JOHAN 18

Jisu Kughakulu

1Jisu no atsa hipaqo pivekethiu paye pa khopemi sasu cheve eno Kidron ghokiti kathasu wuve. Tilehi aghutu lakhi ake Jisu no pa khopemi sasu tilau ilo. 2Jisu kughapesu atheshivekeu Judas ghi tipa-a ithiae, kughengu Jisu no pa khopemi sasu ghuthu kutomo tileno kuhoche. 3Ike Judas ye achinetomi eno Farisimi, ghushimi eno achineki khemi puwukeqo ishi sasu aghutulo ighi. Panoqoye azuta, angu, amizukulu eno akuluqhe ishi peche. 4Tilehi Jisu ye pa shou kiu shi nani keno thwokha ithi akehu pano azuu chesu ighi eno panoqo vilo pi, “Nonguye khuu phucheni kya?” 5Panonguno, “Nazaret noghami Jisu phuchenike,” ipi khochile kelo, pano pi, “Tihu nike.” Jisu kughape atheshivekeu Judas ye panoqo sasu kumtsa puthugho ae. 6Jisu no panoqo vilo, “Tihu nike,” ipi kelo panonguye shothi athiu idewove eno ayeghilo iluqive. 7Itaghi Jisu no panoqo iniju, “Nonguye khuu phucheni kya?” Panonguno pi, “Nazaret noghami Jisu phuchenike.” 8Tileno Jisu no pi, “Tihu nike ipi ino nongu vilo pivae. Tishiaye nonguno iphucheni aye, timi hipaqo pelo wuvepelo.” 9Jisu no hipau pikeuye pano ishi piqhipuakeu shikupuni kehuke: “Apuo, nono itsuvekemiqo lakhimu puhatsumoe.” 10Tilehi Simon Pitor ye azutakihi lakhi pecheke tipau sujopheno achinemi shou Akiqheu qeu kini ajeu kudau kusavetsu. Aqeu jeye Malkha. 11Jisu no Pitor vilo pi, “Ozuta pe asuchhilo suvelo. Niye iPuno aghime jukhu ipelo shopeniye tsukeu shomoni kesha?” #Mt 26.39; Mk 14.36; Lk 22.42

Anna zulo Jisu Sawu

(Mt 26.57-58; Mk 14.53-54; Lk 22.54)

12Ike ghushimi ngo panoqo shou kijemi eno Achineki khemi ishino Jisu kughalu puzu pa tshuluveno 13pa sasu atughushi Anna lau wuve. Anna ye Kaifa ngukishiuke, Kaifa ye tipa ghulokilo achinemi shou Atou shiache. 14Ti Kaifa no Judami vilo akukumsu tsukeuno timi lakhino timiqo ghenguno thivekeu pavi kepi pipua. #Jn 11.49-50

Pitor no Jisu Mtha ipi

(Mt 26.69-70; Mk 14.66-68; Lk 22.55-57)

15Simon Pitor ngo akhopemi lakhiu pamaye Jisu papeche. Akhopemi lakhiu huye achinemi shou Atou sasu akivishi kilethi akehu pano Jisu gholono ti achinemi shou atou kilo kughaki bocho akeulo ilove, 16ikelo Pitor ye khalau ahukikhalo puthugho ae. Ti achinemi shou Atou sasu kilethi akeu akhopeu huno khalau ideipe puzu ahukikhalo ilimi akeu putsa puzu Pitor sasu alou sailoghi. 17Ahukikhalo ayiliu akeuno Pitor vilo pi, “Noghi timi hupau khopemi lakhike kumo kesha?” Pitor no khochile, “Moe, niye kumoe.”

18Suthi akehu aqemi ngo aghukhemiqono amiyi pesu ami shipuzu panongu puthughono ti suhope pugha ae. Pitor ghi ighi puzu panoqo gholo puthughono ti pugha ae.

Achinetouno Jisu vilo Iniju

(Mt 26.59-66; Mk 14.55-64; Lk 22.66-71)

19Achinemi shou Atouno Jisu vilo pa khopemi ngo pano kutsuchekeu ghili iniju. 20Jisu no pa khochile, “Niye timi kumtsu zulono piche; niye pulhapuju Sinagog lo ngo Achinekilo khile Judami kumtsuno kuhokumqo aghikeno tileno ino kutsuche; niye kusuuno kiumu pipuamoe. 21Ike noye kushiye ni iniju ani kya? Khunoqomino itsa chilu puani keno tipanoqo vilo niye panongu vilo kiu piche keno inijulo, kughengu ino kiu piche keno panonguno ithi anike.” 22Kughou Jisu no hi pikeno, tilehi puthugho akemi aghukhemi kijemi lakhino pau pesu Jisu gha puzu ishipi, “Noye ighumoke sheno achinemi shou Atou vilo tishi picheni kya?” 23Jisu no pa khochile, “Ino akipimipu tsa kiuala pipuaghi aye tiye kiu keno kumtsu vilo hileno pilo. Ikemu ino achipiu tsa pipuaghi aye noye kushiye ihe ani kya?” 24Tileno Anna no achinemi shou Atou Kaifa lau Jisu ye qeti tishi tshupesu puwuve.

Itaghi Pitor no Jisu Mthae ipi

(Mt 26.71-75; Mk 14.69-72; Lk 22.58-62)

25Pitor ye tikutolo puthughope ami pugha ae. Panonguno pa vilo pi, “Noghi pa khopemi gholo lakhi kekumo kesha?” Ikemu Pitor no tipau lahghi pi, “Moe, niye kumoe!” 26Pitor no akini kusale vetsukeu sholokumi lakhi achinemi shou Atou qeu ake pano ishipi. “Aghutulo noye pa gholo akeu ino ithulupuani keku?” 27Tileghi Pitor no tishi mokepi lahve; eno tipamtsa awuduno ighave.

Pilat zulo Jisu sawu

(Mt 27.1-2,11-14; Mk 15.1-5; Lk 23.1-5)

28Tileno panonguno Kaifa ki lono Ahng no achekeu akighiki kudau Jisu sawuve. Tiye inaqhe noke eno Judamiye akighiki sholokuu ilomo kughengu panonguye achine kitiqemo puzu Hechekulu libe chulu kepu shiniyeke. 29Ikehu Pilat no khalau ipeghino panongu sasu kusho puzu pi. “Timi hipau shou kiu nguku kepu sughi ani kya?” 30Panonguno khochile, “Timi hipauye alhoksa kumlami kumoke aye ninguye olau pa kugha saghini chemoke.” 31Pilat no panoqo vilo pi, “Nonguno pa sawulo eno nongu yezah kiqi lono pa shou kughathalo.” Judamino khochile, “Ninguye timi khumu pithive kepu ayezah kuhae.” 32Hiye Jisu no paye kiu kithi shi thi nani kela pipuakeu tsa shikupunikehu ke. #Jn 3.14; 12.32 33Pilat no akighikilo ideilove eno Jisu kupuzu pa vilo pi, “Noye Judami shou Akukau kesha?” 34Jisu no inijukide, “Hiye olikhi ololono ipeghikeu pesu iniju ani keo, ikeo kutamino ighili pesu ovilo pikya?” 35Pilat no khochile, “Niye Judami kesheno! No likhi no shiayeh eno achinetomino ilau okugha saghi thono; noye kiu shive kya?” 36Jisu no pi, “Ikukaqhaye hipau yeghiqha launo kumoe, ikukaqhaye hipau yeghiqha launo keaye, Judami pelo ikughasawu pemoni kelauno ikhopemino aghu shini cheke; ikemu ikukaqhaye hipau yeghiqha launo kumoe!” 37Ikelo Pilat no pa iniju, “Tishiaye noye akukau lakhi kesha?” Jisu no khochile, “Niye akukau lakhi kepi nono pianie. Ipunukeu eno ino ayeghiqhalo ighikeu kimijiye highenguno ke: Kuchou ghili ashepe tsuniyeke. Khunono kuchou laumi keno paye isutsa inicheni.” 38Pilat no pa vilo pi, “Kiuno kuchou kya?”

Jisu Pithivenikeu Xathave

(Mt 27.15-31; Mk 15.6-20; Lk 23.13-25)

Pilat no hi piveno khalacheu Judami lau idepe eno panoqo vilo pi, “Niye pa pithive kepu akiqi kiumu phumlae. 39Ikemu nongu khuayehlo akeu kiqi lono, niye Hechekulu Ghulhu atsu- tsu nongu ghenguno akughumi lakhi kuqhophetsu cheni, ike ipelo nongu ghenguno Judami shou Akukau kuqhophetsu penishi anima?” 40Panonguno vekipighi igha ghi pa khochile, “Timi hipau kumoe, ikemu Baraba kuqhophe tsulo!” Baraba ye heqhi-buqhi chekemi lakhi ke.

Currently Selected:

JOHAN 18: SUMIBSI

Highlight

Copy