JOHAN 17

Jisu no Pa khopemi ghengu Inikhu

1Jisu no hipaqo pitave kethiu pa gi peqhepe kungughalo juno pi, “Apuo, atuqhudo hu ighivae, oNu jepipi tsulo tishianguno Anu pelo ojepipi tsupenike. 2Kughengu nono khunoqo pesu pa tsukeno tipanoqo lau lhokta kuxu tsupeni kehu lhoxu kumtsu shou nono akuka pa tsuvae. 3Lhokta kuxuye hike; olikhino kuchou Lhou kepi panonguno ithikeu eno nono puwukeu Jisu Khristo ithikeu ke. 4Nono puwukeu kumla shikupu keuno ayeghilo ino okimthe jukuvu piyeke. 5Apuo! ayeghiqha lhophe mphilo ino ogholo achekeu jekipi hu pesu itehino ogholono ijepipi tsulo.

6“Ayeghilomi gholono nono khunoqo ikhiphe pesu itsu keno tipanoqomi lau ino oje pephe piyevae. Panonguye owu ake, eno nono panongu itsuke, eno panonguye otsa peluvae. 7Nono thwokha itsukeu olauno ighikepi itehiye panonguno ithi ani. 8Kughengu nono atsa khipaqo itsu keno ino panoqo tsuvae, eno panonguye tipaqo ikhiluvae; kuchouno niye olauno ighi kepi panonguno ithi ani eno nono ipuwu kepi panonguno pululuvae. 9Niye panoqo ghenguno inikhu ani; niye ayeghiqha ghenguno inikhu anike kumono nono itsuvekemiqo ghenguno inikhu ani, kughengu panonguye owu ake. 10Iwu kumtsu owuke eno owu kumtsu iwuke, eno panoqo vechewo ijekipi shilue. 11Itehi niye ayeghilo ngomoake, eno niye olau cheake, ikemu panonguye ayeghiqhalo ani. Apu Akimtheu, oje kuka ti nono itsukeuje pesu panoqo khe tsulo, tishianguno nikujono lakhi shiake toi panongu ghi lakhi shi penike. 12Ino panoqo gholo akeloye oje kuka pesu panoqo khepe qhicheke. Ino panoqo susho cheke eno kuchoyesu kupunike ghenguno ti puhave nikeushi akeu timi lakhi thono panoqo gholo lakhimu puhatsumoe. #Leshe 41.9; Jn 13.18 13Itehi niye olau chea, eno ayeghilo akelo ino hipaqo tsa piakeuye panongu pelo panoqo mlolo ilokivi kupu alupeni kehuke. 14Ino otsa panoqo tsuke eno ayeghi laumino panoqo mithi, kughengu ino ayeghi laumi kumo kehu toi panonguye ayeghi laumi kumoe. 15Niye ovilo ayeghiqha lono panoqo ikhipewuve tsulo pi inikhu amoe, ikemu Alhoksau launo nono panoqo khetsulopi ani. 16Ino ayeghi laumi kumo kehu toi panonguye ayeghi laumi kumoe. 17Kuchou pesu panoqo ikhiphepe ow shilulo, otsaye kuchou ke. 18Nono ayeghiqhalo ipuwu kehu toi nighi ayeghiqhalo panoqo puwuvae. 19Panoqo ghenguno ino ni ikhiphepe otsu ani, tishianguno panongu ghi kuchouno panongu ikhiphepe owu shipenike.

20“Niye hipaqo ghengu likhi inikhu anike kumoe ikemu panongu tsa vechewo khunoqono ipuluni keno tipaqo ghengu ghi inikhu ani; 21tishianguno panongu kumtsu lakhi shipenike. Apuo, nono ilolo aketoi eno ino ololo aketoi panongu ghi nigholo apeni, tishianguno nono ipuwukeu ayeghiqhano pulu penike. 22Nono akimthe-jekipi khikhi itsu keno, ino panoqo tsue, tishianguno nikujono lakhi shi ake toi panonguye lakhi shipenike; 23ino panongu lolo akeu eno nono ilolo akeuno kupukulu shike kutolo panonguye lakhi shi apenike, tishianguno nono ipuwu kepi ayeghiqha pelo ithi peni eno nono ikimiye kehutoi panoqo kimiye akeu ithipenike. 24Apuo! niye nono khunoqomi itsuve akeno tipaqo pelo niye khile ani keno igholo apenikeu ipulou ani, eno ayeghiqha lhophemphi lono nono ikimiye puzu akimthe jekipi itsukeu panongu pelo ikimthe jekipi ithulupeni shi ani. 25Apu Amikuchou! ayeghiqhaye omtha ikemu niye no ithi ani, eno nono ipuwukepi hipaqono ithi ani. 26Ino panoqo pelo oje ithiveape eno ino ti ithiape nani, tishianguno nono kishi ikimiye keno tipau kikimiye panoqo lolo apeni, eno niye panoqo lolo apenike.”

Currently Selected:

JOHAN 17: SUMIBSI

Highlight

Copy