THAUREYMEI 17

Gihruamhmei

1Abram katingkwm 99 khou Ringhpouc rui kakhou guangna sa the, “Ai hei Ngamparimei Racguangc e. Alat piu ntwnna lungc o. 2Ai lev nang kak khou latdyng laa puni kumna nangkik nangta geicna tiilou puni.” 3Khoutei Abram kazaw kandih khou sow nkhum khuakh khuak key the, kumna Ravguangc rui sa the, 4“Ai mi latdyng hei nang khou swloumei tuang the: nang hei zaatc mpeyna pupouc sw puni the. 5Nang zanc Abram tw dat lak khe, Abraham tw dat puni the, kalam thu ai rui nang ta zaatc mpeyna pupouc tiswlou kan the.#Rom 4.17 6Ai rui nang kikta mpeyna tiilou puni the, khatni zaatc mpeyna pat puni kumna guang nunc ni tilungc pat puni.

7“Ai rui alatdyng hei nang khou, khatni nang tou nang nac nunc kin khou tingsaeng latdyng swna ngaek bam puni the. Ai hei nang Racguangc khatni nang tou nang nac nunc Racguangc sw bam puni the.#Luk 1.55 8Ntaw nang gin swna lungc bammei kandic hei nang khang khatni nangkik nangta khang tii puni the. Kanaan kandic kapwm hei tingsaengzaeng nangkik nangta nunc tuang sw puni the, kumna ai kaniw tuang Racguangc sw bam puni the.”#Lat 7.5

9Ravguangc rui Abraham khou sa the, “Nang ni alatdyng hei ngaek nina e, nang kikta kaguayna guang nimei ganv guay khou mi hei ngaek nina e. 10Nang rui khatni nang kikta rui ngaek nimei latdyng kiu thu: nggaanvmei kaguayna gihruamc nina e.#Lat 7.8; Rom 4.11 11Nang rui nanggic twan tei ruamc nina e, hei tei rui nang lev anei kak khou latdyng swloumei tuang madanhmei khang the. 12Nang kikta saanvsaengh nggaanvmei kaguayna nangkai khou puancloumei bangc nac pwni, kapaengc thangc rui liu guangmei bangc nac pwni kazauhna zaeng tachatpui nungc gihruamc nina e. 13Nang kai khou rui puanhmei bangc nac pwni, kapaengh thangc rui liuguangmei bam pwni, gihruamc nina e. Mi hei rui nang khou swloumei latdyng tingsaengzaeng nai bam khang e. 14Nggaanvmei gihruamh makmei ta thu amei e twna ai laa lak ge, kalam thu kamei alatdyng ngaek mak ge.”

15Ravguangc rui Abraham khou kumna sa e, “Nang now ta Sarai twna kaw dat ri tho; ntaw khou rui thauna kazanc hei Sara di the. 16Ai rui kata suaihiamlou puni the khatni ai rui kakhou rui nang nac mpouh tiilou puni the. Ai rui kata suaihiamlou puni kumna kamei zaatc mpeyna pui sw puni the, kumna kanac pang khou guangh nunc chapat puni the.”

17Khoutei Abraham kazaw kandih khou sow nkhum khuakh khuak key the, “Tingkwm 100 tanghmeipu kanac nai dat puni dina cho? Tingkwm 90 tanghmeipui Sara rui nah puanc dat puni dina cho?” twna kakhanhna nuic the. 18“Ismael rui atampy luak rap nuh makna cho?” twna Abraham rui Ravguangc khou sa the.

19Ravguangc rui daw the, “Kiuc hamh e, nang now Sara rui mpouh akhat puanc puni, Kumna nang rui kazanc Isak twna phuak puni. Ai rui kakhou khatni kakikta khou tingsaengzaeng alatdyng ngaek puni. Mi hei tingsaengzaeng latdyng e. 20Ismael khang nang rui huaychamei tei ai chu the, ai rui kata suaihiamlou puni the kumna katu kana puan mpeyna tiilou puni khatni kakikta tigeiclou puni. Kamei guanghnac 12 pu sw puni kumna ai rui kakikta ta zaatc daihmei tiswlou puni. 21Tiki ai rui alatdyng hei thu nang nac Isak khou taanclou puni, kamei Sara khou rui nkun mi kumhmei ganv khou puanc puni.” 22Ravguangc rui Abraham khou sa nimei salou luaina tat dat kan the.

23Mi nungc tingmik kahak tei Abraham rui Ravguangc lat piuna kanac Ismael khatni baihmei kakai khou naimei nggaanvmei nac guay, kakai khou rui puanhmei bangc nunc khatni liu guangmei nunc kaguayna ta gihruamc the. 24Abraham kamei gihruamhmei tei katingkwm 99 khou e, 25khatni kanac Ismael rui tingkwm 13 khou e. 26Kakai punav nei neihkhat na rui gihruamc nchamc the, 27kabangc nunc lev twna ruamc nchamc the.

Currently Selected:

THAUREYMEI 17: RONGBSI

Highlight

Copy