TATPATMEI 2

Mousi Puanhmei

1Mi ganv khou tei Levi kaikhwangmeipu akhat kakaikhwang nchamcmei akhat ta kaw the; 2kumna mipui tei kanac mpouh gaanv khat puanc the. Mi nac tei gay timei zaeng rui, kamei rui mi nac ta tei bw thumh nkamhlou the.#Lat 7.20; Ibr 11.23 3Kamei nkamh liat lak guang pwkhou, ntou rui mphaimei nggiuh akhat laana khi rui nkowlouna dui gut mak khang kasiamh lana, kamei rui ngana ta tei mi lungc khoutei louna, duithuak tin khou ntou ding khou ganclou the. 4Mi nac tei tabui kumh puni cho twmei kachaic luc rui duh thangc dingna zauc bam khwan e.

5Khoutei guangh nacpui duilow khang duithuak khou tei key bam khou, kabangc nunc duithuak khuangc khou tat bam khwan e. Kamei zuangctou ding khou nggiuh akhat howna, hei tei laaguang khang kabangcpui akhat ta thouclou the. 6Pharao nacpui tei rui hei tei laanc pat pwkhou, nggaanvmei nac akhat how the. Kamei kap bam tina mi nac khang tei kalung kabiu the. “Mi hei Ibrimei nac lana di the,” twna kamei rui sa the.

7Khoutei kachaih luc tei rui, “Ai tatna naruaipui khang Ibrimeipui ta kaw guang o cho?” twna kakhou sa the.

8“Ngguay, kaw guang o,” twna Pharao nacpui rui daw the. Mi tunacpui tei tat lana mi nganapui ta tei nduangh guang the. 9“Mi ngana ti hei laana akhang makuatlou o; ai nang khang kaphy tii puni,” twna guangh nacpui tei rui mi pui khou tei sa the. Kamei rui ngana ta tei laana makuat the. 10Mi nac tei daicthau pwkhou, kamei rui guangh nacpui khang tiilou dat the; kumna kamei rui kanac swna laa kan the. “Ai rui kata dui khou rui laa patloumei tuang e,” twna sana kamei rui kazanc Mousi twna phuaklou the.#Lat 7.21

Mousi Midian thangc Pak Tatmei

11Mousi tei meicpha pat pwkhou, kamei nunc Ibrimei zaat ta zauh khang tat pat pwkhou, kaniw ta namna taanv titaanc ranvna bammei ta how the. Izipmeipu rui Ibrimei, akhat ta swluai bammei ta ni how the.#Lat 7.23-28 #Ibr 11.24 12Mousi tei zauc kari kariangna zauc pwkhou, gaanv khat na sini zauc bammei ta how mak lana, kamei rui Izipmeipu ta tei swluai the; kumna kapumc tei syniangpung khou phuplou the. 13Nthuanh thau datna kamei tatpat dat pwkhou, Ibrimeipu nei abay adap bam khwan the. Nkhuaimeipu khou tei kamei rui sa the, “Tabui swna nang Ibrimei nchamcta bai bam tu cho?”

14Mipu tei rui daw the, “Thow rui nang ta aniw kaipouc, khatni latzanpouc tiswlou pwna cho? Izipmeipu ta swluaimei tei kumcna, ata ni swluai me twna cho?” Khoutei Mousi tei ping the; “Ai taanc kanmei tei meic nunc thay bu di the,” twna kakhanh the. 15Guangh tei rui mi lam tei chu pwkhou, kamei rui Mousi ta swluai khang karamc the, tiki Mousi tei pak tatna Midianmei kandic khou lungh khang tat the kumna duikhunc daeng khou dungc bam khwan e.#Lat 7.29; Ibr 11.27 16Midianmei amuh Jethro nac aluh gaanv chanei kaniw pu tuang lauziu khatni ziuh pang khang duikuak khou dui zu padiklou khang khou tei guang khwan e. 17Tiki lauziu gaenghmei asaekc rui Jethro nacpui nunc ta tei alay ganc bam the. Khoutei Mousi guangna kaniw ta gaeklouna, kaniw khouringc khang dui tizangvlou the. 18Kaniw pu daeng khou guang dat pwkhou, kamei rui “Tabui swna nangniw aseic heidi guang dat zaic bam tu cho?” twna thanv the.

19“Izipmeipu gaanv khat rui aniw ta baihmei lauziu gaenghmei nunc khou rui gaeklouna aniw khang dui ni zulou the; khouringh guay khang ni tizangvlou the,” twna kaniw rui daw the.

20“Kamei kiu tabui thangc bamna cho? Tabui swna mi pu ta kiuc hei thangc tei ganclou bam tu cho? Aniu lev tu nchamc khang kaw tat tho,” twna kamei rui kanac nunc khou tei sa the.

21Mousi mi kai khoutei lungh khang nuh the; kumna Jethro rui kanacpui Zippora ta kanow khang suanclou the. 22Zippora khou rui mpouh gaanv khat puanc the. Mousi kumna kakhanh the, “Mi kandic khou hei ai gin swna bam e; hei zaeng rui kazanc Gershom twna kaw ni the.”

23Mi ganv dak lungc khou tei, Izipmei guangc tei theic kan the; tiki Isaraelmei nunc tei thu bangh swna puihuayna, nkhavlou khang huayna bam khwan e. Kaniw kapmei khwan tei Ravguangc pamv tangc the. 24Kaniw rui puihuaymei khwan tei chuna, Ravguangc kamei rui Abraham, Isak, khatni Jakob khou swlou kanmei latdyng tei ningtow the.#Tha 15.13,14 25Isaraelmei nunc bangh sw bammei lwnlung tei, kamei howna kaniw khang taanvswlou the.

Currently Selected:

TATPATMEI 2: RONGBSI

Highlight

Copy