo puzu azuta sughi nike ighie. 35Ino ighikeuye anu pelo pa puh sasu kidimo, anga pelo pa za sasu kidimo, amukishiu pelo pa ni sasu kidimo ishi peniyeke. 36Timi lakhi ghumi kuchouye pa likhi pano kibolomino shi nani. #Mika 7.6

37“Timi khunono iqhukeu nguno alaushi apuh eno aza kimiye nikeno paye ikhopemi shikuzu kumoe; eno timi khunono iqhukeu nguno alaushi pano nu eno pano nga kimiye nikeno paye ikhopemi shikuzu kumoe. 38Timi khuno pawu kros ikhilumo puzu ipape nikeno paye ikhopemi shikuzu kumoe.” #Mt 16.24; Mk 8.34; Lk 9.23 39Timi khuno pa kuxu pukhani keno ti puhave nani, ikemu khunono ighenguno pakuxu puhavekepu shini keno ti pukhalu nanie. #Mt 16.25; Mk 8.35; Lk 9.24; 17.33; Jn 12.25

Asaxu

(Mk 9.41)

40“Timi khuno nongu ikhilu nikeno ni ikhilu ani, khuno ni ikhiluni keno ipuwu akeu ikhilu ani. #Mk 9.37; Lk 9.48; 10.16; Jn 13.20; 11.5; Isa 35.5-6; 61.1 41Khunono Alhou wu tungkupmi lakhiye Alhou wu tungkupu ke ghenguno pa ikhilu nikeno tungkupmi saxu ithulu nani; eno akivi kumlami lakhiye akumla kivi shichekemi ke ghenguno pa ikhiluno akivi kumlami saxu ithulu nani. 42Ino nongu vilo pini, ikhopemi gholo akutulau shi anamu paye ikhopemi keke ipi puzu khuno azukumko ajukhu lakhimu yekepu tsuni keno mtsuqheyino pa saxuye khilemu puhavemo nani.”

Currently Selected:

MATHI 10: SUMIBSI

Highlight

Copy