MARK 14

Jesu thah tum a thuphialna

1Huleh ni nih nungin chiahkaan kuut leh tanghou tolsoh louh kuut a um a; huleh siampu lalte leh lehkhagialtute'n amah chu doha bawl a, mat a, thah theihna diingdan a hawl va. 2Hizongleh kuut ni in hidah leh, huchilou inchu mipi buaina a umkha diing, a chi va.

Bethani khua a Jesu thaunuhna

3Huleh Bethani khua a Simon miphaahpa inn a um a, ankuang a, a tou laiin, numei khat, Alabastar bawma spiknard thau gimtui man tamtah tawi in a hung a; huleh amahnu’n a bawm chu a tatkeeh a, a lu ah a sungta hi. 4Huleh a lah vah lungkim lou khenkhat a um va, Bang diinga thau namtui kimawh suhbei ahiai? 5Hichu makhai zathum sanga tamzaw a zuah a, migentheite kawma piah theih diing ahi ngal a, a chi va. Huchi'n amahnu tungah a phunta uhi. 6Huin Jesu’n, Amahnu chu a umum in umsah un, bang diinga subuai na hi viai? ka tungah na hoih a tong ahi. 7Ajiahchu migentheite na kawmvah a um zing va, na ut hun teng un na panpih thei uh; hizongleh kei chu na kawmvah ka um zing sih hi. 8Amahnu’n a bawl theihtawp a bawlta ahi, ka sapum vui diing a thau hung nuh khawl ahi. 9Chihtahzetin ka hung hilh ahi, khovel pumpi a hi tanchinpha kisoina phot ah hi amahnu sil bawl zong a heetzingna diingin a kisoi diing hi, a chi a. 10Huleh sawmlenihte laha khat, Juda Iskariot chu amah mansah diingin siampu lalte kawmah a va chiah a. 11Huleh hikhu a jah tahun amah uh a kipaah va, huleh amah chu sum piah a chiamta uhi. Huin ama’n a matsahna diing lemtaang a hawlta hi.

Chiahkaan kuut ankuang luina

12Huleh tanghou tolsoh louh kuut ni masapen, chiahkaan kuut belaamnou a goh ni un, a nungjuite’n a kawmah, chiahkaan ankuang na neeh theihna diingin khoiah va bawl le ung na ut ei? a chi va. 13Huin ama’n a nungjuite nih a sawldoh a, a kawmvah, Khopi sungah va luut un, huchi'n pasal tuibeel pua khat in ahung tuaah diing a: amah chu jui un. 14Huleh a luutna penpen, hu inn neitu kawmah, Houtupa’n ka nungjuite toh chiahkaan ankuang ka neeh na diing uh mikhual pindan khoitah ahiai? a chih hi, chi un. 15Huchi'n ama’n pindan tungnung liantah, van umsa leh guatsa diam ahung ensah diing; hu ah ei uh diing bawl un, a chi a. 16Huin a nungjuite a chiah va, khopi sungah a luut va, huleh a kawm va a soi bangin a muta uh; huchi'n chiahkaan ankuang chu a bawlta uhi. 17Huin nitaah lam ahung hihin amah chu sawmlenihte toh ahung a, 18Huleh tou a, a neeh laiun Jesu’n, Chihtahzetin ka hung hilh ahi, An ka neehkhawmpih na lah va mi khat in ahung mansah diing hi, a chi a. 19Huleh amahuh chu a lungkham panta va, a kawmah, khatkhat in, Kei ka hi maw? a chi va, a banban in a dongta uhi. 20Huin ama’n a dawng a, a kawmvah, Sawmlenihte laha khat, kuang a ka an sawhkhawmpih ahi. 21Mihing Tapa chu a tanchin kigial bang ngei a chiah diing ahi a; hizongleh mihing Tapa mansah diingpa tung a gih hi! amahpa chu a pian a piang lou hileh amah diingin a hoihzaw diing hi, a chi a. 22Huleh a neeh laiun Jesu’n tanghou a la a, a vangpiah a, huleh a balkeeh a, a kawmvah a pia a, La unla ne un: hichu ka tahsa ahi, a chi a. 23Huin nou a la a, huleh kipaahthu a soi zohin, a kawmvah a pia a; a bawnun a dawn chiat uhi. 24Huleh ama’n a kawmvah, Hichu thuhun thah a ka sisan, mi tampite diing a luang chu ahi. 25Chihtahzetin ka hung hilh ahi, Pathian gam a a thah a ka dawn ni a tun masiah greptui ka dawn nawnta sih diing, a chi a. 26Huleh amahun la khat a sah zohun a pawtdoh va, Olive taang ah a chiahta uhi.

Jesu’n a nungjuite’n a taisan diing a soilawhna

27Huleh Jesu’n a kawmvah, Tujan chiangin na bawnun ka tungah na lunghilou veh diing uh; ajiahchu, Belaampu ka jep diing a, belaam hon chu a dalhjah diing uh, chih gelh ahi. 28Hizongleh ka thohkiit nung chiangin Galili gam ah na ma vah ka chiah diing, a chi a. 29Hizongleh Peter in chu a kawmah, A bawnun lunghilou veh zong le uh kei chu ka lunghilou sih diing, a chi a. 30Huin Jesu’n a kawmah, Chihtahzetin ka hung hilh ahi, Tuniin, tujan ngei in, aah nihvei a khuan ma in thumvei na hung kiheetmohbawl diing, a chi a. 31Hizongleh ama’n chu khauh semin, Nang toh sikhawm diing hizongleng ka hung kiheetmohbawl sih diing, a chi a. Huchimahbangin a bawnun a chi chiat uhi.

Jesu Gethsemani huan ah

32Huleh amahuh chu Gethsemani kichi mun khat ahung tungta va; huleh ama’n a nungjuite kawmah, Ka haamtei sungsiah hi-ah na tou un, a chi a. 33Huleh Peter toh, Jakob toh John a pui a, nasatah a thaphaangin a mangbang panta a. 34Huchi'n a kawmvah, Ka lungtang sihna khop hialin a lungkham hi, hi-ah ana um unla, kiging zing un, a chi a. 35Huin malamah themkhat a chiahsuan deuh a, tual ah a puuh a, ahihtheih leh hu hunin amah a pelh theihna diingin a haamtei a. 36Huleh, Abba, Pa, sil zousiah nanga diingin a hithei hi, hi nou hi kei apatin lamang in; hizongleh kei thu hilouin, nangmah thu thu hizaw heh, a chi a. 37Huin a hung a, amahuh chu ihmu in ahung mu a, huchi'n Peter kawmah, Simon ihmu na hi maw? daahkal khat zong kiging a um zou lou na hi maw? 38Heemna a na luut louhna diingun kiging zing unla, haamtei un. Hagau in chu a peih a, hizongleh tahsa chu a zawngkhal hi, a chi a. 39Huleh a chiahmang kiit a, a haamtei a, a chih ngeimah a chi a. 40Huin ahung kiihkiit a, amahuh chu ihmuin ahung mu jel a, (a ihmut uh a suaah mahmah jiahin) huleh amah dawnna diing zong a he sih uhi. 41Huin a thumveina in a hung a, a kawmvah, Tuin chu ihmu unla, khawlta un; a hunta hi, a hun zong a tungta; ngai un, mihing Tapa chu misualte khut a piahkhiah ahita. 42Thou un, i chiah diing uh; en un, kei hung mansahtu chu a naita hi, a chi a.

Jesu kimatna

43Huleh thu a soi laiin, sawmlenihte laha khat, Juda chu siampu lalte leh lehkhagialtute leh upate a kipanin namsaau leh khetbuuh tawi mipi nasatah toh ahung tungpah a. 44Huleh amah mansahpa in, Ka tawp penpen chu amah ahi, man unla, kituup tahin puimang un, chi'n chiamchihna a pe masa zouta a. 45Huchi'n ahung hun tahin a va naihpah a, Houtupa, houtupa, chi'n a tawpta a. 46Huin amahun a tungah khut a ha va, a manta uhi. 47Huleh a kawm va dingte laha khat in namsaau a doh a, siampu lalpen suaahpa a saat a, a bil a saatkhia hi. 48Huleh Jesu’n amahuh a dawng a, a kawmvah, Guta man diing bang hialin namsaaute leh khetbuuhte keng in kei man diingin na hung kuan uh maw? 49Ni chinin, biahinn ah thuhilh in ka um zinga, na hung man sih uh; hizongleh Pathian lehkhabu thu a taangtun ngei diing ahi, a chi a. 50Huin a bawnun amah a nusia va, a taita uhi. 51Huleh tangval koi ahakhat in, puannem khat chauh silh in amah a jui a; huleh tangvalte’n amah ana man va; 52Huin a puannem chu nusia in, a saguah in a taita hi.

Jesu Siampu lal ma a, a dinna

53Huin Jesu chu siampu lalpen ma ah a pui va; huleh amah toh siampu liante leh, upate leh, lehkhagialtute zousiah ahung kikhawm va. 54Huleh Peter in gamlapi ah, siampu lalpen inn sung tandongin a jui a; huleh suaahte toh a toukhawma, mei a awi hi. 55Huleh siampu lalte leh vaihawmna inn a um zousiah in Jesu a thah theihna diingun a heeh na diing a hawl va; a mu sih uh. 56Mi tam tahin zuauthu in a heeh va, hizongleh a heehna haw uh a kituaah sih. 57Huin mi koite aha a dingdoh va, zuauthu in a heeh va, 58Hi khuta bawl biahinn ka suse diing a, ni thum sungin khuta bawl louh a dangkhat ka lam diing, ama’n a chih ka ja uh, a chi va. 59Hizongleh huchi'n zong a heehna uh a kituaah thei tuan sih hi. 60Huin siampu lalpen a lai ah a dingdoh a, Jesu kawmah, Bangma a dawng lou maw? Hite hung heehna bangchidan ahiai? chi'n a dong a. 61Hizongleh amah chu a sip bihbeh a, bangmahin a dawng sih hi siampu lalpen in, Nang Hampha Tapa, Khrist chu na hi maw? chi'n a dong kiit a. 62Huleh Jesu’n, Ka hi; huleh mihing Tapa hi silbawltheihna jiatlama tou a, vaan meipi laha hung na mu diing, uh, a chi a. 63Huin siampu lalpenin a puante a botkeeh a, Heetpihtu dang bang diing i chi nalai diai? 64Pathian a soisiatdan na jata uh; bangchi na sa viai? a chi a. Huin a bawnun amah chu si taahin siamlouh a tangsahta uhi. 65Huin khenkhat in chil a siatkhum panta va, a maai a tuamsah va, khut in a su va, huleh a kawmah, Soi in, a chi va; huleh suaahte’n zong a khutpeeh un a beeng uhi.

Peter in Jesu a kiheetmohbawlna

66Huleh Peter chu nuai lama innpi huanga a um laiin, Siampu lalpen suaah nungaahte laha khat a hung a; 67Huleh amahnu in Peter mei awi a um a muh in, a en a, Nang zong Nazareth Jesu toh kilawi na hi, a chi a. 68Hizongleh ama’n chu kiheetmohbawl in, Ka he sih, na soi zong a ngaihna ka he sih, a chi a. Huleh inn liimah a va pawtdoh a, huchi'n aah a khuangta hi. 69Huleh nungaah khat in amah a mu kiit a, a kawma dingte kawmah, Hipa a lah va khat ahi, a chi jel a. 70Huleh a kiheetmohbawl kiit a. Huin tomkhat zouin a kawma dingte’n Peter kawmah, A lah va khat hijen te: ajiahchu Galilimi na hi a, na haam in zong a kihe hi, a chi va. 71Hizongleh ama’n, Hu na mihing soipa uh ka hekha sih, chi'n haamsia louin a kichiamta hi. 72Huleh a nihveina’n aah a khuangta a. Huin Peter in Jesu’n a kawma, aah nihvei khuan ma in thumvei na hung kiheetmohbawl diing hi, a chih thu a hedoh a ama’n huchu a ngaihtuahin a kapta hi.

Currently Selected:

MARK 14: SIMTBSI

Highlight

Copy