JOHAN 12

Bethani lo Teli pe Jisu Nu

(Mt 26.6-13; Mk 14.3-9)

1Hechekulu Ghulhu shinikeu atsala tsugho akelo Jisu ye Bethani lo Lazar no achekeulo ighi. Lazar ye Jisu no akithi lono xuputhukeu huke. 2Panonguno tilau pa ghenguno alibe shipeqhitsue, Lazar ghi Jisu sasu kuchukusho shinikemi gholo ngoae eno Martha no tipau kutope qhitsue. 3Tile Maria no nard subo lono mlaphekeu axo kutsungu teli ighono amekusho abohu-kichhi peighi puzu Jisu pukhu lete tsu eno lisa pesu pa pukhu isuvetsu, ikelo teli xono aki chhitoi vechighive.#Lk 7.37-38 4Jisu khopemi gholo Judas Iskariot ipikeu Jisu pesu atheshiveni kuau huno pi, 5“Kushiye teli hipau ghuka 2000 lono jeno pisa pesu kumlhomi tsumo kya?” 6Pano hi pikeuye, paye kumlhomi kumsulu cheke ghengunoke kumoe, ikemu paye kupkami lakhi ke; pano aqowu pisabo puche eno tilehi kiu sukeno pano luvecheke. 7Ikemu Jisu no ishipi, “Li lokutolo, lino kiu shi anikeno ikumo qhoke tsalalo ghengunoke. 8Kumlhomiye pulhapuju nongu sasu achenani, ikemu niye pulhapuju nongu sasu anichemoe.” #Zaki 15.11

Lazar Pithivenike Kuchughu

9Jisu ye Bethani lo anie pikeu sutsa Judami aqokitikhino ithive eno panonguye tilau ighi. Jisu likhi juniyeke kumono pano akithi lono xuputhuvekeu Lazar ghi juniye ighi. 10Ike achinetomino Lazar ghi pithivenike kuchughuve, 11kughengu pa ghenguno Judami kutomono panongu shou sakiphemi qhiveno Jisu shou pulubewuveke.

Jerusalem lo Hutti ilo

(Mt 21.1-11; Mk 11.1-11; Lk 19.28-40)

12Tishiwo thoghiu Hechekulu Ghulhu lo suniye timi aqokitikhi ighikeqono Jisu ye Jerusalem lo ighini chenie pikeu sutsa chilu. 13Ikehu panonguno amsabo loka michepe pa sasu kushoniye ighamuku wue: “Alhou Sheqhelo Ampeu jelono khuu chenikeno Alhou no pa kumghatsulo! Israilmi kukau kumghatsulo!” #Leshe 118.25,26 14Jisu no gadaha lakhi phuno tipau shou iqae, kuchoyesulo pipuakeu kiqi shi:

15“O Zion phughi, msakevilo!

Julo, okukau olau chenie,

gadaha lakhi shou iqano chenie.” #Zekha 9.9

16Tishiake ghulokilo pa khopemiye hipau ithikuthumono ae, ikemu kughou Jisu ye ajukuvupulo xuputhuve keno, kuchoyesulo hipau pipuakeu eno panonguno pa ghenguno hipau shitsukeu akhopemino kumsuchilelu. 17Kughou Jisu no akumoki lono Lazar kuphe eno akithi lono pa xuputhu akelo pa gholo timi akeqo huno kiu kishi shikeno pikhave aghi. 18Timi aqokitikhino pa sasu kushokeu kiqiye Jisu no amchipu kumla hipau shikeu panonguno chiluke ghengunoke. 19Tileno Farisimino lakhino lakhi vilo ishipi, “Noghi julo, ninguye kiumu shimlave ake! Julepi, ayeghiqhano pa pape cheuvae.”

Grikmi Khamino Jisu Phusu Ighi

20Aghulhulo Alhou mllaniye iqhokemiqo gholo Grikmi khami ae. 21Ikehu panonguno Filip lau ighi, (Filip ye Galil lo Bethsaida phulono ighike) eno ishipi, “Akijeu, ninguye Jisu junishi ani.” 22Filip no wu puzu Andrew vilopi eno pama wu puzu Jisu vilo pi. 23Jisu no panoqo vilo pi, “Itehiye Timi Nu jekipipu shinikeu tuqhudo ighivae. #Leshe 110.4; Isa 9.7; Ezek 37.25; Dane 7.14 24Kuchouno ino nongu vilo pini, athi lothi lakhiye ayeghilo ikiqi ilono thive moke thaqhuloye tilikhi patho acheni; ikemu tipauno thive aye alothi kutomo pithilu cheni. 25Khunono pa likhi pa kuxu kupu nikeno tipau puhave nani; khunono ayeghi hipaulo pa kuxu kupumo nikeno lhokta kuxu ghenguno tipau pekutsulu nani. #Mt 10.39 26Khuno iqe nishi keno paye ipape masae eno ino khile ani keno pa ghi tilehi igholo anani. Khuuno ihuthuni keno Ipuh no pa gihu nani.”

Jisu no Pano Thinikeu vehu Pi

27“Itehiye ighono imlo-kusa shivae. Niye kiu pini kela? ‘O Apuh, hipau tuqhudo lono ixaphelulo’ ipini kesha? Moe, hipau kimjipu ghenguno aghimepu tuqhudo hipaulo ino ighivae. 28O Apuh, oje kipipu shilulo!” Tileno kungugha lono asutsa lakhi ishi ighi. “Niye ajekipipu shivae eno itaghi ajekipipu shi nani.” 29Timi aqokitikhi tipau phivilo puthugho akeqono asutsa hu chilu eno tiye tsutsusu aniepi. Kutami khamino pikeuno kungumino Jisu putsa ipi. 30Ikemu Jisu no panoqo vilo pi, “Asutsa hipauye nongu sala kethono isala kumoe. 31Itehiye ayeghiqha shou kughakutha ghulokike; itehiye ayeghiqha hipau shou ayehkipeu hu halepheniake. 32Kughono ayeghi lono ni ikhiqheni keno, ino timi kumtsu sunheluve nani.” 33Pano hipau pikeuye paye kiu kithi ghola lono thini cheni keno piyekeuke. 34Timi aqokitikhino pa khochile, “Ni yezah kakulo Mesiya ye alhokupuju ache nani kepi pipuanie. Tishiaye noye kishi puzu Timi Nu ikhiqhenikeu tsa piani kya? Timi Nu huye khuu kya?” 35Tileno Jisu no panoqo vilo pi, “Akuvu huye ado kitila likhi nongu sasu aniae. Nonguye akuvu aphi lono nongu kuxu xululo, tishimoaye akuzuno nongu haluvenosake; kughengu khunono akuzulo xuani keno paye khilau wucheni keno mthae. 36Nonguye akuvu ake lono akuvu pulubelo, tishianguno nonguye akuvu timiqo shilu nani.”

Judami Kupulukumo

Jisu no hipau pive puzu paye chesu wuveno Judami launo itshuauve. 37Panoqo zulo pano amchipu kumla kutomo shikeghi panonguno pulumoe; 38tino Isaya tungkupuno pipuakeu shi kupuve:

“O Ampeu, ninguno pikeu sutsa khuno pulutsu kya?

Khuno lau Ampeu kukakumto pephe piye kya?” #Isa 53.1

39Tighenguno panonguye pulu mlae, kughengu Isaya no highi pivae:

40“Alhou no panoqo nhethi kighichevetsu eno panoqo mlo shikughupo vetsu,

Ikehu panongu nhethino ithumla,

eno panongu kukumsulo vethamla,

eno panoqo shipivitsu penike ilau panonguno ideghimoe.” ipi Alhou no pi. #Isa 6.10

41Isaya no hipau pikeuye pano Jisu jekipipu ithuluke ghenguno pa ghili pike. 42Tishimu, Judami sakiphemi kutomono Jisu shou pulukeu ae, ikemu Farisimi msake ghenguno panonguye piphemoe, tiye Sinagog lono hapheve nosakehue. 43Kughengu Alhou no sheqhepe nikeu nguno alauno timino sheqhekeu panonguno kimiyekutue.

Jisu Tsano Kughakutha

44Jisu no asutsa kumgha lono pi, “Khuuno ipulu ani keno, ilikhi pulu anike kumoe ikemu paye ipuwu keu ghi pulu anie. 45Khunono ni ithulu ani keno paye ipuwu puakeu ghi ithulu anie. 46Niye akuvu shi-ghi ayeghiqhalo ighivae, ike khunono ipulu nikeno tipaqoye akuzulo akepu kumoe. 47Khunono ino pikeu tsa chiluno tipau pemla nikeno, niye pa shou kughathabemo nani; kughengu niye ayeghilomi shou kughathabe nike ighike kumoe ikemu ayeghilomi xalu nike ighie. 48Timi khunono ni ikhilumo nikeno kughakuthau lakhi anie. Ino pivekeu tsano ashekha tsalalo pa shou kughakuthau shive nani. 49Kughengu niye igho lono pianike kumoe ikemu niye kiu pimasa eno kiutsa pimasakeno Apuh ipuwukeu huno ahza itsupuanie. 50Ino ithi akeuno pano ahza tsukeu huno lhokta kuxu sughi cheni. Tighenguno ino kiu pikeno tiye Apuh no ivilo pilopikeu ke.”

Currently Selected:

JOHAN 12: SUMIBSI

Highlight

Copy