MARK 11

Jesu Kumpi banga paahtawi a Jerusalem a luutna

1Huleh Jerusalem kawm, Olive taanga Bethphage leh Bethani khua a tun un, a nungjuite laha mi nih a sawl a. 2Huleh a kawmvah, Na mazawn va khua ah va chiah unla; huleh a sunga na luuttah uleh, sabiltung nou kikhit, a tung a koimah tuan ngei louhna khat na mupah diing uh; huchu hung suut unla, hung kai un. 3Huleh mi koi aha in na kawm va, Bang diinga na suut uh ahiai? ahung chih leh, Lalpa’n a mamoh ahi; ahung thah kiitpah na diing, chi un, a chi a. 4Huin amahuh chu a chiah va, innpua kot bula lampi nih kisuhtuahna a sabiltung nou kikhit chu a mu va; huleh a suut va. 5Huleh hutaha ding koite aha in a kawmvah, Bang diinga sabiltung nou suut na hi viai? a chi va. 6Huin amahun a kawmvah Jesu’n thu a piah bangin a soi va; huchi'n a chiahsahta uh. 7Huin amahun sabiltung nou chu Jesu kawmah ahung pui va, a tung ah a puan uh a phah va, amah chu a tung ah a tuangta hi. 8Huin mi tampi in lampi ah a puante uh a phah va, a dangte’n lou a sawlbawh saat in lampi ah a phah uhi. 9Huleh malama paite leh nunglama juite’n, Hosanna; Lalpa mina hung pai chu a hampha hi. 10Lalpa mina hung tung diing i pu David lalgam chu a hampha hi; Tungnungpen ah Hosanna, chi'n a kikou uh. 11Huin Jesu chu Jerusalem ah Pathian biahinn ah a luut a; huleh sil zousiah a et kimvel zohin, nitaahlam zong ahung hita a, sawmlenihte toh Bethani khua ah a chiahta hi.

Theipi gahlou

12Huleh a jingin Bethani a kipan ahung un, a gil a kialta a; 13Huleh theipi kung nah nei gamlapi a umkhat a mu a, a gah ka muh khaah leh chi'n a va zu an a; huleh a tun in a nah loungal bangmah a mu sih; ajiahchu theipi gah hun ahi sih hi. 14Huin Jesu’n a houpih a, sing kawmah, Tunungsiah bangchihtanin koima’n nang apat gah ne nawn sih heh, a chi a. Huleh a nungjuite’n huchu a ja uhi.

Jesu’n Pathian biahinn a suhsiangna

15Huleh Jerusalem khua ahung tung va; Jesu chu Pathian biahinn ah a luut a, biahinn sunga sil zuah leh leite a nohdoh panta a, huleh sum hengtute dohkaante leh, vakhu zuahte touna a sawnpuuhsah hi. 16Huleh mi koimah in Pathian biahinn a van a luut paisuaahpih uh a phal sih. 17Huleh ama’n a kawmvah, Ka inn chu nam chin diing a haamteina inn a kichi diing, chi a kigial hilou ahiai mah? hizongleh nangun gutate khuuh in na bawlta uh, chi'n a hilh hi. 18Huleh lehkhagialtute leh siampulalte’n hichu a ja va, amah suhmang na diing lampi a hawlta uh; ajiahchu mi zousiah in a thuhilh limdang a sah jiahun amah a lauta uhi. 19Huleh nitaah lam ahung hihin khopi a kipanin a pawtdohta hi.

Ginna silbawltheihna

20Huleh jingkal a ahung paikawm un theipi kung chu a zung apat a gogawp chu ahung mu va. 21Huleh Peter in hung hedoh in a kawmah, Houtupa, en dua, theipi kung na haamsiat chu a gogawpta hi, a chi a. 22Huin Jesu’n a dawng a, a kawmah, Pathian gingta un. 23Ajiahchu chihtahzetin ka hung hilh ahi, Mi koipouh in hi taang kawmah, Kituandoh inla, tui khang lian ah kipaai in, chia a lungtanga ginglel lou hial a, a soi chu hung tung ngei diing ahi chia gingta photmah in a soi photmah a mu diing hi. 24Hujiahin ka hung hilh ahi, Sil bangkim na deih phot uh, na nget chiangun, musa in kingai un, huchi'n na mu diing uhi. 25Huleh haamtei a na din chiangun, koi tung hitaleh thupoi bang aha na neih unchu ngaidam un; na pa uh vaan a um in zong na tatsualnate uh ahung ngaihdam theihna diingin. 26Hizongleh na ngaihdam louh un chu, na Pa uh vaan a um in zong na tatsualnate uh ahung ngaidam sih diing hi, a chi hi.

Jesu thuneihna a ginlelhna uh

27Huleh Jerusalem khua ah a luut kiit va; huleh Pathian biahinn sunga, a vaah lehleh laiin, siampu lalte leh, lehkhagialtute leh upate a kawmah ahung va; 28Huleh a kawmah, Bang thuneihna in ahiai hi silte na bawl? huleh hi silte bawlna diingin hi thuneihna kuan ahung pia ei? a chi va. 29Huin Jesu’n a dawng a, a kawmvah, Ke'n zong thu khat ka hung dong diing a, hung dawng un, huchi'n bang thuneihna in ahiai hi silte ka bawl, ka hung hilh diing. 30John baptisma hi vaan a kipan ahiai, mihing a kipan? hung dawng un, a chi a. 31Huin amahuh a kingaihtuah va, Vaan apat chi leilah, bang diinga amah gingta lou, ahung chi diing a; 32Hizongleh, Mihing apat chilei lah; mipite a lau ngal va, ajiahchu mi zousiah in John chu zawlnei hitahzet in a sep uh, a chi va. 33Huin amahun a dawng va, Jesu kawmah, Ka soi thei sih uh, a chi va. Huin Jesu’n a dawnna in a kawmvah, Ke'n zong bang thuneihna a hi silte bawl ka hih ka hung hilh diah sih diing, a chi hi.

Currently Selected:

MARK 11: SIMTBSI

Highlight

Copy