LUKE 6

Khawlni tan thu a dotna

1Huleh hichi ahung hi a, khawlni masapen zoh a khawlni nihna pen niin buhleite ah a paisuaah a; a nungjuite’n buhvui a sihtan va, a khut va nuaisiangin a ne va. 2Huleh Pharisai koite aha in a kawmah, Bang diinga khawlni a bawl sianglou na bawl uh ahiai? a chi va. 3Huleh Jesu’n a dawng a, David in a gilkial laia a lawite toh a silbawl uh simkha lou na hi viai mah? 4Huchia Pathian inn a, a luut a, siampute loungal neeh siang louh tanghou chu a laah a, a neeh a, huleh a lawite kawma zong a piah thu chu, a chi a. 5Huleh ama’n a kawmvah, Mihing Tapa chu khawlni Lalpa zong ahi, a chi hi.

Khutzoi khat suhdamna

6Huleh hichi ahung hi a, khawlni dangin kikhopna inn ah a luut a, thu a hilh a, huleh huah mi khat khut jiatlam zoi ana um a. 7Huleh lehkhagialtute leh Pharisaite’n a heehna diing a muhtheihna diingun, khawlnia a suhdam leh suhdamlouh a ensim va. 8Hizongleh ama’n a ngaihtuah uh a he a, khut zoipa kawmah, Thou inla, a lai ah dingdoh in, a chi a. Huin amah chu a thou a, a dingdohta a. 9Huin Jesu’n a kawmvah, Sil khat ka hung dong diing hi, Khawlni a sil hoih bawl ahiai siang, sil gilou bawl? Hutdam ahiai siang, suhlup? a chi a. 10Huleh a kiima umte zousiah a en vel a, hupa kawmah, Na khut zandoh in, a chi a. Huin ama’n a jan a; huchi'n a khut chu a langkhat lam bangin a damta hi. 11Huleh amahuh chu a lungthah segawp va, Jesu tunga a bawl dan diing uh khat leh khat a kihouta uhi. 12Huleh hulaiin hichi ahung hi a, taang ah haamtei diingin a chiah a, Pathian kawmah jankhovaah in a haamtei hi.

Nungjui sawmlenihte teelna

13Huleh khovaah phetin a nungjuite a kou a; a lah vapat sawmlenih a teel a, a min u’zong sawllehte ahisah hi. 14Simon (ama’n Peter zong a chih) leh a unaupa Andru, Jakob leh John, Philip leh Bartholomai; 15Matthai leh Thoma, Alphai tapa Jakob, huleh Simon Zelot a chih uh, 16Huleh Jakob unaupa Juda, huleh a mansahtu Juda Iskariot zong ahi uh. 17Huleh amahuh toh a kitonsuh a, munjang ah a ding a, a nungjuite mi tampi leh, Judia gam pumpi leh Jerusalem a kipan leh Tura leh Sidon kho lama tuipi geia kipan mipi nasatah toh, hute chu thu ngai diing leh a damlouhnate uh suhdam ut in a hung va, 18Huleh hagau niin suhgentheihte zong a hung va; ahung dam vehta uh. 19Huleh amah a kipana silbawltheihna pawtkhia a amahuh zousiah a suhdam jiahin mipite’n a bawnun amah khoih a tum uhi.

Hamphatnate leh tunggihnate

20Huin amah chu a khodaah a, a nungjuite a en a, Nanguh migentheite na hampha uh; ajiahchu Pathian gam nanguh a ahi. 21Nanguh tu a gilkialte na hampha uh; ajiahchu vah diing na hi uhi. Nanguh tu a kapte na hampha uh; ajiahchu nui diing na hi uhi. 22Mihing Tapa jiaha mite’n ahung muhdah va, a lahva kipana ahung nohdoh va, ahung tai va, huleh na min uh hoihlouchia ahung pampaih chiangun na hampha uh ahi; 23Hu niin kipaah unla, nuamin kidiang un; ajiahchu, ngai un, vaan ah na kipaahman uh a loupi ahi; Bang jiahin ahiai i chih leh huchimah bangin a pulepate un zawlneite ana bawl uhi. 24Hizongleh nanguh mihausate na tunguh a gih hi; ajiahchu nangun na hamuanna uh na mu zouta uhi. 25Nanguh tu a gil vahte na tunguh a gih hi; ajiahchu kial diing na hi uhi. Nanguh tu a nuite na tunguh a gih hi; ajiahchu mau a kap diing na hi uhi. 26Mi zousiah in ahung phat chiangun na tunguh a gih hi; ajiahchu huchimahbangin a pulepate un zawlnei tahloute tungah ana bawl uhi.

Meelmate lungsiat diing thu

27Hizongleh nanguh ka thu ngaikhete kawmah ka hung hilh ahi, Na meelmate uh lungsiat unla, ahung mudahte hoihbawl un. 28Haansia hung lohte vangpiah unla, ahung simmohbawlte diingin haamteisah un. 29Na ngeiphe hung behsahtu kawmah a langkhat lam zong doh in; huleh na puanjal uh hung laahsahtu kawmah na puannaah uh laah zong nial sih un. 30Na kawmva hung ngen photmah kawmah pia unla; huleh na thuampua uh hung laahsahtu kawmah ngen kiit nawn sih un. 31Huleh mi'n na tungva a bawl diing na deih bang ngei un, nangun zong amahuh tungah bawl un. 32Bang jiahin ahiai i chih leh nanguh hung lungsiatte chauh na lungsiat uleh paahtaat bang na loh diviai? misualte’n zong amahuh lungsiattute a lungsiat uhi. 33Huleh na tungva hoihte tung chauh a na hoih uleh paahtaat bang na loh diviai? ajiahchu misualte’n zong huchimahbangin a bawl uhi. 34Huleh muh kiitna kinepnate uh kawm chauha na thunglaahsah uleh paahtaat bang na loh diviai? ajiahchu misualte’n zong a zahmah muh kiit diingin misualte kawmah a thunglaahsah uhi. 35Hizongleh nangun chu na meelmate uh lungsiat unla, hoih bawl un, bangmah muh kiit kinem louin thunglaahsah un; huchi leh na kipaahman uh a loupi diing a, Tungnungpen tate na hi diing uhi; ajiahchu ama’n kipaahnadan heloute leh migiloute a hehpih veu hi. 36Hujiahin na Pa uh mi hehpih a siam bangin nanguh zong mi hehpih siam un.

Midangte tungtaang vaihawmsahna thu

37Soisel sih un, huchi'n soiselin na um sih diing uh; mohpaih sih un, huchi'n mohpaihin na um sih diing uh; huleh ngaidam un, huchi'n ngaihdamin na um diing uhi. 38Pia un, huchi'n piah in na um diing uh; hoihtaha teh in, sawndet in, lohhal in, huleh dimlet in, mite’n na aangsung vah ahung pe diing uhi. Ajiahchu na tehna mah un ahung tehsah kiit diing uhi, a chi a. 39Huleh ama’n a kawmvah tehkhinthu khat a soi a, Mittaw in mittaw mah a pui thei diai? a nih va kokhuuh a kekhawmta lou diing ahi viai mah? 40Nungjui chu a pu tungah a um sih; hizongleh michih a bukim taphot chu a pu bangin a um diing hi. 41Huleh bang diinga nangmah mit a innkam um chu ngaihtuah lou a, na unaupa mit a niinthem um mu na hiai? 42Nangmah mit a innkam mu loupi a, na unaupa kawma, Unaupa, na mit a niinthem um hung lakhesah in, bangchi a chithei na hiai? Nang milepchiah, na mit a inkam um chu lakhe masa in, huchileh na unaupa mit a niinthem laahkhiah diing chiantahin na mu thei diing hi. 43Ajiahchu sing hoih a gah a se ngei sih a; huleh sing sia zong gah hoihin a gah ngei sih hi. 44Sing chin a gah ah heet ahi. Ajiahchu mi'n lingkungah theipi a lou ngei sih va, huleh lingnoh lahah zong grep a lou ngei sih uhi. 45Mihoih in a lungtang goubawm hoiha kipanin sil hoih ahung suahkhia a; huleh migilou in a lungtang goubawm sia a kipanin sil hoihlou ahung suahkhe veu hi. Bang jiahin ahiai i chih leh lungtang a dim val chu a ka min a soi ahi.

Inn bawldan chi nihte tehkhinthu

46Huleh nangun bang diinga ka soite bawlloupi a Lalpa, Lalpa, hung chi na hi viai? 47Koipouh ka kawma hunga, ka thusoite za a, huleh jui chu bang tobang mi ahiviai chih ka hung ensah diing; 48Amah chu innbawlmi, thuuhtaha tou a, suangpi tunga innbul lem toh kibang ahi; huleh tui ahung letin tuikhauhin hu inn chu ahung khoh a, a suliing but sih hi; suangpi tunga bawl ahih jiahin. 49Hizongleh ja ngal a jui lou chu, innbul kiptah a lem lou a, leitung maia innbawlmi bang ahi; huchu tuikhauhin ahung khoh a, a puuhpah hi; huleh hu inn siat chu ana sa ahi, a chi hi.

Currently Selected:

LUKE 6: SIMTBSI

Highlight

Copy