JAHON 18
18
Jisu ta Nymmei
(Met 26.47-56; Mrk 14.43-50; Luk 22.47-53)
1Jisu mi hei kumcna huayneyna salou tang lana, kaziap nunc ta nduanghna Kidron duibaek kaan pat kan the. Mi khou tei pikwan akhat nai khwan e, kumna kaniw mi khou tei gut kan the. 2Jisu ta zuanctu nimei Juda mi bamv tei thay khwan e; kalam thu Jisu khatni kaziap nunc katupc sihna mi bamv khou tei guang kariu bam khwan e. 3Amuh daihmei nunc khatni Pharisimei nunc rui ndiuloumei ravkai rigaanv nunc khatni Rommei ricmei nunc ta nduanghna mi pikwan khou tei guang the. Kaniw tei buy baeng, thauhmai khatni mairam sin khwan e. 4Kaniw khou patlou nimei guay tei thay lana kamei tat patna, “Nangniw thow ta phu bam tu cho?” twna thanv the. 5“Nazarethmei Jisu ta e,” twna kaniw rui daw the.
Khoutei, “Ai the,” twna Jisu rui daw the. Jisu ta zuanctumei Juda tei mi pang khou tei ding bam khwan e. 6“Ai the,” twna Jisu rui sa ti khou, kaniw thei tangsyn patna kandih khou pun key the. 7“Nangniw phu bammei kiu thow ta cho?” twna Jisu rui kaniw khou thanv dat di he.
“Nazarethmei Jisu ta e.” twna kaniw rui sa the.
8“‘Ai the,’ twna ai sa kan dyng the cho. Nangniw ata phu bam tuang e thei, mi baihmei guay hei thu tat kan di tho,” twna Jisu rui sa the. 9Mi hei, “APu, nang rui akhou tiiloumei gaanv khat na ta sini ai swmaan mak ge,” twna kamei rui sa kanmei tei guang tangh khang e.
10Simon Pitar baeng phungc bam lana, kabaeng sat patna Tingkuh bangc ta dow the, kumna katuang baanzat nu siap tap the. Mi bangcpu zanc kiu Malkhos twna kaw e. 11Khoutei Jisu rui Pitar khou sa the, “Nang tuang baeng tei kathuap khou lou dat kan o! Apu rui akhang tiimei buangc hei ai zangv nina hamh nah cho?”#Met 26.39; Mrk 14.36; Luk 22.42
Jisu Tingkuh Anna Daeng khou
12Kaniw tuang rihpy rui nduanghmei Rommei ricmei nunc khatni Jihudimei ricmei nunc rui Jisu ta nymna karakna, 13Anna daeng khou zay guang rey the. Kamei hei, mi ganv khou tei Tingkuh sw bammei Kaiapha now pu e. 14Mi Kaiapha hei, “Meic geihna khang gaanv khat rui theicloumei gay e,” twna Jihudimei kapy nunc khou sa kanmeipu tei e.#Jhn 11.49-50
Pitar rui Jisu ta Thay Mak ge Twna Samei
(Met 26.69-70; Mrk 14.66-68; Luk 22.55-57)
15Simon Pitar lev baihmei ziap gaanv khat Jisu thei lay tat khwan e. Baihmei ziap gaanv khat tei Tingkuh rui zawthaymeipu khwan e. Kum lana kamei Jisu thei layna Tingkuh kai kaimav nganv guang tangc khwan e. 16Pitar thu kapaengc thangc, kairaengvmun daeng thangc ding bam khwan e. Khoutei baihmei ziap gaanv khatpu tei pat datna kairaengvmun daeng khou bammei tunacpui khou tei sana, Pitar ta kalungc khou nduangh gut the. 17Kairaengvmun khou bammei tunacpui tei rui, “Nang ni mi pu tuang ziap akhat hamh nah cho?” twna sa the.
Khoutei, “Ai kiuc hamh e,” twna Pitar rui daw the.
18Hei tei nchumei ganv khwan e, kum tina bangh nunc khatni rigaanvmei nunc tei maithyn mai swlouna ding huamcna nggaan bam khwan e. Pitar ni kaniw daeng khou guang dingna mai nggaan bam khwan e.
Tingkuh rui Jisu khou Lat Thanvmei
(Met 26.59-66; Mrk 14.55-64; Luk 22.66-71)
19Tingkuh tei rui Jisu khou kaziap thow thow cho khatni kamei tabui nchamlou tu cho twna thanv the. 20Jisu rui daw the, “Ai meic guay na khou ndauh phauna sa kan de; meic guang kaduaimei bamv sinagog khatni Ravkai khou nchamlou kan tuang de. Ai ramhkhat na sini nkamhna sa zat mak ge. 21Tabui swna akhou thanv bam tu cho? Alat chumei nunc khou thanv tio. Ai rui kaniw khou tabui lat salou bu cho thanv tio; ai sa kanmei tei kaniw thay e.”
22Jisu rui mi kumcna sa ti khou, mi khou tei bammei rigaanv gaanv khat rui, “Nang tabui zaeng rui Tingkuh khou mi kumcna sa tu cho?” twna sana kaphi the.
23Jisu rui mundawna sa the, “Ai nkhuaimei lat salou tuang nai e thei, salou o. Ai sa kanmei tei nchumh de tw e thei, tabui swna nang ata bai tu cho?”
24Karakclou tan tanna, Anna rui Jisu ta Tingkuh Kaiapha daeng thangc ndiulou the.
Pitar rui Jisu ta Nuh Mak Datmei
(Met 26.71-75; Mrk 14.69-72; Luk 22.58-62)
25Pitar tei mai nggaanna ding bam khou tei kaniw rui, “Nang ni mi pu tuang ziap cho?” twna kakhou thanv the.
Kamei hei tei nuh makna, “Ai kiuc hamh e,” twna daw the.
26Tingkuh bangc gaanv khat, Pitar rui kanu siap taploumeipu riangluaicmei gaanv khat rui, “Pikwan khou tei ai nang ta how kan mak nah cho?” twna sa the.
27Kamei kiuc hamh e twna Pitar rui sa dat muay the. Mi dyng khou tei nruay khuangc the.
Jisu Pilat Daeng khou
(Met 27.1-2,11-14; Mrk 15.1-5; Luk 23.1-5)
28Kumna laukhwan khwanzingh kaniw rui Jisu ta Kaiapha kai khou rui guanghkhyn kai thangc zay tat the. Kaniw tei Kaanpatpui taektw tu khang rui kaniw ta sw mphuam nii lamc makna, Jihudimei kapy nunc tei guanghkhyn kai lungc khou tei gut mak khe. 29Kum tina Pilat tei kaizaeng khou patna, “mi pu hei tabui khuay naina cho?” twna kaniw khou thanv the.
30“Mi pu hei rui simei taanv taanclou mak ge thei, kata nang daeng khou zay guang bam ni tu hamh e,” twna kaniw rui daw the.
31“Kum e thei, nangniw kata zay tatna nangniw riak thei layna latzan sw tho,” twna Pilat rui sa the.
“Meic gaanv khat ta swluaimei ngamv thu aniw khou tiilou mak ge,” twna kaniw rui daw the. 32Mi hei kamei akumhmei ramthei theic puni cho twmei sa kasuakcloumei tei guang tangh khang e.#Jhn 3.14; 12.32
33Pilat kai lungc khou gut datna, Jisu ta kawna, “Nang Jihudimei guangc kiu cho?” twna thanv the.
34“Mi latthanv hei nang khou rui pat tu ni hamh e thei, meic nunc rui alam khou salou pwna cho?” twna Jisu rui sa the.
35Khoutei Pilat rui mundawna sa the, “Ai hei Jihudimei e twna nang ningna cho? Nangniw Jihudimei nunc khatni nangniw tuang amuh daihmei nunc rui nang ta akhou zay guang tuang de. Nang tabui swlou tina cho?”
36Khoutei Jisu rui sa the, “Atuang guangcdic thu mi mbaanv tuang guangcdic hamh e. Mi mbaanv tuang khwan e thei ata nym mak khang amei nunc rui akhangv kan ni tuang de. Atuang guangcdic thu mi mbaanv tuang hamh e.!”
37“Kum e thei nang guangh cho?” twna Pilat rui kakhou thanv the.
Jisu rui mundawna sa the, “Ai hei guangh e twna nang rui sa the. Ai mbaanv khou puancloumei khatni guangmei hei nchumhmei lam khou salou khang e. Nchumhmei tuang mei kathuic rui alat nking e.”
38Khoutei, “Nchumhmei kiu tabui tei cho?” twna Pilat rui thanv the.
Khoutei kapaengc thangc pat datna meic nunc khou tei sa the, “mi pu tuang khuay how mak ge. 39Kumna tat bammei riak thei layna, Kaanpatpui Ngai khou kangkai khou bammei gaanv khat ta ai mpatlou puni. Jihudimei guangc ti hei mpatlou tho cho?”
40“Mi pu ta hamh e! Barabbas ta mpatlou o,” twna kaniw rui kauc the. (Barabbas hei kariak twanna taanhmeipu khwan e.)
Currently Selected:
JAHON 18: RONGBSI
Highlight
Share
Copy
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
