JOHAN 15

Jisu ye Atsayibo Kuchou

1“Niye atsayibo kuchouke eno iPu ye alukichiu ke. 2Iloka khijehi axathi pithimo keno pano micheve cheni eno axathi pithikeu loka kumtsu alaushi pithi penike pano tipaqo kixiphe cheni. 3Ino nongu vilo pivekeu tsaqo vechewo nonguye mitheluvae. 4Igholo kimepe achelo eno ino nongu gholo kimepe anani. Aloka lakhino atsayibolo kimepe moke thaqhu loye pa likhi pa kutoshiye axathi pithimla ketoi nonguye igholo kimepe moke thaqhu loye athi pithimlae. 5Niye atsayiboke eno nonguye alokaqoke. Khunono igholo ani eno ino khuno gholo ani keno, tipanono axathi shishe pithi cheni, kughengu isumo keloye nonguye kiumu shimlae. 6Khunono igholo kimepe moni keno aloka lakhi toi pa ikhipeve cheni eno thizummuyive cheni. Aloka tipaqoye xukumqono amilo vesuveno pitive cheni. 7Nonguno igholo kimepe aye eno itsano nongu lolo aye, nonguno kiu pulo keno khulo, tipau nongu ghenguno shitsu nani. 8Nonguno axathi kutomo pithikeuno iPu jukuvupu shitsulu acheni; eno tishikeuno nonguye ino kutsuluvekemi shilu nani. 9Apuh no ikimiye ketoi niye nongu kimiye cheni, ike iwu kikimiyelo kimepe achelo. 10Ino iPuhno ahzatsukeu papelu puzu pawu kikimiyelo kimepe acheke toi, ino ahzatsukeu nonguno papelu aye nonguye iwu kikimiyelo kimepe anani.

11“Ino nongu vilo hipaqo piakeuye ilokivi nongu lolo apeniyeke, eno nongu lokivi shikupu lupeniyeke. 12Ino ahza yetsu akeuye hike: Ino nongu kimiyeke toi nongu lakhino lakhi kimiyekilelo.#Jn 13.34; 15.17; 1 Jn 3.23; 2 Jn 5 13Timi lakhino pawu shompami ghenguno akuxu tsuvekeu nguno kikimiye akiqheu kutau kuhae. 14Ino kiu ahza tsukeno nonguno tipau shiaye, nonguye ishompami ke. 15Hinguno hilauye niye nongu pesu aqemi ipimae kughengu aqemi lakhiye pa mipeuno kiu shicheni kela mthae. Ikemu niye nongu vilo shompami kepi kuni kughengu iPuh lau ino chilukeu tsa kumtsu nongu vilo pivae. 16Nonguno ikisheluke kumoe, ikemu ino nongu kishelu eno nongu hekutsulu eno wupuzu tamono axathi kutomo pithipeni yeke. Tishianguno nonguno ije lono Apuh vilo kiu kiumu khu aye pano nongu tsu nani. 17Ino ahza hipau nongu tsu ani: Nonguye kimiyekilelo.”

Ayeghilomino Mithikeu

18“Ayeghiqhano nongu mithi aye nongu zuuno ipaghi mithivae ipi nonguno ithilo. 19Nonguno ayeghiqha laumi keaye, ayeghiqhano pano laumi kimiyeni cheke. Ikemu ayeghiqha launo ino nongu kishelu eno nonguye tipau laumi kumoe, tighenguno ayeghiqhano nongu mithi cheni. 20Ino nongu vilo pivekeu tsa kumsululo: ‘Aquaxemi lakhiye pa mipeu nguno akijeu kumoe.’ Panonguno ipishipuju aye nongu ghi pishipuju nani, panonguno itsa papelu aye nongu tsa ghi papelu nani. #Mt 10.24; Lk 6.40; Jn 13.16 21Ikemu nonguye ilaumi keghenguno panonguno nongu shou hi kumtsu shi nani. 22Ino ighimove eno panoqo vilo pimo keaye panonguye axine shikeu kuqumoni cheke, ikemu itehiye panongu xine ghenguno jeku kivishi kepu kuhavae. 23Khunono imithi cheni keno iPu ghi mithi cheni. 24Khunomu shichemokeu kumla ino panongu gholo shimo ke aye panonguye axine shikeu kukuqu kuhani cheke, ikemu itehiye ino kiu mlakeno panonguno ithuluve keghi panonguno ni eno iPuh ikujo mithi cheni. 25Hiye tishimasa kepushive, tishianguno panongu yezahlo ishi yepuakeu tsa shikupuni kehu, ‘Jekujeli lakhimu kuha kemu panonguno kutsazu lono imithike.’ #Leshe 35.19; 69.4

26“Ikemu Shikumtokutsuu kuchou Ghungu, Apu kudauno ipekighiu hu, Apu launo ino nongu lau puwu nani. Kughou pano ighini keno, pano ishepe shitsu nani. 27Eno nongu ghi ishepe shitsu nani, kughengu nonguye abothu lono igholo acheke.”

Currently Selected:

JOHAN 15: SUMIBSI

Highlight

Copy