MARK 13
13
Olive taang a thusoi: Pathian biahinn siat diing leh hun tawpna diing soilawhna
1Huleh Pathian biahinn a kipana a pawtdohin a nungjuite laha khat in a kawmah, Houtupa, en dua, a suang te bang tobang hi a, huleh a innte haw bangchitah a loupi a taimah! a chi a. 2Huin Jesu’n a dawng a, a kawmah, Hi inn loupite na mu maw? suhchim louh a, suang khat tunga khat kichiang mawngmawng hi-ah a um sih diing, a chi a. 3Huleh Olive taang a Pathian biahinn zawna a tou laiin, Peter toh Jakob toh, John toh Andru in a guuhin a kawmah, 4Hi silte bang chih chiangin ahung tung diai? huleh hi silte hung tun diing chiangin chiamchihna bang ahung um diai? hung hilhin, chi'n a dong va. 5Huleh Jesu’n amahuh a dawng a, a kawmvah, Koima’n ahung heem louhna diingun pilvaang un. 6Ajiahchu, Kei Khrist ka hi, chi'n mi tampi ka minin ahung diing va, mi tampi a heem diing uh. 7Huleh gaal thute leh kidou thuthangte na jah hun chiangun lungdong sih un; hute chu hung tung diing mawng ahi: hizongleh a tawpna chu ahi nai tadih sih diing. 8Ajiahchu nam tuam leh nam tuam a kidou diing va, gam tuam leh gam tuam a kidou diing uh; huleh mun tuam tuam ah ziil a kiliing diing a, kialte leh buainate a tung diing: hi silte chu gentheihna kipatna ahi. 9Hizongleh kipilvaang un; ajiahchu vaihawmtute khutah ahung pedoh diing va, kikhopna innte ah ahung vo diing va; huleh keimah jiahin houtute leh kumpite ma ah amah uh heetsahna diingin a hung kipui diing hi. 10Huleh Tanchinpha chu nam zousiah kawmah soi masat ahi diing hi. 11Hizongleh ahung pui va, ahung piahdoh hun chiangun bang ka soi de aw chi'n ngaihtuah khawl sih unla; a huntaha hung kipia chu soi zaw un; ajiahchu a soitu nanguh hilouin, Hagau Siangthou ahi zaw ngal a. 12Huchi'n unaupa in unaupa thah diingin a mansah diing a, huleh pa in a ta; huleh tate’n a nulepate uh a dou diing a, a thatsah diing uhi. 13Huleh ka min jiahin mi zousiah huat na hi diing uh; hizongleh a tawp dong a thuaah tawntung zou, hu mi ngei chu huuhhing in a um diing hi. 14Hizongleh zawlnei Daniel in ana soi, sumangtu kihdahum chu a din louhna diing a ding na muh chiangun, (a sim photin a umzia he heh) hu hun tah chiangin Judia gam a umte taang ah tai u’heh. 15Huleh inn tunga um zong kum sih heh, a inn sunga thuampua umte ladoh diingin zong va luut sih heh; 16Huleh lou a um chu a puan la diingin kiih kiit sih heh. 17Hizongleh hu lai huna gaai leh naunou pomte tung a gih hi! 18Huleh hu lai hun chu phalbilai ahih louhna diingin haamtei un. 19Ajiahchu hu nite ah gimthuaahna a um diing, hutobang gimthuaahna Pathian in leilung a siam chiila kipan tuni tanin a um ngei nai sih a, um zong a um nawn sih diing hi. 20Huleh Lalpa’n hu nite chu sutom sih henla hileh, mi mawngmawng hingin a suahta sih diing uh; hizongleh miteel, a teeltuamte jiahin a nite chu a sutomta hi. 21Huleh hu hun chianga mi khat pouh in na kawm va, En un, hi ah Khrist a um, aha ahihlouhleh, en un, hutah ah a um, a chih uleh tahsang sih un. 22Ajiahchu Khrist tahlou leh zawlnei tahlou ahung pawt diing va, hute’n chu chiamchihnate leh silmahte ensah in, hithei lehouh teelte nasan a heemkhe diing uh. 23Hizongleh kipilvaang un: ngai un, sil zousiah ka hung hilh masata hi.
Lalpa loupitaha a hung kiitna diing
24Hizongleh hu nite a, hu hahsatna tun zoh chiangin, ni chu a mialta diing a, huleh ha zong a vaah nawn sih diing. 25Huleh vaan aahsite chu ahung ke diing a, vaan a um silbawl theihnate chu a kiliing diing hi. 26Huleh hutah chiangin mihing Tapa chu silbawltheihna nasatah leh loupina toh meipi laha hung a mu diing uh. 27Huleh hutah chiangin ama’n a vaansawllehte a sawlkhe diing a, a teelte, kawlmong li a kipan, lei tawp a kipanin vaan tawp dongin a khawmkhawm diing uhi. 28Huchi'n theipi kungah tehkhinthu zil un; a ba ahung dot a, a nah ahung sel chiangin nipi a naita chih na he uh. 29Huchimahbangin hi silte ahung tun na muh chiangun, amah ahung naita, kotkhaah bul ngei ah ahung tungta, chih he un. 30Chihtahzetin ka hung hilh ahi, hi sil zousiah a tunkim masiah tulai khang thahte a bei sih diing uh. 31Vaan leh lei a bei diing a: ka thu ahihleh a bei sih diing hi. 32Hizongleh hu ni leh hu huntah chu, Pa chauh loungal, koimah in, vaan a um angelte’n zong, Tapa in zong a he sih hi. 33A hun diing na heet louh jiahun pilvaang unla, kiging zinga um in haamtei un. 34Bang jiahin ahiai i chih leh mihing Tapa chu, mi khat a inn nusia a, a suaahte kawma thuneihna pia a, huleh a natoh diing uh pe chiat a, khual gamlapi a va zin bang ahi. 35Hujiahin kiging zing un; ajiahchu inn neitupa hung diing hun, nitaah lam aha, jan khang lai aha, aahkhuan in aha, ahihlouhleh jingkal in aha chih na he sih uh. 36Huchilou inzaw thakhata hungin ihmu in ahung mukha diing hi. 37Huleh na kawm va ka soi chu mi zousiah kawma ka soi ahi, Kiging zing un, a chi hi.
Currently Selected:
MARK 13: SIMTBSI
Highlight
Share
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.
