JOHAN 14

Apu lau Wunikeu Laghiye Jisu

1“Nongu mlo kutakihi kevilo, nonguno Alhou pulu cheni, eno ishou ghi pulu acheni. 2IPu kiloye ngokepu-a kutomo ani eno nongu sala a-a lakhi kutope aghinike wuni. Tishimo aye niye hipatsa pesu nongu vilo pimo nicheke. 3Ino wupuzu nongu sala a-a lakhi kutolu kethiu, ino ideighi nani eno igholo nongu sawuni, tishianguno ino khile ani keno nongu ghi tile anani. 4Ino khila wucheni keno nonguye tipala ithi anie.” 5Thoma no pa vilo pi, “Ampeu, ninguye nono khila wucheni keno mthae; ninguye kishieno tipala ithini kya?” 6Jisu no pa khochile, “Niye alaghi, niye kuchou eno niye akuxupuke, ivechemo keloye timi khunomu Apu lau wumlae. 7Nonguno ni ithi aye nonguye iPu ghi ithi aghive nani. Hinguno hilauye nonguno pa ithiva eno nonguno pa ithuluvae.” 8Filip no pa vilo iniju, “Ampeu, Apu ningu piyeve aye tino lukumkhae.” 9Jisu no pa khochile, “Filip, niye hitotohi nongu sasu a-ighivea puzu noye itehi kutolo nimtha kesha? Khunono ni ithuluve akeno paye Apu ithuluvae. Tishiaye noye kishi puzu, ‘Apu ningu piyelo’ ipi kya? 10Niye Apu lolo ani eno Apuh ye ilolo ani kepi noye pulu chemo kesha? Ino nongu vilo kiu picheni keno tiye igho-apulou lono kumo ikemu Apu ilolo achekeu huno pa kumla shichenie. 11Niye Apu lolo ani eno Apu ye ilolo ani kepi pululo; tishi moe pimu akumla hipaqo ghengu likhimu ipululo. 12Kuchouno ino nongu vilo pini, khunono ipuluni keno paye ino mlakeu kumla ghi mlalu nani, eno ino Apu lau wuniake ghenguno paye hipaqo kumla nguno akumla kije mlalukha nani. 13Nonguno ijeku puzu kiu kiumu khuni keno ino shitsuni, tishikeu lono Anu vechewo Apu jepipilu penike. 14Nonguno ijeku puzu ivilo kiu kiumu khuaye, ino ti shitsuni.”

Aghungu Kimthe Ighinikeu

15“Nonguno ikimiye cheni aye ino ahza tsukeu pelulo. 16Ino Apu vilo khutsuni eno pano Shikumtokutsuu kutau lakhi nongu tsu nani, pa pelo pulhapuju ghenguno nongu sasu achepenike, tiye kuchou Ghungu ke. 17Ayeghilomiye pa ikhilumla, kughengu panonguno pa ithuluni chemoe momu pa ithini chemoe; ikemu nonguye pa ithi ani, kughengu paye nongu sasu acheni eno nongu lolo acheni.

18“Niye nongu mighimugha toi qhivemoe; niye nongu lau ideighi nani. 19Ado kitila apuzu ayeghilomino ijuthumlave nani ikemu nonguno ijuthulu nani; ino xu anike ghenguno nongu ghi xu nani. 20Tipa tsalanino, niye iPuh lolo akeu eno nonguno ilolo akeu eno niye nongu lolo akeu nonguno ithi nani. 21Khunono ino ahza tsukeu ikhiluni eno tipaqo peluni keno timi tipauno ikimiye cheni. Khunono ikimiye chenikeno iPuno pa kimiye nani, eno nighi pa kimiye nani eno ilikhi ino pa pephe piye nani.” 22Judas Iskariot kumono Judas kutami-u huno pa vilo pi, “Ampeu, noye kishi puzu ayeghilomi lauye kumono ningu lauye olikhi opephepiye nani kya?” 23Jisu no pa khochile, “Khunono ikimiye keno ino kutsu keu gholu cheni eno iPuno pa kimiye nani eno iPuh ngo ni ngo ishi pa lau ighi puzu pa sasu nani. 24Khunono ikimiye chemokeno itsa pelu chemoe; eno nonguno khipatsa chilu anikeno tiye itsa kumoe, ikemu iPuh ipuwukeu launo ighikeu tsake.”

25“Ino nongu gholo aphi lono hipaqo tsa nongu vilo pive ani. 26Ikemu Shikumtokutsuu, Aghungu Kimthe hu Apu no ije lono puwunikeu huno thwokha nongu shika nani, ino nongu vilo pivekeu kumtsu pano nongu pelo kumsuchilelu pe nani. 27Ino alokiqipu nongu gholo qhitsu ani; alokiqipu ino nongu tsuani; ayeghilomino tsuchekeu hutoi nongu tsuanike kumoe. Nongu mlo kutakihi akevilo momu msakevilo. 28Ino ishi pikeu nonguye chiluvae: ‘Niye wuveni cheni ikemu niye nongu lau ideighi nani.’ Nonguno ikimiye aghi aye, ino Apu lau wuni cheni pikeulo nonguye alokivi shikepue, kughengu Apu ye inguno akijeuke. 29Tishi mphi lono ino itehino nongu vilo pive paghi ani, tishianguno kughou tishini keno nongu pelo pululu penike. 30Niye nongu sasu kushuwa kuptsalumae kughengu hipa yeghiqha shou ayehkipeu cheae. Paye ishou akuka kiumu kuhae, 31ikemu Apu no ivilo shilo pikeu ino shicheni, tishianguno ayeghilomi pelo niye Apu kimiye cheni kepi ithipenike. Ithulo, ningu hileno wuveni shilo.”

Currently Selected:

JOHAN 14: SUMIBSI

Highlight

Copy