JOHAN 16

1“Hipaqo kumtsu nongu vilo ino pive ani, tishianguno nongu puxakuluqhive pemonike. 2Panonguno Sinagog lono nongu hapheve nani. Aghuloki hu cheni kughou timi khunono nongu pithiluni keno paye ti shilukeuno Alhou huthulu ani kepi kumsu nani. 3Panonguno Apu mu ni mu mtha ke ghenguno panonguye nongu shou hipaqo shi nani. 4Ikemu ino nongu vilo hipaqo kumtsu pive ani, tishianguno kughou panonguno hipaqo shikepu ghuloki ighini keno,nongu pelo panoqo ghenguno ino pivekeu tsa kumsulu penike.”

Aghungu Kimthe Kumlapu

“Abothulo niye nongu vilo hipaqo thime pimoe, kughengu ino nongu gholo acheke. 5Ikemu itehiye ipuwukeu lau niye wuveni cheni, ikeghi nongu lakhi nomu ivilo, ‘Noye khila wuveni cheni kya?’ ipi inijumoe. 6Eno ino itehiye nongu vilo hipaqo thime pive kelauye nonguye amlo ghimeno chhitoi auvae. 7Tishiepimu ino nongu vilo kuchou tsa pini: nongu ghenguno ino wuvekeu pavi kughengu ino wuvemo aye Shikumtokutsuu ye nongu lau ighimo nani. Ikemu ino wuve aye nongu lau ino pa puwuni. 8Kughou pano ighini keno pano ayeghilomi vilo axine ngo amikucho eno Alhou no kughatha tsukeu ghili panonguno shipimi achekeu lhe nani. 9Axine ghili panonguno pimikeu lhe nani kughengu panonguno ipulumoke; 10Amikucho ghili lhe nani, kughengu niye Apu lau wuni cheni eno nonguno ni ithumlave nani; 11kughakutha ghili lhe nani kughengu ayeghiqha hipau yehkipeu shou kughakutha betsu ni ake.

12“Niye nongu vilo thime kutomo pikepu aphi, ikemu nonguye tipaqo itehiye ithikuthunikeu sho ani. 13Ikemu kughono Kuchou Ghungu ighini keno pano kuchou ghili kumtsulo nongu saphepiye nani, kughengu paye pa likhi pa kutoshi pimo nani ikemu pano kiu chilu keno tipau pi nani eno thime ighiniye akeqo ghili nongu vilo pi nani. 14Pano ijepipitsu nani, kughengu ino kiu pikepu ani keno pano tipau pesu nongu vilo pi nani. 15Apu no akeu kumtsu iwuke, tighenguno ino pive keuno Aghungu huno ino kiu pikepu akeno tipau pesu nongu vilo pi nani.”

Amloksa eno Alokiqi

16“Ado kitila apuzu nonguye ni ithumlave nani, itaghi ado kitila thiuno nonguno ni ithulu nani.” 17Pa khopemi khamino khami vilo, pi, “Ado kitila apuzu nonguye ni ithulumove nani eno itaghi ado kitila thiuno nonguno ni ithulu nani ipikeu ngo, ‘Kughengu niye Apuh lau wuni cheni’ ipikeu hiye kiu kya?” 18Panonguno ishi pia, “‘Ado kitila’ ipikeu kiqiye kiu kya? Paye kiu piani kela ninguye mthae!” 19Panonguno Jisu vilo inijunishi akeu pano ithi ae, ike panoqo vilo pano pi, “Ado kitila apuzu nonguye ni ithumlave nani eno itaghi ado kitila thiuno nonguno ni ithulu nani” ipi ino pikeu kiqi nongu dolo inijukile ani kesha? 20Kuchouno ino nongu vilo pini: Nonguye igha qah nani ikemu ayeghiqhano alokivi shi anani; nonguye amloksa shi nani ikemu nongu mlokusa hu alokivipu shive nani. 21Totimi lakhiye anga punu niye su akelo amloksa shicheni, kughengu lino aghime shikepudo ighi kehu; ikemu kughono anga punuluveni keno liye li ghime kumsumave cheni, tiye anga lakhi ayeghilo punusulukeu lokivi launoke. 22Tihutoi nongu ghi itehiye amloksa shi ani, ikemu niye itaghi nongu sasu kusholuni aphi, tileno nongu mlolo alokivino chhitoilu nani, eno khunomu nongu lokivi ikhisuwuvemla nani. 23Tipa tsala ighi kelo nonguye ivilo kiumu khumo nani. Kuchouno ino nongu vilo pini, “nonguno ije lono Apu vilo kiu-kiu khuni keno pano tipau nongu tsu nani. 24Itehi kutolo nonguye ije lono kiumu khujumphike; khulo eno nongu tsu nanike, tishianguno nongu lokivi shikupulu penike.

Ayeghiqha shou Theqhikulu

25“Kimighipiyekeu lono niye thime hipaqo pesu nongu vilo pivae, ikemu niye kimighipiyekeu lono nongu putsamo puzu mututuyi keu tsa lono Apu ghili nongu vilo pikepu tuqhudo cheni. 26Tipa tsalalo nonguno ije lono pa vilo khu nani; eno niye nongu zuqhushi pa vilo ino khutsunikeu piamoe, 27kughengu apuh ampino nongu kimiye cheni. Nonguno ikimiye eno niye Alhou launo ighikepi nonguno pululuke ghenguno pano nongu kimiye cheni. 28Niye Apu launo ighike eno ayeghilo ighivae; eno itaghi ayeghiqha qhiveno Apuh lau wuveni cheni.”

29Tileno pa khopemino pa vilo pi, “Imapi, noye itehiye kimighipiyekeu lono kumo puzu mututuyi pi ayae! 30Itehiye ninguno ithiveake noye thwokha ithi ani eno khunomu ovilo iniju akepu kuhavae. Hipau lono noye Alhou launo ighikemi kepi ninguno pululuve peke.” 31Jisu no panoqo khochile, “Nonguye itehino pululu ani kya? 32Nongu kumtsu pututa shelo pututa kilo apanagha halesuveno ilikhi qhivenikeu tuqhudo hu cheni eno hi cheae. Ikemu niye ilikhi ani chemoe kughengu Apuh no igholo ani. 33Ino nongu vilo hipau pikeuye isasu kimepe akeu lono nongu pelo alokiqi apeniyeke. Ayeghilomino nongu shikimghi nani, ikemu amlo mutotoi shilo! niye ayeghiqha theqhiluvae!”

Currently Selected:

JOHAN 16: SUMIBSI

Highlight

Copy