APOSTOLMI 6

Kuphunikemi Tsuni Kishelu

1Tishiwo kusho kumolo, apapemi alau shi ikowove kehu Grik tsa kipimi Judami ngo Ibri tsa kipimi Judami dolo mutomushukeu ipeghive. Grik tsa kipimi Judamiqono pikeuno atsala atsalalo achuqupu kijetsu chekeulo panonguw chimemiqoye kughuchovetsu cheniepi pike. 2Ikehu apostolmino apapemi amuqo kumtsu kukutsuno pi, “Ninguye Alhou tsa pesu asheshu nikeu kughuchove puzu achuqupu kutotsukeu shiauve nikeuye achipi kumoe. 3Tishiaye, athikuzumiqo nongu gholono timi akivimi khunoqo Aghungu Kimthe eno alokutsu chhitoi ani keno mitsuni kishephelo, eno ninguno panoqo pelo hipa kumlapu saje peithaluve penike. 4Ninguye akighini eno asheshukeu kumlalo ado kumtsu puwokeu shinie.” 5Hipau tsalo aqo kuchopuno aloqilu, ike panonguno hipaqo kishelu: Stifan, paye akupulu ngo Aghungu Kimth no chhitoikemi, Filip, Prokhora, Nikanor, Timon, Permena, Antiokmi Nikola paye Judami chine lono pekidelukemi ishi kishelu. 6Timiqono sawo apostolmi zulo qhi, eno panonguno panoqo shou a-u beno inikhu tsue.

7Ike Alhou tsa alaushi vekuphawove. Jerusalem lo papeluvekemi kikihi kutomo alaushi ikowove, achinemi ghi kutomono hipau kupuluyeh ikhiluve.

Stifan Kughaluvekeu

8Stifan ye Alhou no kumgha kupukeu eno akukano chhitoi puzu timiqo gholo amchipu eno akumzapu kije shiphelu ae. 9Ikemu Aghoshi Sinagog ipi kuchekeu lo kihikusumi Kuriniami, Aleksandriami, Kilikiami, Asiami ighi kumqono lachile Stifan sasu kighethu. 10Ikemu panonguye Stifan no Aghungu lokutsu lono pikeulo ghechilemlave. 11Tileno panonguno timi khami chuxuveno tipaqo pelo ishi pipe. “Pano Muse ngo Alhou thaighakeu tsa pikeu ninguno chilue!” 12Panonguno timiqo, sakiphemi, Ayezah kukutsumiqo xukutho sasu Stifan lau ighieno pa tsuquluve puzu pa sasu Judami Hoho zulo sawu. 13Panonguno akimki shepe kughu pua puzu tipaqono ishi pi, “Timi hipauye pulhapuju ningu wu akimthe chineki ngo Muse yezah shou atsa kumo piachenie. 14Pano pikeu nino chiluke Nazaretmi Jisu hipauno achineki xaqhive nani eno Muse launo ninguno itehi kutolo pepimhe ighikeu akhu- ayeh kumtsu kilive nani ipike. 15Ahoholo iqakemi kumtsuno anhethi sukuqumono Stifan jua eno pa gi ye kungumi gi toi panonguno ithulue.”

Currently Selected:

APOSTOLMI 6: SUMIBSI

Highlight

Copy