JAHON 17

Jisu rui Kaziap nunc khang Huayneyloumei

1Jisu mi guay hei sa tangna, tingkauh zauc kuna sa the, “Apu, kaganv kiu guang tangc the. Nang Nac Mpouh hym tidaiclou tho, kumna hei tei rui nang Nac Mpouh rui nang hym ni tidaiclou khang e. 2Kalam thu nang rui akhou tiiloumei guay khou ringcsuangmei tiilou khang, nang rui akhou meic guayna ruc khou ngamv tiilou the. 3Akhat namei kalingmei Racguangc nang ta khatni nang rui ndiu guangmei Jisu Khrista ta thaymei hei ringcsuangmei kiu the. 4Ai rui kandih khou nang hym ndauhlou kan the; nang rui akhou tiiloumei taanv taanc luailou kan the. 5Apu, mbaanv nai mak khou rui nang lev nai bammei atik-hym tei, ntaw nang mav khou akhou tiilou dat ro.

6“Mbaanv khou rui laa patna nang rui akhou tiiloumei mei nunc khou hei ai rui nang ta tithaylou kan the. Kaniw hei nang tuang e; kumna kaniw ta akhou tiilou the. Kaniw nang lat piu the. 7Akhou tiiloumei guayna hei nang khou rui guang tuang e twmei kaniw thay the. 8Nang rui akhou tiiloumei lat guay tei kaniw khou tiilou kan the, kumna kaniw laa kan the. Ai hei nang khou rui guang tuang e twmei hei nchumh the twmei kaniw thay the khatni nang rui ata ndiu guang tuang e twmei kaniw lwm the.

9“Ai kaniw khang huayney tuang e; ai mbaanv khang huayney mak ge, tiki nang rui akhou tiiloumei nunc khang e. Kalam thu kaniw hei nang tuang e. 10Atuang guay hei nang tuang e, nang tuang guay hei atuang e; kumna kaniw khou rui ahym ndauhlou kan the. 11Ntaw thu ai nang khou guang dat puni the; ai mbaanv khou bam ni tu hamh the, tiki kaniw thu mbaanv khou bam puni he. Nthanmei aPu, nang lev ai akhat na swmei kumcna, kaniw ni akhat na sw khang nang zanc, nang rui akhou tiiloumei zanc pumtan tei rui kaniw ta gaeklou o.#Baanhhy baibal asaekc khou nang rui akhou tiiloumei nunc ti hei nang zanc pumtan rui gaeklou o twna hylou e. 12Ai kaniw ta bam nduangh bam saanv thu, nang zanc pumtan, nang rui akhou tiiloumei zanc tei rui kaniw ta gaeklou bam tuang e.#Baanhhy baibal asaekc khou thu Nang rui akhou tiiloumei nunc ti hei maan mak khang ai rui nang zanc pumtan rui gaeklou the twna hylou e. Ai rui kaniw ta gaeklou the, kum tina, Nthanmei Latrik khou hyloumei tei guang tangh khang, maan nimei nac mpouh na tei hamhna, kaniw gaanv khat na sini maan mak ge.#Kal 41.9; Jhn 13.18 13Tiki ntaw thu ai nang khou guang dat puni the, kumna mi guay hei mbaanv khou rui sa bammei kabac kiu thu, kaniw lung khou atuang neila padikna nai khang e. 14Ai rui kaniw khou nang lat tiilou kan the, kum tina mbaanv rui kaniw ta karaeng e. Kalam thu ai mbaanv tuang hamhmei kumcna, kaniw ni mbaanv tuang hamh the. 15Kaniw ta mbaanv khou rui laa tat khang ai huayney mak ge, tiki simeipu khou rui gaeklou o twna e. 16Ai mbaanv tuang hamhmei kumcna, kaniw ni mbaanv tuang hamh the. 17Nang lat hei nchumhmei e, mi paan tei rui kaniw ta reicpatlou o. 18Nang rui ata mbaanv khou ndiu guangmei kumcna, ai rui ni kaniw ta mbaanv khou ndiulou the. 19Kaniw hei ni nang khang kalingmei khou reicpatlou khang, kaniw khang rui ai hei ni nang khang reicpatlou the.

20“Ai huayneymei hei kaniw khang na hamh e, kaniw lat khou rui akhou lwmlou nimei nunc khang ni e. 21Kaniw guay akhat na sw khang neypui tuang e. Ai nang khou bammei kumcna khatni nang akhou bammei kumcna, kaniw ni anei khou bam diu o. Nang rui ata ndiu guangmei tuang e twmei mbaanv rui lwm khang, kaniw akhat na sw kan diu. 22Nang lev anei akhat namei kumcna, kaniw ni akhat na sw khang, nang rui akhou tiiloumei hym tei kaniw khou ni ai rui tiilou kan the. 23Kaniw nthuihna akhat na sw khang ai kaniw khou bam khang khatni nang akhou bam khang e. Kum pwkhou nang rui ata ndiu guang tuang e khatni nang rui ata nzianmei kumcna kaniw ta ni nzian e twmei mbaanv rui thay khang e.

24“Apu, nang rui akhou tiiloumei nunc hei ai bammei bamv khou adaeng khou bammei ta kahaw e, kumna mbaanv damh mak khou rui nang rui ata nzianpui zaeng rui akhou tiiloumei hym hei kaniw how kan khang e. 25Apu, nchumhmeipu, mbaanv rui nang ta thay mak ge, tiki ai nang ta thay e, kumna nang rui ata ndiu guang tuang e twmei mi nunc hei rui thay e. 26Nang rui ata nzianmei ramzian hei kaniw khou nai khang khatni ai kaniw khou bam khang, ai rui nang ta kaniw khou tithaylou kan the khatni tithaylou bam puni.”

Currently Selected:

JAHON 17: RONGBSI

Highlight

Copy