MARK 12

Grephuan tehkhinthu

1Huleh ama’n a kawmvah tehkhinthu in thu a soi panta a. Mi koi aha in grephuan a bawl a, daai in a uum kimvel a, greptui suuhna kokhuuh a lai a, innsaang khat a lam a; louhoute kawmah hohloh diingin a pia a, huleh khual gamlapi ah a chiahta hi. 2Huleh a gah loh hunin, hu an a gah a tan diing chu lou houte kawm apat va la diingin louhoute kawmah suaah khat a sawl hi. 3Huleh amahpa chu ana man va, a vua va, khutguaahin a sawl kiitta uh. 4Huin ama’n suaah dang khat a sawl kiit a; amah chu suang in ana sep va, a lutang ana suliam va, zumhuaitah a na bawl in a sawlmangta uhi. 5Huin ama’n a dang khat a sawl kiit a; amah chu ana that va, huleh a dangte tampi zong khenkhat a vua va, khenkhat a that uhi. 6Huleh ama’n tapa deihtah khat a neih nahlai jiahin, Ka tapa chu a zahtaat diing uh, chi'n a nunungpen in amah zong a kawmvah a sawlta hi. 7Hizongleh hu louhoute’n, Hichu a gouluah diingpa ahi; hungun, i that diing uh, huchi'n a gouluah diing chu ei a ahi mei diing, a chi va. 8Huchi'n amah chu a man va, a that va, huleh grephuan polamah a paaita uhi, 9Hujiahin grephuan neitu in bang a lohta diai? Amah chu ahung diing a, louhoute chu a sumangthai diing a, huleh grephuan chu mi dangte kawmah a pe diing hi. 10Hi Pathian lehkhabu thu, Inn bawlte’n a suang deih louh u’chu a ning a suang poimohpen ahung hita hi. 11Hichu Lalpa bawl ahi a, huleh i mitmuh un a limdang hi, chih na simkha sih viai mah? a chi a. 12Huin hu tehkhinthu chu amahuh dem a, a soi ahi chih a heet jiahun amah chu mat a tum va, hizongleh mite a lau uhi; huchi'n amah chu a nusia va, a chiahta uhi.

Kaisar kawma siah tawi thu a dotna

13Huleh amahun a thusoite a man diingin, Pharisaite hunkhop leh Herod pawlte hunkhop a kawmah a sawl va. 14Huleh amahun ahung tunun, a kawmah, Houtupa, nang hi midihtah na hi a, mi koimah na giing sih hi; ajiahchu mi maaizahtuam na nei sih a, dihtahin Pathian lampi thu na hilh jel, chih ka he uh; Kaisar kawma siah tawi dih ahiai, dihlou? 15Pe diing ka hi viai, ahihlouhleh pe lou diing ka hi viai? a chi va. Hizongleh ama’n a lepchiahdan uh a he a, a kawmvah, Bang diinga hung ze-et na hi viai? makhai khat hung tawi un, ka en diing, a chi a. 16Huin ahung tawi va. Huleh ama’n a kawmvah, Hi koi lim leh koi min ahiai? a chi a. Huleh amahun, Kaisar a, a chi uh. 17Huin Jesu’n a dawng a a kawmvah, Kaisar silte chu Kaisar kawmah pia unla, Pathian silte chu Pathian kawmah pia un, a chi a. Huin amahun limdang a sa mahmah uhi.

Thohkiitna thu a dotna

18Huleh Sadukaite, misi thohkiitna a um sih chitute a kawmah ahung va, 19Houtupa, Mosi in, Mi khat a unaupa sita henla, a ji ta nei louin nuse leh, a unaupa in a ji a luah diing a, a unaupa diingin chi a haahsah diing ahi, chih ahung gelhsah hi. 20Tuin unau pasal sagih a umta a, a upapen in ji a nei a, huleh chi haah nei louin a si hi. 21Huin a nihna in amahnu a nei a, chi haah nei lou mahin a si jel a; huleh a thumnapa zong huchimahbangin. 22Huchi'n a sagih un a kiteenpih chiat va, chi haah nei louin a sivehta uh; huleh a tawp ah numeinu zong a sita hi. 23Ahihleh misi lah apat thohkiit nia ahung thohkiit chiangun a lah va koi pen ji a hita diai le? a sagih un a kiteenpihkha chiat ngal va, chi'n a dong va. 24Jesu’n amahuh a dawng a a kawmvah, Pathian lehkhathu leh Pathian silbawltheihna na heet zawh saang uh a um louh jiahtah a bawl khial hilou na hi uh maw? 25Misi laha kipan a thohkiit chiangun, a kiteeng nawn sih diing va, teeng zong a kiteengsah nawn sih diing uh; vaan a um angelte bang ahita diing uhi. 26Huleh misite kaihthoh a, a um diing uh thu, Mosi lehkhabu ah, loubawh laha Pathian in, Kei Abraham Pathian, Isaak Pathian, huleh Jakob Pathian ka hi, chi a, a houpihdan sim lou na hi viai mah? 27Amah chu misi Pathian ahi sih a, mihing Pathian ahi zaw hi; hujiahin na he khial mahmah uhi, a chi hi.

Thupiah lianpen

28Huleh lehkhagialtute laha khat a hung a, a kinial uh a ja a, Jesu’n amahuh dihtahin a dawng chih a he a, a kawmah, Thupiah zousiah laha lianpen khoikhu ahiai? chi'n a dong a. 29Huin Jesu’n a dawng a, Thupiah zousiah laha lianpen chu, Aw Israel, ngai un; Lalpa i Pathian u’chu Lalpa khat ahi; 30Huleh Lalpa na Pathian chu, na lungtang zousiah a, na hinna zousiah a, na lungsim zousiah a, huleh na haatna zousiah a na lungsiat diing ahi, chih ahi: hichu thupiah masapen ahi. 31Huleh a nihna chu hi ahi, Nangmah na kilungsiat bang a na innveengte na lungsiat diing ahi. Hite sanga lianzaw thupiah mawngmawng a um sih hi, a chi a. 32Huin lehkhagialtupa’n a kawmah, Ahi, Houtupa, na soi dih ngei mei; Pathian khat chauh a um a, amah chih louh a dang a um sih; 33Amah chu lungtang zousiah a, heetsiamna zousiah a, hinna zousiah a, huleh haatna zousiah a lungsiat a, huleh eimah i kilungsiat banga i veengte lungsiat chu haaltum sillat leh kithoihna zousiah sangin a hoihzaw hi, a chi a. 34Huleh ama’n piltaha, a dawn Jesu’n a muh in a kawmah, Pathian gam apat na gamla sih hi, a chi a. Hunungsiah chu koima’n thu mawngmawng a dong ngamta sih uhi.

Khrist David tapa hihdan dotna

35Huleh Jesu’n Pathian biahinn a thu a hilh laiin, amahuh a houpih a, Lehkhagialtute’n, Khrist chu David tapa ahi, bangchidan a, a chih uh a hiai? 36Amah David ngei in Hagau Siangthou in, Lalpa’n ka Lalpa kawmah, Na meelmate na keeng ngahna a ka bawl masiah ka jiatlamah tou in, a chih, a chi ngal a. 37Hujiahin David ngei in amah chu Lalpa a chih ahi; khoi a kipan a, a ta hi a ta diai le? a chi a. Huleh mipi vaantaang in kipaahtahin a thu a ngaikhia uhi. 38Huin ama’n a thuhilhna ah a kawmvah, Lehkhagialtute lahah kiveeng un, amahuh chu puantual silh a vaah, huleh dawl muna chibai buuh bang a ut uh. 39Huleh kikhopna inn a touphah hoihpen leh, gual vaahna a mun hoihpen bang a ngaina biih uhi. 40Meithaite innsung a negam va, huleh a heem in sawtpipi a haamtei uh; hite’n chu siamlouh tana lian sem a mu diing uhi, a chi hi.

Meithainu thohlawm piah

41Huleh Jesu chu sumkholna zawnah a tou a, mipite’n sumkholna a, a sum khiahdan uh a en a; huleh mi hausa tamtahte’n tampipi a khia uh. 42Huleh meithainu zawngtah khat a hung a, sumeng dangka nih a khia a; huchu paihsa khat toh kibang ahi. 43Huin ama’n a nungjuite a kou a, a kawmvah, Chihtahzetin ka hung hilh ahi, sumkholna bawma sum khete zousiah sangin, hi meithainu zawng tahin a khe tampen hi. 44Ajiahchu amahuh zousiah in a neih val uh a khia uh ahi a; hizongleh hi meithainu in chu a neih zousiah, a kitunhingna diing teng a khe veh ahi, a chi hi.

Currently Selected:

MARK 12: SIMTBSI

Highlight

Copy