JAHON 16

1“Nangniw lwmmei khou phaysuy mak khang mi guay hei nangniw khou salou tuang e. 2Nangniw ta sinagog khou rui alay ganc puni, kumna nangniw ta swluaimei hei Ravguangc khang katloumei siamruai taanv e twna meic nunc rui ning nimei ganv guang puni. 3Kaniw rui mi kumcna sw nimei hei kaniw ata ni aPu ta ni thay lamc makna e. 4Ai rui nangniw khou mi hei saloumei lam thu, mi kumcna sw nipui ganv kaniw khang guang pwkhou, ai rui nangniw khou saloumei hei nangniw ningtow khang e.

Bumaengh Nthanmei Taanv

“Ai nangniw ta bam nchamc bampui zaeng rui, thaurey khou thu mi guay hei ai nangniw khou sa kan mak ge. 5Tiki ntaw thu ai ata ndiu guangmeipu daeng thangc tat dat puni the. Kum e tiki, ‘Nang tabui thangc tat nina cho?’ twna nangniw gaanv khat na sini akhou thanv mak ge. 6Mi guay hei salou tipui zaeng rui, nangniw lung mpeyna ryanra the. 7Tiki ai rui nangniw khou kaling samei tuang e: i tat patmei hei nangniw khang gaymei e. Kalam thu ai tat mak ge thei Nkhavloumeipu tei guang ni tu hamh e. Ai tat pat re thei, ai rui kata ndiu guang puni. 8Kamei guang e thei, paapc lam khou, ravchaptatmei lam khou khatni latzan lam khou mbaanv khou kaniw khuay ndauhlou puni. 9Paapc lam khou kaniw nkhuai e, kalam thu kaniw akhou lwmlou mak ge; 10ravchaptatmei lam khou kaniw nkhuai e, kalam thu ai aPu daeng thangc tat puni the, kumna nangniw ata how dat ni tu hamh the; 11khatni latzan lam khou kaniw nkhuai e, kalam thu mi mbaanv sinmeipu ta latzan sw kan the.

12“Ai nangniw khou salou khang mpeyna nai e, tiki ntaw thu mi guay tei nangniw phungc ngam pw lak khe. 13Nchumhmei Bumaengc tei guang pwkhou, nangniw ta nchumhmei khou zaylou puni. Kalam thu kamei karana kachwnphuakh khou rui ning patna tei sa ni tu hamh e, tiki kamei rui chumei tei kamei sa puni, kumna thei thangc guang punimei lam khou kamei rui salou puni. 14Kamei rui ahym tidaic puni, kalam thu ai rui samei tei kamei rui laa lana, nangniw khou salou puni. 15Apu khou naimei guayna tei atuang e. Hei zaeng rui, Bumaengh tei rui ai rui samei tei laa lana nangniw khou salou puni twna sa tuang e.

Lungh Ryanramei khatni Neihlamei

16“Asaanh makmei lungc khou nangniw ata how dat mak puni the, tiki asaanh makmei tangv nangniw ata how dat puni.”

17Khoutei kaziap nunc khat khat khou sa the, “‘Asaanh makmei lungc khou kata how dat mak puni the, tiki asaanh makmei tangv kata how dat puni,’ twna kamei rui aniu khou sa bammei hei tabui tuang lana cho? ‘Kalam thu ai aPu daeng thangc tat puni,’ twna ni kamei sa di he. 18‘Asaanh makmei lungc khou,’ twmei hei tabui tuang ta cho? Kamei sa bammei hei aniu kabah thay mak khe!”

19Kaniw thanv niina bammei tei thay lana, Jisu rui kaniw khou sa the, “‘Asaanh makmei lungc khou nangniw ata how dat mak puni the. Tiki asaanh makmei tangv ata how dat puni,’ twna ai rui saloumei lam khou tei nangniw pang khou thanv bam tu cho? 20Ai rui nangniw khou kaling siakna sa tuang e: Nangniw kap puni, tiki mbaanv mei nunc neihla puni; nangniw lungh ryanra puni, tiki nangniw neihla dat puni. 21Meicpui nunc kaniw nahbam nipui ganv khou kaniw lung ryanra e, kalam thu kaniw ryanra nipui ganv guang the. Tiki ngasatna tei puanc keylou pwkhou karam ryanra guay tei amuc ngam the; maansei akhat mbaanv khou puanclou the twna neihla the. 22Hei tei kumcna, ntaw nangniw lungh ryanra e, tiki ai nangniw ta ariw dat puni. Mi khou kiu nangniw neihla puni, kumna nangniw neila tei meic gaanv khat na rui sini nangniw khou rui laa ganc dat ngam ni tu hamh the.

23“Mi nungc kiu nangniw akhou ramhkhat sini ney dat ni tu hamh the. Ai rui nangniw khou kaling siakna sa tuang e: Nangniw rui azanc khou aPu khou neymei guay tei kamei rui tiilou puni.#Baanhhy baibal asaekc khou Nangniw rui APu khou tabui pw ni ney ti thei, kamei rui nangniw khang azanc khou rui tiilou puni twna hylou e. 24Ntaw nganvmei nangniw ramhkhat sini azanc khou ney mak he. Ney o, kum e thei, nangniw neihlamei padik khang tiilou puni.

Mbaanv ta Ngammei

25“Ai rui nangniw khou mi guay hei latgiam swna salou kan the. Tiki latgiam swna sa dat makna, aPu lam khou ndaw sa nipui ganv guang pu the. 26Mi ganv khou kiu, nangniw azanc khou ney puni; ai rui aPu khou nangniw khang neylou puni twna sa tu hamh e. 27Tabuicho tiki aPu rui nangniw ta nzian e. Kalam thu nangniw ata nzian e khatni ai kakhou rui guang tuang e twmei lwm the. 28Ai hei aPu khou rui mbaanv khou guang the; kumna ntaw thu ai mbaanv ta mpatlouna aPu daeng thangc tat dat puni the.”

29Khoutei kaziap nunc rui sa the, “Ntaw thu nang latgiam sa makna ndaw sa the. 30Nang ramh guayna thay ngam e twmei aniw thay the; nang khou thanv niimei lat guay nang thay the. Mi hei rui nang hei Ravguangc khou rui guangmeipu e twmei aniw lwm the.”

31Jisu rui sa the, “Ntaw thu nangniw lwm thah? 32Nangniw guay kakai kakai thangc tat phak dat ngamna arana ta ganclou nipui ganv guang the. Tiki arana ta ganclou ni tu hamh e, aPu bam de. 33Ai rui mi hei nangniw khou saloumei thu akhou bamna nangniw chuzaenghna bam khang e. Mi mbaanv khou nangniw khang ryanra ryanriumei nai puni, tiki ping riu! Ai rui mbaanv ta ngamlou kan the!”

Currently Selected:

JAHON 16: RONGBSI

Highlight

Copy