APOSTOLMI 8

Saul no Akukuhou Kijipusa

1Tipanino Jerusalem lo akukuho shou shishe akijipusakeu ipeghive. Apostolmi thono kupulumi kutamiqoye kumtsu Judia ngo Samaria bocholo apanagha kohave. 2Amlo tsuqhiyi chekemino Stifan kumo qhovetsu eno pa ghenguno shishe ighamuku mloqae. 3Tishi akelo, Saul ye akukuho kutsaniye pukaputsa ae. Pano aki kumtsulo ilo puzu kupulumiqo kiptimi ngo totimi sunhekiti sasu ipe puzu akughukilo sunhesu. #Aposto 22.4-5; 26.9-11

Atsakiviu Samaria lo Asheshu

4Kupulumi khunoqono apanagha wuve keno aqha kumtsulo atsa pesu vekupha wove. 5Filip no Samaria phughilo iqi eno Khristo ghili pesu panoqo lau asheshu. 6Aqokitikhino khekulhoshi puzu Filip no panoqo vilo pikeulo amlo tsuno pa tsa ini eno pano amchipu kumla shikeu ithulu. 7Timi kutomo launo tughakusano ighamuku igha puzu panoqo launo ipeghi; eno aghi anhu thivekemi ngo apukhu kinitavekemi ishi ghi shipivi. 8Ikehu Samaria phughilo alokivino chhitoi ae.

9Tipau phughilo timi lakhi ache paje Simon, paye puzuu tipa phughilo kuduwu shi pesu timiqo shikichi mamave cheke, eno pa ghi akhotomi kepi picheke. 10Timiqo kumtsu aku-amighiu lono akiqheu kutolo pa phesughi ache. Panonguno ishi piche, “Alhou Akijeu ipi chekeu hu pake.” 11Pano pawu kuduwu shikeu pesu ado kushuwalo panoqo shikichimama chekehu panonguno pa phesu ache. 12Ikemu Filip no Alhou yehkipe wu Atsakiviu eno Jisu Khristo je pesu panoqo lau asheshukeulo panonguno puluve puzu panongu kiptimi ngo totimi ishi baptiz shilu. 13Simon ampighi pululuve; eno baptiz shilu kethiu paye Filip phemono pa gholo iqho-iqi ae. Akumzapu eno amchipu kumla shishe shilu akeu ithulu puzu Simon ye akichiqhive.

14Samariami no Alhou tsa ikhilu ani pikeu Jerusalem lo apostolmino chilukelo, panonguno Pitor ngo Johan pama piqi. 15Pamano iqighi puzu panoqo pelo Aghungu Kimthe sasulu penike inikhutsu, 16kughengu Aghungu Kimthe panoqo shou ikughimono ae. Tikutolo panonguye Ampeu Jisu je likhi lono baptiz shipuaphi. 17Tileno Pitor ngo Johan pamano a-u chho pesu panoqo shou be, eno panonguno Aghungu Kimthe sasulu. 18Kughou apostolmino a-u chhopesu bekeu vechewo Aghungu Kimthe tsukeu Simon no ithulukeno, pano pisa pesu pama tsupuzu 19pi, “Hipau kuka nighi itsulo, tishianguno ino khunoqo shou i-u benikeno Aghungu Kimthe sasulu penike.” 20Ikemu Pitor no pa vilo pi, “Owu pisa ghi ogholono puhavelo, kughengu nono kumsu keuno pisa pesu Alhou no kumsagho tsukeu qhulu nani kughashike. 21Hipatsalo osala momu osaje kuhae kughengu Alhou zulo omlo achipi kumoe. 22Alhoksa hipau lono xakide ighivelo eno Ampeu vilo inikhulo, tishianguno shikulupu shi aghiaye omlolo kuchughupe akeu olauno pevetsu penike. 23Kughengu ino ithuluke nheshunheghuno oghupe ani eno kusakughano otshupe anie.” 24Simon no ishi khochile, “Nongu kumtsu ighenguno Ampeu vilo inikhulo, tishianguno nono pikeu hipaqo lakhimu ishou ighi pemonike.”

25Pamano Ampeu tsa pi eno pama shepe tsuvekethiu pamaye Jerusalem lo idewove eno wuchekelo Samariami phu kutomolo atsakiviu pesu asheshue.

Filip ngo Ethiopiami Kijemi

26Ampeu wu kungumino Filip putsa puzu pi “Ithu kutono apeu wulo, ti Jerusalem lono Gaza lo wukeu lalo.” (Hipa laye pulamovae) 27-28Ike Filip no ithu kuto puzu wu. Tile Ethiopiami lakhi Jerusalem lo Alhou mllaniye wuno idewo cheghi. Paye khashi shivekemi, Ethiopiamiqo shou Akukaliu Kandake wu akini khuki jukutsu chekemi kijemi lakhike. Pawu khurkululo iqano tungkupu Isaya kaku phiche. 29Ike Aghungu Kimthe no Filip vilo pi, “Wu puzu hupau khurkulu kupunu chechelo.” 30Filip no tilau posu wu ike timi huno Isaya tungkupu kaku phiakeu chilu, ikehu ishi pa vilo iniju, “Nono kiu phi cheni keno noye ti ithikuthulu anima?” 31Akijeu huno ishi khochile, “Khunoala ikichepiyetsumo aye niye kishi ithikuthuluni kya?” Eno pano Filip vilo ikughi puzu pa gholo iqalepi pi. 32Pano kuchoyesu phichekeu kihe doye hike:

“Paye Bheri lakhi toi pa ghiqhipe kepushi sawupe;

Pa ye Bheritino amhi gholukeu zulo ighamoke toi;

Pa ye atsa lothi lakhimu piqhimoe.

33Pa sukujokijiqhi eno achipiu xakutha pa tsumoe.

Khunomu pa lagha piluni chemoe,

kughengu ayeghilo pa kuxu pukahvetsu.” #Isa 53.7-8

34Khashishivekemi huno Filip vilo pi “Ivilo pitsulo, tungkupuye khuno vehu pi ani kya? Pa likhi pa piani keo kutami khuala ghili piani kya? 35Filip no tileno pithu, hipau kuchoyesu kihedo lono huthu puzu Jisu ghili Atsakiviu pesu pa vilo lhepiye. “ 36Panonguno chesusu iqichekelo azu akeu-alo ighi, ike khashishivekemi huno pi, “Julo, azu hi ani. Baptiz shiluve nikeulo kiualano ilakha kepu ani kesha?” [37Filip no pa vilo pi, “Omlo kuchopu pe pulu aghiaye noye baptiz shilu nani.” Timi huno pi, “Jisu Khristo ye Alhou Nu kepi ino pulu ani.”] 38Khurkulu ngolepi pano ahza tsu eno Filip ngo akijeu pama kinikujo iqi puzu azulo ilo, eno Filip no pa baptiz shitsu. 39Kughou pamano azu lono ashou ipeghi keno Ampeu Ghunguno Filip sunhepe wuve. Akijeu ye pa ithulukithe move ikemu alokivi shi pano wuchekelau wuve. 40Filip no pa likhi paye Azotus toluve aghikeu ithi, eno pano Kaisaria taun tomoke kuto taun lakhi khi hechesu wuke kumtsulo atsakiviu pesu asheshu.

Currently Selected:

APOSTOLMI 8: SUMIBSI

Highlight

Copy