THAUREYMEI 20

Abraham khatni Abimelek

1Abraham mi khou tei rui Negeb biak thangc key datna Kades lev Shur kak khou lungc the. Mi tangv tei, kamei Gerar khou lungc khanv bam khou 2kanow Sara ta katanpui de twna sa khwan e. Kumtina Gerarmei guangc Abimelek rui Sara ta laa the.#Tha 12.13; 26.7 3Neih khat zingbangc Ravguangc rui Abimelek mang khou guangna sa the, “Nang rui mi pui ta laamei zaeng rui zauclo nang theihmei di the. Kamei hei meicrammei now de.”

4Abimelek rui kakhou tatlou mak khwan e, kumna kamei rui kumna sa e, “Ringhpouc, kakhuay maekmei ai khatni amei nunc ta swluai nina cho? 5Abraham kamei kahak rui katanpui de twna sa e, mipui hei rui ni apuningc de twna sa muay the. Ai alung nthanna nkhuai maekna mi hei taanhmei tuang de.”

6Kamang khou Ravguangc rui kumna daw the, “Ngguay, nang lungning nthanna samei tuang e twmei ai thay e; hei zaeng rui nang ahu khou paapc taanh mak khang ai rui gaekloumei tuang the kumna nang ta kata tikahi makmei tuang the. 7Hei zaeng rui mipui ta kagaanv khang tii dat ti tho. Kamei hei muhzwng e. Nang theih mak khang kamei rui huayneylou dat puni the. Nang rui kata tei tii dat mak ge thei, nang theic puni the, nang ni nang mei guay ni theic puni.”

8Tinggaanc patna lauthwan thwanzingh Abimelek rui katuang meicdaihmei guay ta kaw kaduaina mi lam guay hei kaniw khou raclou the, kumna kaniw tei ping the. 9Khoutei Abimelek rui Abraham ta kaw guangna sa the, “Nang rui aniw khou tabui tuang swlou tha? Mi kumhmei swkasic-karouc nimei aruc khou khatni aguanghdic khou tikeylou khang ai tabui tuang nkhuailouna cho? Nang sw lak nimei tuang aruc khou swlou the. 10Tabui zaeng rui nang heikumna sw bam tu cho?”

11Abraham rui daw the, “Hei bamv khou hei thu Ravguangc ta pingmei nai bam khwan lak khe kumna anow ta laa khang rui ata swluai pwng e twna ai kakhanh khou rui the. 12Kaling thu kamei hei atanpui e. Kamei hei apu nac e, tiki apui nac thu hamh e, kumhpui zaeng rui ai kata kawmei tuang e. 13Kumna Ravguangc rui ata apu kai khou rui ginramdic thangc thouc patmei ganv khou, ‘Ai hei nang chaic de twna meic kathuicna khou sana nang ata adih kungc cho twmei lyan nina e,’ twna ai rui kakhou salou tina the.”

14Abimelek rui Sara ta Abraham khang tii dat the. Hei na hamhna lauziu ni, guaih ni, bangh ni mpeyna tii the. 15Kamei rui Abraham khou kumna sa the, “Mi hei akandih the; nang rui lungc nii niimei bamv khou lungc o.” 16Kamei rui Sara khou sa the, “Nang khuay maek ge twmei nang lev bam nchamhmei nunc khou lyanmei swna ai rui nang chaic khang daandi paek 1000 tii kan the; nang nkhuaimei taanv taanclou mak ge twmei meic kathuic rui thay puni.”

17Abraham rui Abimelek khang huayneylou the kumna Ravguangc rui Abimelek ta tigaylou dat the, kanow ta ni tigaylou dat the khatni kabangcpui nunc ta ni tigaylou dat tina kaniw nac puanc dat the. 18Kalam thu Abraham now Sara ta laamei zaeng khou tei rui Ravguangc rui Abimelek kai khou bammei ntumei guay tuang nacbamv thingclou khwan e.

Currently Selected:

THAUREYMEI 20: RONGBSI

Highlight

Copy