THAUREYMEI 18

Abraham khou Mpouh Akhat Nrianhloumei

1 Ringhpouc rui Abraham khou Mamre tuang mphauhbang ding daeng khou guang khwan e. Mi nungc tei neih suc karemei ganv khou kamei katuang pheykai chaengmun khou dungcna bam khou, 2kamei zauc thau pwki meic gaanv thumh khoutei ding bammei ta how the. Kamei rui kaniw ta howpui lev kaniw ta ariw khang pak pat the. Kazaw kandih khou sow nkhum khuakh khuak keyna#Ibr 13.2 3kamei rui sa the, “Kaipoucthiu, nang bangc kai khou gut khanvlou makna tat kaanlou rio. 4Nangniw phay khiu khang dui laaguang puni e; mi thingbang bangc khou hei matat khat nthaekclou o. 5Tuzangv khang ni katit na sini laa pat puni e; kumna mi hei rui nangniw tat nimei dwan khang nangniw zaeng titanclou pwng e. Nangniw ata chakhwang swna akai khou guangloumei thu ai ni nangniw siamruai swlou nii e.” “Nang rui taanclou nimei kiu taanclou tho,” twna kaniw rui daw the.

6Abraham tei kaluak kalat pheykai lungc thangc tei gutna Sara khou sa the, “Katumcna ntyanbuay gaymei kadath kathumh laa patna ntyan kasiamh tho.” 7Kamei katumcna guaih pang thangc tei tatna nuaih chuth chutmei guaihnac akhat nym lana chadina kasiamh khang kabangc khou tiilou kan the. 8Kumna kamei rui guaihnoudui khiang, guaihnoudui khatni guaih zanh tei kasiamhlouna laa pat the khatni kaniw hu khou lamclou the. Mi thingbang bangc khou tei kamei kahak rui siamruai swna kaniw ta kiclou the.

9Mi tangv tei kaniw rui kakhou “Nang now Sara tabui thangc tat kanna cho?” twna thanv tina “Kamei kainung thangc bam e,” twna kamei rui daw the.

10Kaniw gaanv khat rui sa the, “Hei kumhmei ganv khou ai guang dat puni, khou kiu nang now Sara tei kanac mpouh akhat nai puni the.”

Mi dyng khou tei Sara tei pheykai chaengmun khou, Abraham thei khou dingna nking bam khwan e.#Rom 9.9 11Sara lev Abraham tei gaanvthaih sih the, Sara tei bw chaeng nthaekc the. 12Kumna Sara tei “Ntaw thu ai hei karapeic di the, agaanv ni karapouc di the, tukumhna ntu nggaanv swna lungc dat nina cho?” twna kakhanhna nuic the.#1 Pi 3.6

13Khoutei Ringhpouc rui Abraham khou sa the, “Ai heidi karapeic swna nah puanc puni dina cho twna sana Sara tei tabui swna nuic bam tu cho? 14Ringhpouc khang nuh makmei tuang naina cho? Ai rui sa kanmei kumcna hei kumhmei ganv khou ai guang dat puni, khou kiu Sara tei kanac mpouh akhat nai puni the.”#Luk 1.37

15Sara tei ping lana “Ai nuih mak ge” twna daw the.

“Nnguay, nang nuic the” twna Ringhpouc rui sa daw the.

16Hei tangv tei kaniw tei tat dat khang ding thauna, zauc keyna Sodom ta how nuhmei bamv thangc tat kan the, Abraham rui kaniw ta suanc pat the.

Abraham rui Sodom khang Huaychamei

17 Ringhpouc rui sa the, “Ai rui taanc nimei hei Abraham khou nkamh bam nina cho? 18Kakikta hei zaatc daihmei khatni tancbauhmei zaat swna lungc guang puni kumna kapaan rui ai rui zaatc guayna ta suaihiamlou puni. 19Kamei rui kanac nunc khatni kakik kata ta alat piu bam diu khang ncham-ncheina bam khang ai rui kata kadahloumei tuang the. Kaniw rui kumna lungc bam e thei, ai rui nrianhlou kanmei guay tei kakhou taanclou puni.”

20Khoutei Ringhpouc rui Abraham khou sa the, “Sodom khatni Gomora khuay lam khou si sihna chu the, khatni kaniw tuang paap hei daic the. 21Ai rui kaniw khuay lam khou chumei hei kaling ny kaling hamh ny twmei ai key tangcna zauc puni the.”

22Mi tangv tei gaanv nei tei Sodom biak thangc tat kan the, tiki Ringhpouc thu Abraham lev bam duc the. 23Abraham rui Ringhpouc daeng khou guangna thanv e, “Nkhuai makmei nunc ta tei nkhuaimei pang khou swmaan kazauh ni thena cho? 24Mi kaidai khou tei kakhuay maekmei meic 50 nai sini nang rui kaidai kapwm tei swmaan puni dai cho? Gaanv 50 ta tei kanlou khang rui mi kaidai ta tei nsaekclou lak dai? 25Khuay maekmei nunc ta tei nkhuaimei pang khou nang swluai bin ni tu hamh e. Nang rui kumna sw e thei thu, khuay maekmei nunc ta tei nkhuaimei pang khou dandi tii bin the cho. Hei tei thu kum ni tuang hamh e. Kandih kapwm tuang latzanpouc thu nchumhna latzan sw nina hamhna cho?”

26Khoutei Ringhpouc rui daw the, “Sodom khou khuay maekmei gaanv 50 nai e thei, kaniw khang rui ai mi kaidai ta swmaan lak ge.”

27Abraham rui sa dat re, “Apoubauhmei khou ai rui kumna sa dat dat bammei hei kuaklou o. Ai hei thu mbut taniang kumhmei dyng e, hei kumcna sa bam khang athouc maek ge. 28Mi kaidai khou tei khuay maekmei gaanv 50 tangh makna 45 na nai bam khwan e thei, panguh ntangh makmei khang tei rui mi kaidai kapwm tei swmaan ni dai?” Ringhpouc rui kumna daw e, “Khuay maekmei gaanv 45 nai e thei, ai rui mi kaidai tei swmaan lak ge.”

29Abraham rui sa dat re, “Gaanv 40 na nai bam khwan e thei tho?”

Ringhpouc rui daw e, “Gaanv 40 kiu nai e thei ai rui swmaan lak ge.”

30Abraham rui sa e, “Apoubauhmei, lungpuamhlou rio, ai sa dat ni he. Gaanv 30 na nai e thei akumh puni?”

31Kamei rui sa e, “Gaanv 30 kiu nai e thei ai swmaan lak ge.” Abraham rui sa e, “Apoubauhmei, ai nang khou salou dat ni he, kuaklou o. Gaanv 20 na nai e thei tho?”

Kamei rui sa e, “Gaanv 20 kiu nai e thei ai rui mi kaidai hei swmaan lak ge.”

32Abraham rui sa e, “Ringhpouc lungpuamhlou rio, ai sa dat guay ni he. Gaanv 10 na nai pw e thei tho?”

Kamei rui kumna sa e, “Gaanv 10 na nai e thei, ai hei tei swmaan lak ge.” 33Ringhpouc tei Abraham khou kachuc tangna tat dat kan the. Abraham ni kakai hanc guang dat the.

Currently Selected:

THAUREYMEI 18: RONGBSI

Highlight

Copy