LUKE 5

Nungjui masate kouhna

1Huleh hichi ahung hi a, Pathian thu ngai diing a amah a bohbuai jiahun, Genesaret diil geiah a ding a; 2Huleh diil geia kuang nih um a mu a; hizongleh nga mantute chu a kuang uh nusia a, a leente uh sawp in a um va. 3Huleh kuang te laha khat, Simon a penah a tuangdoh a, a kawmah, piaugei apat themkhat tolhdeuh diingin a ngen a. Huleh a tou a, mipite chu kuang tung apatin thu a hilhta hi. 4Huleh a thusoi zohin Simon kawmah, Lithuuh lam naih inla, nga man diingin na leente uh sep un, a chi a. 5Huleh Simon in a dawng a, a kawmah, Houtupa, Jan kho vaahin gim tahin ka pang va, bangmah ka man sih uhi; hizongleh na thu in leen ka sep diing hi, a chi a. 6Huleh hichu a bawlzohun nga tampi a khuhkha va; huleh a leen uh keeh diing a kisa a. 7Huleh kuang danga tou a lawite uh hung a panpih diingin a khutjap va. Huin amahuh ahung va, huleh kuang te geel chu a sungdim uh a, huchi'n tum diing a kisa hialta hi. 8Simon Peter in hikhu a muh in Jesu keengbulah a puuh a, Lalpa, hung chiahsan in; ajiahchu kei misual ka hi, a chi a. 9A nga mat uh amah leh a lawmte’n limdang a sah mahmah jiahun. 10Huleh Simon kithuahpihte Zebedi tate Jakob leh John in zong limdang a sa uhi. Huleh Jesu’n Simon kawmah, Lau sin, tu apatin mihing na manta diing, a chi a. 11Huleh a kuangte uh luipanga ahung tawldoh zohun, bangkim a nusia va, amah a juita uhi.

Phaah khat suhdamna

12Huleh hichi ahung hi a, khua khata a um laiin, ngai in, mi khat a pumtanga phaah tuam a um a; ama’n chu Jesu a muh in lei siin a bohkhup a, Lalpa, na utin chu na hung susiangthou thei hi, chi'n a ngen a. 13Huin ama’n a khut a hadoh a, amah chu a khoih a, Ka ut hi, siangthouta in, a chi a. Huchi'n thakhat in a phaahna in a nusepahta hi. 14Huleh ama’n a kawmah, Koima hilh sin; hizongleh va chiah inla, siampu kawmah va kilah in; huleh amahuh heetsah na diingin Mosi thupiah bangin, sianhonna diingin sil va laan in, chi'n thu a pia a. 15Hizongleh a tanchin chu a thang na sa zawsem a; huleh mipi nasatah a thu ngaikhe diing leh a natna uh kisudamsah diingin ahung uh. 16Huleh amah chu gamdai ah a chiah tuam a, a haamteita hi.

Zeng khat suhdamna

17Huleh ni khat chu hichi ahung hi a, thu a hilh laiin; Galili leh Judia gam kho chin leh Jerusalem a kipana hung Pharisaite leh daan siamte a kawmah a tou va; amahuh suhdamna diingin Lalpa silbawltheihna chu a kawmah a um a. 18Huleh, ngai in, mite’n zeng khat lupna in ahung zawng va; huleh a zawn luut theihna diing leh a ma a, a koih theihna diing a ngaihtuah uh a. 19Huleh mipi jiahin zawn luutna dan a mu sih va; inn tungah a kaltou va, huleh bichiing pheet vangin a laitah ah Jesu ma ah a lupna toh a khaikhesuh uhi. 20Huin ama’n a ginna uh a muh in, a kawmah, Mihing, na sualnate ngaihdam ahita hi, a chi a. 21Huin lehkhagialtute leh Pharisaite’n, Hi Pathian soisia koi ahiai? Pathian chauh loungal kua’n ahiai sual ngaidam thei? chi'n a ngaihtuah va. 22Hizongleh Jesu’n a ngaihtuah uh a heet in a dawng a, a kawmvah, Bang ahiai na lungtang va na ngaihtuah uh? 23Na sualnate ngaihdam ahita chih leh, thou inla keeng in chiahta in chih khoi a baihlam zaw ei? a chi a. 24Banghitaleh leitung ah mihing Tapa in sual ngaihdam theihna a nei hi chih na heet na diingun. (Zeng a damloupa kawmah) Thou inla, na lupna la inla, na inn ah chiahta in ka hung chi ahi, a chi a. 25Huleh a ma vah a thoukhepah a, a lupna a la a, Pathian paahtawi kawmin a inn lamah a chiahta hi. 26Huin a bawnun limdang a sa mahmah va, Pathian a paahtawi uh; huleh, Tuni’n sil limdangtah mai i mu uhi, chi'n a lau mahmah uhi.

Levi kouhna

27Huleh hi silte zohin a pawtkhia a, siahdonna muna tou, a min Levi kichi siahdongtu khat a mu a; huleh a kawmah hung juiin, a chi a. 28Huchi'n ama’n bangkim nusiain a thou a, amah a juita hi. 29Huleh Levi in a inn ah Jesu diingin ankuang luina loupitah a nei a, huah chu siahdongtute tampi leh midang tampite’n amahuh ankuang a uumpih uhi. 30Hizongleh a lehkhagialtute uleh Pharisaite chu a nungjuite tungah a phun va, Bang diinga siahdongtute leh misualte toh ne a dawn khawm na hi viai? a chi va, 31Huin Jesu’n a dawng a, a kawmvah, Mi chidamte’n doctor a mamoh sih va, mi chinate’n a mamoh zaw uhi. 32Midihtatte kou diing a hung ka hi sih a, misualte kou a kisiihsah diing a hung ka hi zaw hi, a chi hi.

Angawl thu a dotna

33Huin amahun a kawmah, Bang diinga John nungjuite’n an a ngawl veu va, huleh a haamtei veu uh, huleh Pharisaite nungjuite’n zong huchimah banga a bawl va; hizongleh nang nungjuite’n ne a dawn ahi viai? a chi va. 34Huleh Jesu’n a kawmvah, Moupuite kawma mouneitu a um laisiah moupuite an na ngawlsah thei viai mah? 35Hizongleh a lah vapat mouneitu laahmang nite ahung tung diing a, hu ni chiangin a ngawl diing uh, a chi a. 36Huleh ama’n a kawmvah tehkhinthu khat zong a soi a; Koima’n puan thahin puan lui a phoh ngei sih; phohta henla hileh a nihin a keehta diing a, huleh a thah them pen chu a lui toh a kituaah sih diing hi. 37Huleh koima’n uain thah chu savunthawl luiah a koih ngei sih; koihta henla hileh uain thahin savunthawl lui chu a pawhjahsah diing a, a kibo diing, huleh a thawlte zong a segawp diing hi. 38Hizongleh uain thah chu savun thawl thah a koih diing ahi; huchi'n a nih in a bit diing hi. 39Mi koima’n zong uain lui a dawn zoh nungin a thah a duhpah ngei sih; a lui mah tui zaw, a chi veu uhi, a chi hi.

Currently Selected:

LUKE 5: SIMTBSI

Highlight

Copy