JOHAN 20

Jisu Xuchilethughive

(Mt 28.1-8; Mk 16.1-8; Lk 24.1-12)

1Tughakhani inaqhe zumoyi aphilo Magdala noghami Maria no akumo- kilo ighi kelo akumo-ki kichilo atuqu ake tipau tukulove aghikeu lino ithulu. 2Lino posu Simon Pitor ngo Jisu no kimiyechekeu akhopeu pama lau ighi eno pama vilo pi, “Panonguno akumo-ki lono Ampeu pewuvae, eno panonguno pa pewo khile qhivea kela ninguye mthae.” 3Tileno Pitor no akhopeu lakhiu hu sasu akumoki kudau wuve. 4Pamaye posu wuke, ikemu akhopeu lakhiu huno Pitor zuthave eno pano atughushi akumo-ki tolu. 5Pano pishipulo jukelo, tilehi aphikumtsha xachhopuakeu ithulu, ikemu paye alou ilomoe. 6Tile Simon Pitor no ighi puzu vejoi akumoki alou ilove. Pano tilehi aphikumtsha xachhopuaghikeu ngo 7Jisu kutsu nhakeu phi ishi ithulu. Nhakeu phi tipauye aphi kumtsha gholo xachhomo puzu tipau kutashi likuzu puaghi. 8Tileno akhopeu lakhiu, pano atughushi tokeu hughi alou ilo eno pano ti ithulu puzu puluve. 9Kughengu Jisu ye akithi lono xuputhuve nikeu kuchoyesulo pipuakeu panonguye tikutolo mthano ae. 10Tithiu akhopemiye akilo idewokhave.

Jisu no Magdala noghami Maria lau Ipeghipiye

(Mt 28.9-10; Mk 16.9-11)

11Ikemu Maria ye akumoki khalacheu puthughope qa-ae eno lino qa-ghi akumokilo pishipulo ju, 12ikelauye kungumi kini metsughoyikeu phimini pepu puzu Jisu sukumo qhikeu-alo lakhino akutsu kudau eno lakhino apukhu kudau iqa aghikeu ithulu. 13Pamano li vilo pi, “Totimi, noye kushiye qa ani kya?” Lino khochile, “Kughengu panonguno iMpeu pewuve ake, eno panonguno khilehi pa pewo qhive keno niye mthavae!” 14Tishi pive puzu lino igho ighi kelo Jisu no tilehi puthugho aghikeu ithulu, ikemu tiye Jisu kepi liye mthano ae. 15Jisu no li vilo pi, “Totimi, noye kushiye qa ani kya? Noye khuu phucheni kya?” Tipauye aghutu kumlau kughashive puzu lino pa vilo pi, “Akijeu, nono pa pewuve aghi aye, noye khilehi pa pewo puani keno ivilo pitsulo, ino wupuzu pa pewuvenike.” 16Jisu no li vilo, “Maria!” ipikelo lino pa lau igho-ighi puzu Ibrimi tsauno ishipi, “Rabboni!” (Hipau kiqiye “Kutsuchekeu.”) 17Ikelo Jisu no li vilo pi, “Isasu kiphemla kevilo, kughengu niye Apu lau ideiku mphike. Ikemu ithikuzumiqo lau wulo eno panoqo vilo itsa pitsulo: ‘Niye iPuh eno nongu paPuh lau eno ILhou eno nongu Lhou lau ideiku cheni.’ ” 18Magdala noghami Maria no wuno akhopemiqo vilo, “Niye Ampeu ithuluvae eno pano hipaqo ivilo pike,” ipi panongu vilo pi.

Jisu no Pa khopemi lau Ipeghi

(Mt 28.16-20; Mk 16.14-18; Lk 24.36-49)

19Tipatsala, tughakhani avelau akhopemiqoye Judami musake launo aki khathaveno sholokuu kumqo ae. Tile Jisu no ighino panongu gholo puthughope ngono ishipi, “Alokughuno nongu gholo apelo.” 20Pano hipatsa pive puzu pa-u ngo pa jibo ishi panoqo piye. Ampeu ithulu kelo akhopemiqoye shishe alokivishive. 21Jisu no itaghi panongu vilo pi, “Alokughuno nongu gholo apelo. Apu no ipuwuke toi nighi nongu puwu ani.” 22Pano hipau pive puzu panoqo shou atuthushepukuno pi, “Aghungu Kimthe sasu lulo. 23Nonguno khuno kipimi pevetsu akeno panoqo launo tipau pevetsu ake; eno nonguno khuno kipimi pevetsumo keno panoqo launo tipau pevetsumo ke.” #Mt 16.19; 18.18

Jisu eno Thoma

24Akhopemi chighikini gholo Thoma, tipau pesu Diduma ipichekeu huye Jisu ighi kelo paye panoqo gholo kuhake. 25Ike akhopemi kutamino pa vilo, “Ninguye Ampeu ithuluvae!” ipi. Ikemu Thoma no panongu vilo pi, “Ino pa-ulo ayishu zaku ithulumoke kutolo eno i-u loti pesu ayishu yesuke alo suju eno pa jibolo suju moke kutolo niye pulumoe.”

26Atsala tache thiu pa khopemiqoye itaghi aki sholokuu kumqope ae, eno Thoma ghi panoqo gholo ae. Ahukikha ye khapepua, ikemu Jisu no iloghi puzu panongu gholo puthughope ngono pi, “Alokughuno nongu gholo alo!” 27Tishieno pano Thoma vilo pi, “O-u loti hile suju eno i-u julo; tishi puzu o-u chhopheno ijibolo sujulo. Omlo lipi kevilo ikemu pulululo!” 28Thoma no pa vilo pi, “IMpeu eno iLhou!” 29Jisu no pa vilo pi, “Noye ni ithuluve ake ghenguno pululu anikesha? Khunoqono ni ithumla pimu puluni keno tipaqo lokivipue!”

Kaku Hipau Yekeu Kimiji

30Jisu no pa khopemi nhekithe lono akumzapu kumla kutau kutomo shikeu kaku hipaulo yesu khape puamoe. 31Ikemu hile yesupe puakeuye nongu pelo Jisu ye Mesiya, Alhou Nu kepi pululu peniyeke eno tipau kupulu vechewo paje lono akuxupu alupeniyeke.

Currently Selected:

JOHAN 20: SUMIBSI

Highlight

Copy