JOHAN 13

Jisu no Akhopemi Pukhu Qhutsu

1Hiye Hechekulu Ghulhu zuloke. Jisu no paye ayeghiqha hipau qhiveno Apuh lau wuvenikeu tuqhudo tovekeu ithive! Ayeghiqhalo khunoqono pawu keno pano pulhapuju tipaqo kimiye che, eno pano ashekha kutolo panoqo kimiyeche.

2Jisu ngo pa khopemiye kijiliu ghulhu shiae. Tughamino Simon nu Judas Iskariot mlolo Jisu kichephe piyevetsu nikeu kumsuvepe. 3Apuh no akuka kumtsu Jisu ulo suvetsukeu Jisu no ithi ae eno paye Alhou launo ighi eno Alhou lau wuveni cheni kepi pano ithi ae. 4Ikehu Jisu no ilhuake lono ithu puzu pa phi xaqhive eno kughusuphi pesu pa po khapuve. 5Tishieno pano chithakhu lakhilo azu lesuno pa khopemi pukhu qhutsu eno pa po khapuakeu kughusuphi pesu panoqo pukhu isutsu. 6Pano Simon Pitor lau ighi kelo, Pitor no pa vilo pi, “Ampeu, nono ipukhu qhunike sheno?” 7Jisu no pa khochile, “Ino kiu shiani keno noye itehiye mthae ikemu hithiuno nono ithi nanike.” 8Pitor no pa vilo pi, “Noye khilemu ipukhuye qhupemo nani thono!” Jisu no pa khochile, “Ino opukhu qhutsumo aye noye ilaumi kumoe.” 9Simon Pitor no khochile, “Ampeu, tishiaye ipukhu likhi kumono i- u ngo ikutsu ghi qhutsulo!” 10Tileno Jisu no pi, “Timi khuuno azukuchhuvea keno pa pukhu likhi kumoaye paye ampi kuchopu mithe ani eno kutauye qhuakepu avehu kuhae. Nongu gholo lakhi likhino kumoaye kutamiye kumtsu mithe anie.” 11Kughengu khuno pa kichephe piyevetsuni chenikeno pano ithi ae, ikehu pano, “Milakhi thono nongu kumtsu mithe anie” ipike.

12Jisu no akhopemi pukhu qhuvetsu puzu pa phi uluveno puzuu paalo ngoveno panoqo vilo pi, “Ino nongu lau kiu shitsu keno nonguye ithi anima? 13Nonguno ivilo Kutsuchekeu eno Ampeu ipi iku cheni, nonguno tishi pikeuye achipike, kughengu niye tihuke. #Lk 22.27 14Tishiaye, ni nongu Mpeu eno nongu Kukutsuuno nongu pukhu qhutsu aye, nongu ghi lakhino lakhi pukhu qhutsu kepue. 15Ino kichekipiye lakhi nongu lau qhitsu ani, ike ino nongu lau shikeu toi nongu ghi titoi shikepue. 16Kuchouno ino nongu vilo pini, aquaxemi lakhiye pampeu nguno akijeu kumoe; momu aghinikishimi lakhiye pa puwuakeu nguno akijeu kumoe. #Mt 10.24; Lk 6.40; Jn 15.20 17Nonguno hi ithi aye eno nonguno hipaqo pepimhelu aye, nongu lokivipuke. 18Niye nongu kumtsu ghenguno piamoe; ino khunoqo kishelukeno ino ithi anie. Ikemu kuchoyesulo akeu kupuve masa kehu, ‘Igholo kumtsa chukeu timi huno ishou chhophisue.’ #Leshe 41.9 19Hipau shimphi lono ino itehino nongu vilo pive anike, tishianguno kughono tishini keno, ‘Niye nike’ ipikeu nonguno pulu nani. 20Kuchouno ino nongu vilo pini, khunono ino puwukemi ikhilu nikeno paye ni ikhilu ani, eno khunono ni ikhilu ani keno paye ipuwuakeu ikhilu anie.” #Mt 10.40; Mk 9.37; Lk 9.48; 10.16

Pa Kichephe Piyevetsunikeu Ghili Jisu no Azunatha Pi

(Mt 26.20-25; Mk 14.17-21; Lk 22.21-23)

21Jisu no hipau pivekethiu pa mlo ghime-kusa shiveno kumtsu zulono pi, “Kuchouno ino nongu vilo pini, nongu gholo milakhino ikichephe piyevetsuni cheni.” 22Paye hipatsa khuu mijighi piakeno akhopemiqoye avehu izuve kehu lakhino lakhi jukuto ae. 23Akhopemi gholo lakhi Jisu no kimiyechekeu huye Jisu mumupe iqa-a. 24Ikehu Simon Pitor no a-u pesu pa lau kiche puzu pi, “Hiye khuuno tishiveni cheni kela Jisu vilo inijulo.” 25Ike Jisu mumupe iqa akeu akhopeu huno Jisu vilo iniju, “Ampeu, tiye khuno tishini cheni kya?” 26Jisu no khochile, “Ino akulhozulo asho putsuno khuu tsu nikeno timi tipauke.” Ike pano asho tachu lakhi ikhi pesu putsuno Simon nu Judas Iskariot tsue. 27Judas no asho ikhiluve kemtsa Satan no pa lolo ilove. Jisu no pa vilo pi. “Noye mtazu kiu shikepushi ani keno shilo!” 28Jisu ye kushiye hipatsa pa vilo pikeno tilehi alibe chuakemi lakhi nomu tipau vethamlae. 29Judas no pisabo pighiu shiche kehu Jisu ye pa vilo wupuzu aghulhu ghenguno kiu avehupu shi akeno tipaqo qhunikeu momu kiu kiumu pesu kumlhomi tsu nikeu pikughashi akhopemi khamiye kumsuve. 30Ike Judas no asho ikhiluveno paye tipa mtsa khalau ipeve. Tiye putho shiae.

Ahzakutsu Akitheu

31Judas no wuve kethiu Jisu no pi, “Itehiye Timi Nu jekipipu, pephepiye anie; itehiye Alhou jekipipu pa vechewo pephepiye ani. 32Pa vechewo Alhou jekipipu pephepiye aye, tishiaye Alhou ghi Timi Nu jekipipu pa ampino pephepiye nanike, eno paikhavino pa je pipive nani. 33Anuliqo, niye ado kitila likhi nongu sasu anani. Nonguno iphuju puhave nani, ino Judami vilo pivekeu toi itehino nongu vilo hi piani, ‘Ino khilau wucheni keno nonguye ighimlae.’ #Jn 7.34 34Ahzakutsu akithe lakhi ino nongu tsu ani tiye nongu lakhino lakhi kimiyekilelo; ino nongu kimiyecheke toi nongu ghi lakhino lakhi kimiyelo. #Jn 15.12,17; 1 Jn 3.23; 2 Jn 5 35Nongu lakhino lakhi kimiyekile aye, tileno nonguye ino kutsuluvekeqo kena ipi timi kumtsuno ithi nani.”

Pitor no Piphemo nanikeu Jisu no Azunatha ghi Pi

(Mt 26.13-35; Mk 14.27-31; Lk 22.13-34)

36Simon Pitor no pa vilo iniju, “Ampeu, noye khilau wuveni kya?” Jisu no pa khochile. “Ino khilau wucheni keno noye itehiye ipapemlae, ikemu hithiuno nono ipape nani.” 37Pitor no pa vilo iniju, “Ampeu, niye kushiye itehiye opapemla nani kya? Oghenguno niye ikuxu pephetsulu nanie!” 38Jisu no khochile, “Noye kuchouno ighenguno okuxu pephetsuluni kesha? Kuchouno ino ovilo pini, awuduno ighanike zulo ghuthu kuthu kutolo noye imthae pinani.”

Currently Selected:

JOHAN 13: SUMIBSI

Highlight

Copy