JOHAN 21

Akhopemi Tsuni lau Ipeghi

1Hipathiu, Jisu no itaghi Tiberia zughi lono pa khopemi lau pa ampino ipeghipiye. Pano hitoi shi-ghi panongu lau ipeghipiye. 2Simon Pitor ngo Thoma (ti Diduma ipichekeu), Galil lo Kana phu lono ighikeu Nathaniel, Zebedi nu pama eno akhopemi kutami kini ishi panongu kumqo ake. 3Simon Pitor no kutami vilo pi, “Niye akha khauni cheni.” Kutamiqo ghi pa vilo pi, “Ningu ghi ogholo wunie.” Ike panonguno wuve puzu ashuka lakhilo ilo ikemu tipaji kupuju panonguye kiumu khamlae. #Lk 5.5 4Tsutho ipeghive kelo Jisu ye azughi mukulo puthugho-a, ikemu akhopemiqoye tiye Jisu kepi mtha. 5Jisu no panoqo vilo pi, “Apumiqo, nonguye akha khalu kema?” “Kumu khamlae” ipi panonguno khochile. 6Tileno pano panoqo vilo pi, “Ashuka jibo ajeu nongu khame vesulo, tishiaye nonguno hami khalu nanike.” Ike panonguno akhame vesuju ikelo akha kumzapu veluve kehu panonguye akhame sunhekiche mlave. 7Jisu no kimiyechekeu akhopeuno Pitor vilo pi, “Hiye Ampeu ke!” Kughou Simon Pitor no “Hiye Ampeu ke!” ipikeu chilu keno pano pa ku-uphi uluve, kughengu paye tipau xaveno ake, eno azulo ika ilove. 8Akhopemi kutamiqoye akhamelo akha kumzapu sunhe sasu ashuka lono amukulo ighi, kughengu panonguye amuku lono kushuwalo kumo puzu aunhekipishe 200 tohiloake. 9Kughou panonguno amukulo ipeghi keno tilehi amiyino ami shikeu shou akha pughape puaghikeu eno asho ishi panonguno ithulu. 10Jisu no panoqo vilo pi, “Nonguno itehi khasughikeu kha hami sughilo.” 11Simon Pitor no ashukalo ilo puzu akhamelo akha kije-je kumzapushi amukulo sunhephe. Tilehi akha 153 aghi, ike tije-jehi keghi akhame suxuvemoe. 12Jisu no panoqo vilo pi, “Ighi puzu chulo.” Akhopemi gholo milakhimu pa vilo, “Noye khuu kya?” ipi inijunikeu ighuve, kughengu paye Ampeu kepi panonguno ithiveke. 13Ike Jisu no ighi puzu asho ikhipe panoqo tsu eno tihutoi akha ghi pesu tsu. 14Jisu akithi lono xuputhuve kethiu pa ampino akhopemiqo lau ipeghipiye keu hipaupha akuthuuke.

Jisu eno Pitor

15Panonguno chuve kethiu, Jisu no Simon Pitor vilopi, “Johan nu Simon, noye hipaqo kumtsu nguno alau shi iqhu-ivu cheni ma?” “Iye, Ampeu, ino okimiyechekeu nono ithi anie” ipi pano khochile. Jisu no pa vilo pi, “Iwu bheritiqo jukide kudayilo.” 16Jisu no ghuthu akiniu pa vilo pi, “Johan nu Simon, noye iqhuivu cheni ma?” “Iye, Ampeu, ino okimiye chekeu nono ithi anie” ipi pano khochile. Jisu no pa vilo pi, “Iwu bheriqo jukide kudayilo.” 17Jisu no ghuthu akuthuu pa vilo pi. “Johan nu Simon, noye ikimiye cheni ma?” Pitor ye amlo shimove kughengu Jisu no pa vilo ghuthu akuthuu “Noye ikimiye cheni ma?” ipi iniju kehu. Pano Jisu vilo pi. “Ampeu, nono thwokha ithi ani, eno ino okimiyechekeu nono ithi anie!” Jisu no pa vilo pi, “Iwu bheriqo jukide kudayilo. 18Kuchouno ino ovilo pini, kughou nono apumi shichekeno olikhi ophi chighiche khapuche eno nono khilehi puloni keno tilehi wuche; ikemu kughou nono muchomi shiveni keno, noye o-u chhope ngo puzu kutamino chighiche okhapipe nani, eno nono khile pulomo keno tilehi oxapuwu nani.” 19(Jisu no hipau pikeuye Pitor ye kiu gholauno thi puzu Alhou jukuvupu saghi nani kela pitsu ake.) Tipathiu Jisu no pa vilo pi, “Ipapelo.”

Jisu ngo Akhopeu hu

20Pitor no ideighi kelo, Jisu no kimiyechekeu akhopeu hu,pa thiu pama pape cheghikeu ithulu. Akhopeu hipauye ilhu akelo Jisu mumupe ngo puzu, “Ampeu, khuuno okughape atheshini cheni kya?” ipi inijukeu huke. 21Kughou Pitor no akhopeu hu ithulu keno, pano Jisu vilo pi, “Ampeu, timi hipauye kishi nani kya?” 22Jisu no pa khochile, “Ino ighimoke kutolo ino pa pelo xuaghi penishi aye noye kiu shilopi kepu ani kya? Noye ipapelo!” 23Ikelaye Jisu papechekemi gholono akhopeu tipauye thinichemoe ipikeu tsa kugha wove. Ikemu akhopeu tipauye thimo kepi Jisu ye pimoe; ikemu Jisu ye ishi pike, “Ino ighimoke kutolo ino pa pelo xuaghi penishi aye, noye kiu shilopikepu ani kya?”

24Akhopeu tipauno hipaqo thime kumtsu shepe shitsu ani, eno tipauno hipaqo kumtsu yepe qhitsu ani; eno pano ashepe kiu shitsu keno tiye kuchou kepi ninguno ithi ani.

Kishekhavekeu

25Ikemu Jisu no shikeu thime kutau kutomo aphie. Tipaqo kumtsu lakhi khino yehpe qhini keloye, ino kumsu jukelo ayeghiqha kuchopu mu tipaqo yepe qhikeu kakuqo qhikhaluni chemoe.

Currently Selected:

JOHAN 21: SUMIBSI

Highlight

Copy