THAUREYMEI 19

Sodom tuang Paap

1Mi nungc tingzyn tei baanchara gaanv nei tei Sodom khou guangpui ganv khou, Lot tei kaidai raengcmun khou dungc bam khwan e. Kamei rui mi nei ta tei howpui lev, kaney ta ariw khang kamei tatpat the. Kamei rui kaney hu khou nkhum keyna 2Kumna sa e, “Apoubauhmei neile, nangney siamruai sw khang ai khou hei bammei tuang e. Akai khou guang bangvlou o. Nangney phaybaanc khiuna aseic thu ziplou tho. Nthuanh rui thau dat zaicna nang ney tat nimei chaeng tat dat tho.”

Kaney rui daw e, “Kum nangh khe zingbangc thu aney mpaeng khou zip kan ni the.”

3Kamei rui sa dat sa dat bam tina, nkhamh khou kaney tei kakai thangc lay guang the. Gin nei khang ntyan kasiamh khang khatni napgan suangc chuyna suangh khang Lot rui kabangc nunc khou sa the. Napgan luailouna kaniw tu the.

4Gin nei tei zip key mak khou, Sodommei rui Lot kai ding nkuay the. Sodommei nggaanvmei guay, alauc-gaanvthaih padik bam the. 5Kaniw rui Lot ta kaw patna “Nang kai khou aseic zingbangc bangv khang guang kanmei gin nei tei tabui thangc bam cho? Mi ney tei aniw khang tiipat ro!” twna ney the. Sodommei nunc tei rui kaney khou nthahmei taanv taanc nii the.#Lzp 19.22-24 6Lot tei kaikhamv mbanghbinlouna kaizaengc pat the. 7Kamei rui kaniw khou sa the, “Chana punav guayle hei kumhmei simei taanv hei taanclou rio! 8Anac aluh liuchang gaanv nei nai e. Kaney ta kiuc tiipat puni the, nangniw rui kaney ta nangniw nyng sw tho. Tiki mipu nei ti hei thu nangniw ramhkhat sini sw nuh mak ge; kaney hei agin e, kaney ta gaekmei hei athouc e.”

9Tiki kaniw rui kumna sa e, “Arei o, gin nang! Aniw ta ncham bam khang nang thoucna cho? Arei o, chaeng ding khamv riu, kaney ta suangc sina nang ta swlou tim e.” Kaniw rui Lot ta thui gancna kaikhamv thui ra khang thui gut the. 10Tiki kainung khou bammeipu nei tei kaney baanc haamvpatna Lot ta kainung khou zay gutlouna kaikhamv mbanghbinlou the. 11Khoutei kaney rui kapaengc khou bammei thyammei daihmei kaguayna ta kaniw mik sw tiatlou ngam the, kumna kaniw kaimun phutow thay mak khe.#2 Gu 6.18

Lot Sodom khou rui Tat Patmei

12Mi ney tei rui Lot khou sa the, “Mi kaidai khou hei nang nac mpouh, aluh nang nac gaanv, hamh e thei baih baihmei riangluaic pwni nai e thei mi khou rui titat pat la tho, 13mi kaidai hei swmaan puni the. Mi kaidai tuang si kanmei khuay lam tei Ringhpouc rui chu the, kamei rui aney ta Sodom ta swmaan khang thouc guangmei tuang the.”

14Khoutei Lot rui kanac aluhpui nei gaanv sw nimeipu nei khou tei tatna “Katumcna mi kaidai khou rui tatpat tho; Ringhpouc rui mi kaidai ti hei swmaan puni the,” twna sa ti khou kiauc bam tu de twna kaney ning kan the.

15Lauthwan gaanc tariuhra pat pwkhou baanchara nei tei rui Lot ta katumcna tatpat khang katiuna sa the, “Katumc tho! Mi kaidai swmaan nimei khou hei theic kazauhlou mak khang nang now khatni nang nac aluh nei ta nduanghna tatpat tho.” 16Lot tei tatpat rap khang ngam mak khe. Tiki Ringhpouc rui kata nzian the; kumna mipu nei tei rui Lot ta, kanow ta, khatni kanac aluhpui nei ta kaniw baanctyang laekna mi kaidai khou tei rui zaypat the.#2 Pi 2.7 17Khoutei baanchara akhat tei rui sa the, “Ringh khang pak la tho! Thei ziangrih dat ri tho, nzaengc khou hei nthaekc dat ri tho. Nangniw ringh khang chyngkauh thangc tei pak tat la tho.”

18Khoutei Lot rui sa the, “He Ringhpouc kumlou rio. 19Nang rui akhang heidikamv kakhanhlouna apanty kanlou the. Tiki chyngkauh ramv hei duc langvna tat tangc lak ge; swkamut kamaimei kiu rui chaeng khou guang namvna ai khou tei guang tangh makna theic puni de. 20Mi ana khou naimei kaidai launa hei how bw cho? Ata mi khou tei titatlou tho mi hei namv launa de ai khou tei bam e thei duak pw lakna cho?”

21Kamei rui daw the, “Gay the, nuh the, Mi kaidai tei ai swmaan lak khe. 22Katumc tho! Pak la tho! Nang hei khou tei guang tangc kan mak saanv ai ramh sw thau nuh mak khe.”

Lot rui mi kaidai ta kalauna twna samei zaeng rui mi kaidai zanc tei Zoar twna kaw the.

Sodom lev Gomora ta Swmaanmei

23Lot rui Zoar guang tangc pwkhou neih pat the. 24Thay mak daekna Ringhpouc rui Sodom lev Gomora ruc khou chuanghmei maipu tingriu kumc bun key the.#Met 10.15; 11.23,24; Luk 10.12; 17.29; 2 Pi 2.6 25Kumna mi kaidai guay tei khatni nzaengc guay tei, maansei ni, thingnuy paannu guay ni raw mutsut the. 26Lot now tei thei ziangrih pat the kumna ntey tiangc mbaih kan the.#Luk 17.32

27Nthuanh lauthwan thwanzingh Abraham tei kamei Ringhpouc hu khou ding bammei bamv khou tei pak pat the. 28Kamei rui Sodom lev Gomora khatni mi nzaengc khou tei zauc key pwki mpaamhdai khou rui khou kumei maikhou kumc mi kandic khou tei rui khou kumei ta how the. 29Lot lungc bammei nzaengc khou naimei kaidai guay tei swmaanpui ganv khou Ringhpouc kamei rui Abraham ta ningtowna Lot ta tipak duak the.

Moabmei khatni Ammonmei Lungc Thaumei Bangbi

30Lot tei Zoar khou bam khang ping lana kamei khatni kanac aluh nei lev twna chyngkauh thangc kuna khowlang kai khou bam the. 31Kanac Gaanvthaihmeipui tei rui kakainac khou kumna sa the, “Apu hei ntaw thu gaanvthaih di the, khatni anei ta guangna kawna anei tunapuan nai bam khang ni kandih khou nggaanvmei maek khe. 32Anei kikta nai diu khang apu ta zouh tizangv mbalouna zip kariu di kho. 33Mi nungc zingbangc tei kaney rui kata zouh tiduy mbalouna gaanvthaihmei pui tei kapu lev zip kariu the. Kapu tei zouh zangv mba langvna hei tei thay mak the.”

34Nthuanh thauna gaanvthaihmeipui tei rui kakainacpui khou tei sa the, “Ai zingbangc tei apu lev zip kariu the; aseic zingbangc ni kata zouh tiduy mbalouna nangney zip tho. Kumna aney gaanv neimei apu khou rui nah lungc guang puni the.” 35Kumna mi nungc zingbangc tei ni kaney rui kapu ta zouh tiduy mbalouna alaucmeipui tei kapu lev zip kariu the. Kamei tei zouh zangv mba langvna hei tei ni thay mak khe. 36Heikumna Lot nac aluh nei tei kapu khou rui kaney pumc nrit the. 37Gaanvthaihmeipui tei nah mpouh gaanv khat puanc the, kumna kapui rui kazanc Moab twna phuaklou the. Mipu tei ntaw Moabmei pupouc the. 38Alaucmeipui tei ni nah mpouh gaanv khat puanc the, kumna kapui rui kazanc Benammi twna phuaklou the. Mipu tei ntaw Amonmei pupouc the.

Currently Selected:

THAUREYMEI 19: RONGBSI

Highlight

Copy