APOSTOLMI 7

Stifan Tsapi

1Tile Achinetouno Stifan vilo iniju, “Hiye kuchouno tishi kesha?” 2Stifan no pi, “Athikuzumi eno apuamuqo, itsa initsulo! Nisu Abraham no Mesopotamia yeghilo kughuna aphilo, eno pano Haran lo wo kughuna mphi lono ajukuvu Lhou no pa lau ipeghino 3pa vilo pi: ‘Noyeghi ngo nolimi-alagha qhiveno ino opiye nikeu yeghilo wuvelo.’ #Bothu 12.1 4Ike pano Khaldia yeghi qhiveno Haran lo kughuna niye wue. Pa pu thivekethiu, nonguno itehi khile kughuna ani keno tilehi Alhou no pa sakiqe sasu ighie. #Bothu 11.31; 12.4 5Ikeghi tipa-alo apukhu nepa qhemi lakhimu pa mheghi shilukepu tsumoe; ikemu Alhou no tushoqhi keuno ti pa tsuniepi, eno tiye pawu eno pa tikughukomiqo wu shipeniepike. Alhou no hipau shoqhi shike ghulokilo Abraham ye ati anuli kuhae. #Bothu 12.7; 13.15; 15.18 6Alhou no ishi pi pua: ‘Pa tikughukomiqoye kutami yeghilo inami shi nani, tilau ampe 400 kutolo panonguye timi qemi shino timino kijipusa nani. #Bothu 15.13-14 7Ikemu panonguno qeniye akemi shou ino kughakutha puwu nani, eno tithiuno panonguno hipalo ighieno imlla nani,’ ipi Alhou no pie. #Ipe 3.12 8Alhou no puloshoqhi shike michi aphighu yiko ghavekeu peithawo peniye Abraham tsue. Hipaqo kumtsu kiqi kuputsukeu shi-ghi Isak punu kelo atsala tachelo Abraham no panu phighu yiko ghavetsu. Isak launo Jakob ighi eno Jakob launo asu chighikini ighi eno panongu kumtsu aphighu yiko ghavekeu shiwove. #Bothu 17.10-14; 21.2-4,25-26; 29.31-35

9“Nisunoqono pano thikuzu-u Josef ju anheshu puzu pa kughape Ijip lo timi qemi shiwuve peniye jesue. Ikemu Alhou no pa gholo ae, #Bothu 37.11,28; 39.2,21 10eno pa kuxu-kusa kumtsu lono pa xaphelu. Alhou no alokutsu eno timi lopu pesu Josef tsukeu lono pano Ijip lo akukau Farao zulo wukelo, Farao no pa pelo Ijip yeghilo Ahng shipe eno akukau kibo shou peithakutsu-u shivepe. #Bothu 41.39-41 11Tile puqumiyekeu lakhi Ijip ngo Kanan qha kumtsu ighi eno shishe shilukusa shive. Nisunoqoye achuqupu kiumu ithumlave. #Bothu 42.1-2 12Ijip yeghilo athi ithulu aniepikeu Jakob no chilukelo pano nisunoqo hapuwu, panongu ghenguno tino izu tughiue. 13Aghuzu akiniu loye Josef no pamunoqo pelo paye khuu kela ithipe, eno Josef nobolomi ghili Farao no ithivepe. #Bothu 45.1-16 14Ikehu Josef no papuh Jakob ngo pano bolomi, pano lhotsuni pungu kumtsu kuwupe. #Bothu 45.9-10,17-18; 46.27 15Tile Jakob no Ijip lo iqi eno pa ghi eno nisunoqo ghi tilano thive. #Bothu 46.1-7; 49.33 16Panongu kumoye Shekem lo xapuwu eno Abraham no Amarimi Hamor vilo pisa agho lakhino qhukeu kumokilo panongu kumo qhoveke. #Bothu 23.3-16; 33.19; 50.7-13; Joshu 24.32

17“Alhou no Abraham vilo piqhipuakeu kupunikeu do kupunuvekelo Ijip lo nitimi alaushi ikowove. 18Tipashelo, Josef ghili mthakemi kukami kutau lakhino Ijip lo ayeh pethuve. #Ipe 1.7 19Pano muquijoyi shino nishiayeh kutsaveniye shi, eno ayikusashi nisunoqo pelo panongu-ngaqo puxupemoni aye aki lono khalau ikhiphevepe. #Ipe 1.10-11,22 20Tishiake holono Muse punu. Paye anga jukivi kutsasa. Aqhi kuthu kuto pa puazano aki lono pa tucho mujo puthu. #Ipe 2.2 21Kughou aki lono khalau pa ikhipheve keno Farao nga ayiliuno pa saluve eno li nga paphi shi-ghi pa saputhu. #Ipe 2.3-10 22Ijipmi kighithi lokutsu kumtsu pesu pa shika puthu, eno atsalo na akumlalo namu kijemi lakhi shiluve.

23“Kughou Muse no apunu mipe lhobidi shini chekelo pa thikuzumi Israilmiqoye kiutoi ani keno juwu kepuke pikeu pa mlolo kumsuphelu. 24Panongu gholo milakhi Ijipmino ghimeqhi aghikeu pano ithulu kelo, pano aghime sholuakeu saphu eno Ijipmi hu heqhi pithive. 25(Pano kumsukeuno Alhou no pa peitha puzu panongu xaphe ani kenapi pa thikuzumino ithivea kughashi ake, ikemu panonguye ti mthae.) 26Tishiwo thoghiu Israilmi kini kichighi aghikeu pano ithulu, eno pano pama dolo kulashive tsuniye shi. pano ishi pi, ‘Nitimi nokujo, nokujoye athikuzumi puzu kushiye lakhino lakhi ghimeqhi ani kya?’ 27Ikemu pama dolo akumou shi akeu huno Muse tuha peveno pi, ‘Khuno opelo ni shou ayehkipeu eno kughakuthau shipe kya? 28Nono ighina Ijipmi heqhi pithivekeu hutoi nighi heqhi pithiveniye kesha?’ #Ipe 2.11-15 29Muse no hi chilukelo paye Ijip lono pove eno Midian yeghilo acheuve. Eno tilauno anu kini shie. #Ipe 18.3-4

30“Ampe lhobidi wovekethiu, kungumi lakhino asuminipholo ami mili iquakeu lono pa lau ipeghi piye, tiye Sinai naghuto phivilo timi kughunamoke-a lono. 31Hi ithulukelo Muse ye akichiqhive, eno ti jukutojuni aye tipau phivilo wu. Ikemu Ampeu sutsa pano ishi chilu: 32‘Niye osunoqo Lhou ke, Abraham, Isak eno Jakob Lhou ke.’ Muse ye akumsano khokhoshive eno junikeu ighuve. 33Tile Ampeu no pa vilo pi, ‘Opukhu kuqho xavelo, kughengu khipa alo nono puthugho ani keno tiye akimthe-a ke. 34Iwu timi Ijip lo akeqo kishi ghimeqhi ani keno ino tsaqui ithuluva, eno panonguno igha kukuno akeu chiluva, eno panoqo xaphe nike niye iqighi ani. Ike noye kutolo, eno ino Ijip lo opuwu nike.’ #Ipe 3.1-10

35“Muse khuu panonguno ‘Khuno opelo nishou ayehkipeu eno kughakuthau shipe kya?’ ipi kileqhive kehu kungumi vechewo asuminipho lono Alhou no pa lau ipeghipiye eno xaphekuluu shipeniye Alhou no pa puwu. #Ipe 2.14 36Pano Ijip lono timiqo sasu ipe, eno Ijip yeghilo ngo Akuhu Zughilo eno ampe lhobidi timi kughunamoke-alo pano amchipu eno akumzapu shishe mla. #Ipe 7.5; 14.21; Akiki 14.33 37Israilmi vilo ishi pikeu hu Muse noke, ‘Alhou no nongu ghenguno tungkupu lakhi pano isaputhu kehutoi nongu gholo ipeghipe nani.’ #Zaki 8.15-18 38Asayeqhalo Israilmi kuhokumqo kelo panongu sasu akeuhu pake. Pano kungumi sasu Sinai naghutolo nongu putsa eno nisunoqo ghi sasu ngono kuptsake. Ningu tsuniye akuxupi sutsa peighi keuhu panoke. #Ipe 19.1—20.17; Zaki 5.1-33 39Nisunoqono pa gholunikeu pulomo eno pa tudapeve, eno panongu mloloye Ijip lo idewove nishikeu kumsuve. 40Ikehu panonguno Aron vilo pi, ‘Ningu zulo chechepe kepushi nisala alhou shipesu tsulo. Muse khuu ningu sasu Ijip lono saipeghikeno paye kiu shivekeno ninguye mthae.’ #Ipe 32.1 41Tishi puzu panonguno amshiti lakhi shipeqhi eno hipa julho lau akumllagho pesu mlla, eno panongu uno mlaqhilukeulo ahukulu shi aghulhu shi. #Ipe 32.2-6 42Ikemu Alhou no panoqo launo ighosu wuve eno panoqo pelo atsutsulo ayepu yesu akeqo mlla penikeu shivepe, ti tungkupmi kakulo ishi yepe puakeu hutoi,

‘O Israilmiqo, ampe lhobidi dolo asayeqhalo,

Nonguye Lhoxu heqhi eno akumllagho pesu ilau ighi kesha?

43Moe, ti Molek phi-ki nonguno pekishe che, eno nongu lhou Refan wu ayepu pekishe cheke.

Nonguno tipaqo lau itsaiqi mllaniye nongu likhi nonguno ajulho shipe qhike.

Ikehu Babilon nguno hukidiu ino nongu puwu nani.’ #Amus 5.25-26

44“Asayeqhalo nisunoqo gholo Alhou no sa-akeu phiki acheke.Tiye Alhou no Muse vilo shilo pikeu eno ayeh pa piyevekeu kiqi lono tipau shipe qhikeuke. #Ipe 25.9,40 45Tipashelo nisunoqono panoqo papuh launo tipau phi-ki pekishe sughi puzu, kughou Alhou no panoqo zulono ashiayeh kutamiqo haphevetsuno panongu pelo ngolu penikeu yeghilo, Joshua gholono tipau phiki pesu iloghi. David kutolo tishi ache. #Joshu 3.14-17 46Paye Alhou lopu shi, eno pano Alhou vilo iniju puzu Jakob Lhou ki lakhi kutotsu nikeu khu. #2 Samu 7.1-16; 1 Yeki 17.1-14 47Ikemu Solomon no Alhou ki lakhi shitsu. #1 Kuka 6.1-38; 2 Yeki 3.1-17 48Ikeghi, Alhou Akiqheuye timi uno shikeu kilo ngochemoe, tungkupuno ishi pike toi,

49‘Kungughaye ikughuqa-a eno ayeghiye ipukhu kinepu.

Nonguye ighenguno kiu ki shini kya? ipi Ampeu no pie.

Ikulho kiqhipu-aye kiu kya?

50I-u no hipaqo thime kumtsu mlake kumokesha?’ #Isa 66.1-2

51“Nongu aghekulukumomi, amlolo kusakugha eno Alhou sutsa chikumlamiqo. Nonguye nongu puasuqo toi kena, nongu ghi pulhapuju Aghungu Kimthe mujochile cheni. #Isa 63.10 52Nongu puasuqono kijipusamokeu tungkupumi khuu ani kya? Panonguno Alhou ghinimi khunoqono Alhou qeu Amikuchou ighi naniepi kutughuche keno tipaqo heqhi pithike. Itehiye nonguno pa kughape atheshive eno heqhiveke. 53Kungumi vechewo ikhiphetsukeu yezah nonguno ikhilu, ikeghi nonguye tipau gholumoe!”

Atu pesu Stifan Veqhi

54Judami Hoho lo ampimiqono Stifan no pikeu chilu puzu panonguye axuideve eno ahu tsughu bubushi amlo idewuve. 55Ikemu Stifan ye Aghungu Kimthe no agi teqhi-teleyi puzu, anhethi sukuqumono atsutsulo jupuku eno Alhou jukuvu ngo Alhou- u ajeu Jisu puthugho akeu ithulu. 56Pano ishi pi, “Julo! Atsutsu khaqhi akeu eno Alhou- u ajeu Timi nu kungughalo puthugho akeu ino ithulu ani!” 57Panonguno kumzapu shi igha puzu a-u pesu panoqo kini kujukhaluve. Tishieno panongu kumtsu kumtsa qhayi pa lau kohaighi puzu, 58aphughi lono pa sunhepheve eno atu pesu pa veqhi pithive. Tipaulo thopimiqono panoqo phi xapesu apumi lakhi Saul ipikeu pukhu philo qhive. 59Panonguno atu pesu Stifan veqhi akelo, paye Ampeu vilo ishi pia, “Ampeu Jisu, ikuxu ikhilutsulo.” 60Qhoqhunhe pesu pano ighamuku pi, “Ampeu hipau xine panoqo shou betsu kevilo.” Hi pive puzu paye thive. Saul ye Stifan pithive keulo pulokuqhatsu ae.

Currently Selected:

APOSTOLMI 7: SUMIBSI

Highlight

Copy