MARK 10

Kikhulna thu a dotna

1Huleh amah chu hu apat a kipandoh a, Judia gam kualsung Jordan gaal lampeh ahung tungta a; huleh mipite a kawmah ahung kikhawm kiit va; huchi'n ahih ngeimah bangin amahuh thu a hilh kiit hi. 2Huleh Pharisaite a kawmah ahung va, amah ze-etna diingin, Mi'n a ji a khul a siang ei? chi'n a dong va. 3Huleh ama’n a dawng a, a kawmvah, Mosi in nanguh bang thu ahung pia ei?’ a chi a. 4Huin amahun, Mosi in kikhulna lehkha gial a kikhul a phal hi, a chi va. 5Huin Jesu’n a dawng a, a kawmvah, Na lungtang khauh jiahun ahi ama’n hi thupiah nanguh diing a ahung na gelhsah. 6Hizongleh leilung kisiam chiila kipanin Pathian in amahuh pasal leh numei in a siam hi. 7Hi jiahin pasal in a pa leh a nu a nuse diing a, a ji a tu tinten diing; 8Huleh a nihun tahsa pumkhat ahung hita diing va; huchi'n nih hi nawn louin tahsa khat ahung hi zawta diing uh. 9Hujiahin Pathian in a gawmsa chu mihingin khen sih heh, a chi a. 10Huleh inn sungah a nungjuite’n hu thu mah amah a dong kiit va. 11Huleh ama’n a kawmvah, Mi koipouh in a ji a khul a ji dang a neih leh a ji a aangkawmsan ahi. 12Huleh numei in a pasal a khul a pasal dang a neih leh a aangkawm ahi, a chi a.

Jesu’n naupang neute a vangpiahna

13Huleh a khoih diingin naupang neute a kawmah ahung pui va; huleh a nungjuite’n ahung puite ana tai uh. 14Hizongleh Jesu’n hu a muh in a lungkim hial sih a, a kawmvah, Naupang neute ka kawmah hungsah unla, khap sih un; ajiahchu Pathian gam chu huchibang mite a diing ahi. 15Chihtahzetin ka hung hilh ahi, Mi koipouh naupang neu banga Pathian gam sang lou chu, a sungah a luut het sih diing, a chi a. 16Huin ama’n amahuh a pom a, a tung vah a khut a koih a, huleh a vangpiahta hi.

Tangval hausa khat in kumtuang hinna a hawlna

17Huleh lampi a chiah diing a a pawt laiin, mi khat ahung tai a, a ma ah a khupdin a, huleh a kawmah, Houtupa hoih, kumtuang hinna ka tan theihna diingin bang ahiai ka bawl diing? chi'n a dong a. 18Huin Jesu’n a kawmah, Bang diinga hoih hung chi na hiai? Khat chih louh hoih koimah a um sih, huchu Pathian ahi. 19Thupiahte na he vele, Aangkawm sin, tual that sin, Gu sin, Heetpihtu tahlouin pang sin, Mi heem sin, Na nu leh na pa zahbawl in, chihte, a chi a. 20Huin ama’n a dawng a, a kawmah, Houtupa, hihaw zousiah chu ka naupan laia kipana ka juih a hita, a chi a. 21Huin Jesu’n amah a en a, a lungsiat a, a kawmah, sil khat na sam nalai hi; chiah inla, na neih photmah zuah inla, migentheite kawmah pia in, huchi'n vaan ah gou na nei diing; huleh hung inla, kros pua in hung jui in, a chi a. 22Huin amahpa chu hu thu ah a maai ahung mualta a, huleh lunggim tahin a chiahmangta hi, sum tampi nei mi ahih jiahin. 23Huleh Jesu’n a en kimvel a, a nungjuite kawmah, Mi hausate diingin Pathian gam a luut hahsa hina mei e! a chi a. 24Huleh a nungjuite’n chu a thusoite thumah a sa thei mahmah va. Hizongleh Jesu’n a dawng kiit a, a kawmvah, Naute, hauhsatna muangte diingin Pathian gam a luut hahsa hina mei e! 25Mi hausa Pathian gam a a luut sangin, sangawngsaau phin bil vanga a luut paisuaah a baih zaw hi, a chi a. 26Huin amahun soi theih louh khopin thumah a sa va, Huchi ahihleh koi hutdam in a um zou diai? a kichi uh. 27Huin Jesu’n amahuh a en a, Mihing diingin hichu bawl gual louh ahi a, hizongleh Pathian diingin ahi sih; ajiahchu Pathian diingin sil zousiah a hithei hi, a chi a. 28Huin Peter in a kawmah, En in, kei un bangkim nusia in ka hung jui uh, chi'n a soi panta a. 29Huleh Jesu’n a dawng a, Chihtahzetin ka hung hilh ahi, Mi koi hitaleh keimah jiah leh Tanchinpha jiaha inn aha, unaupate aha, unaunute aha, pa aha, nu aha, ji aha, tate aha, huleh gamte aha nusia chu, 30Tu damsung ngeia sawinate toh innte, unaunute, nute, tate, huleh gamte a lehza a mulou diing a um sih uh; huleh khovel hung tung diing ah kumtuang hinna toh. 31Hizongleh mi tampi a masapente a nunung pen diing va, a nunungpente a masapen diing uh, a chi hi.

A sihna diing soilawhna thumveina

32Huleh amahuh chu Jerusalem khua a chiahtou in lampi ah a um va, Jesu chu a ma vah a pai a; huleh amahun limdang a sa mahmah va; huleh a juih pumun a lau va. Huin ama’n sawmlenihte a pui kiit a, a tung a sil hung tung diingte a hilh panta a, 33Ngai un, Jerusalem khua a chiahtou diing i hi uh; huleh mihing Tapa chu siampu lalte leh lehkhagialtute kawmah matsah in a um diing; huleh amah chu si diingin siamlouh a tangsah diing va, Jentelte khutah a pekhe diing uh; 34Huleh amahun chiamnuih bawlna in a zang diing va, a jep diing va, chil a siatkhum diing va, huleh a that diing uh; huleh a ni thum ni in a thou kiit diing hi, a chi hi.

Jakob leh John letpen utna

35Huin Zebedi tapate Jakob leh John a hung va, a kawmah, Houtupa, na kawma ka deih photmah uh hung bawlsah lechin ka chi uh, a chi va. 36Huin ama’n a kawmvah, Nanguh diingin bang hung bawlsah leng na chi viai? ana chi a. 37Huin amahun a kawmah, Na loupina ah, khat na jiatlam ah, khat na veilam ah hung tousah in, a chi uh. 38Hizongleh Jesu’n a kawmvah, Bang ahiai na nget uh na he sih uhi; ka nou dawn diing na dawn thei diviai? huleh ka baptisma tan diing zong na tangthei diviai? a chi a. 39Huin amahun a kawmah, Thei e, a chi va. Huin Jesu’n a kawmvah, Ka dawn diing nou chu na dawn ngei diing va; huleh ka baptisma tan diing zong na tang ngei diing uh; 40Hizongleh ka jiatlam leh ka veilama tou diing chu kei piah diing ahi sih a, a diing va kiguatsahte kawmah piah ahi zaw diing hi, a chi a. 41Huleh sawmlenihte’n hichu a jahun Jakob leh John tungah a lungkim sih mahmah meita va; 42Hizongleh Jesu’n amahuh a kou a, a kawmvah, Jentelte tunga vaihawm diing a kiguatte chu a tung vah a lal mahmah uh; huleh a mi lianteun a tung vah thu a nei mahmah mei chih na he uh. 43Hizongleh nanguh lahah huchibang ahi sih diing hi; mi koipouh na lah va a lian hih ut chu na natongtu un a pang diing a; 44Huleh mi koipouh na lah va lalpen ut chu mi zousiah suaahin a pang diing ahi. 45Ajiahchu mihing Tapa hiilhial zong natohsah a um diingin ahung sih a, natongtu diing leh mi tampite tatna diing a a hinna pe diingin a hung zaw hi, a chi hi.

Mittaw Bartimai suhdamna

46Huleh Jeriko khua ahung tung va; huleh a nungjuite leh mipi nasatah toh Jeriko khua apat a pawt laiun Timai tapa Bartimai mittaw chu lam gei ah khutdohin ana tou a. 47Huleh Nazareth Jesu ahi chih a jah tahin, Jesu, nang David tapa, hung khotuah in, chi'n a kikou a. 48Huleh mi tampi in amah chu sip diingin a khap va; hizongleh ama’n chu, Nang David tapa, hung khotuah in, chi'n a kihahkou sem hi. 49Huin Jesu chu a dinga, amahpa kouh diing thu a pia a. Huleh amahun mittawpa chu a kou va, a kawmah, Ha muangtahin um inla, thou in; ama’n nang ahung kou hi, a chi va. 50Huin amah chu a puansilh paai in a thou a, Jesu kawmah a hungta a. 51Huleh Jesu’n a dawng a, a kawmah, Na tungah bang bawl leng na ut ei? a chi a. Mittawpa in a kawmah, Lalpa, muhtheih ka ut hi, a chi a. 52Huin Jesu’n a kawmah, Chiahta in; na ginna in ahung damsahta hi, a chi a. Huin a mit ahung vaahpah a; lampi ah Jesu a juita hi.

Currently Selected:

MARK 10: SIMTBSI

Highlight

Copy