TATPATMEI 1
1
Isaraelmei nunc ta Raimei
1Mi hei Isaraelmei Jakob nac nunc katuang katuang kaikhunc ta nduanghna Jakob lev Izip thangc keymei nunc zanc the.#Tha 46.8-27 2Reuben, Simeon, Levi, Juda, 3Isakar, Zebulun, Benjamin, 4Dan, Naphtali, Gad khatni Aser. 5Jakob khou rui lungc pat rapmei meic kapwmna gaanv 70 e. Josep thu Izip khou key bam rey the. 6Josep khatni kachana nunc, mi kin khou lungc bammei guay tei kaganv theilayna theic ngam kan the. 7Tiki kaniw kikta, Isaraelmei nunc tei lungc kingckiuc the; kumna meicsing geic the; khatni tanc the; Izip kandic tei kaniw rui bam padik pat the.#Lat 7.17
8Khoutei guangh kathanc, Josep lam khou thay zat makmeipu akhat rui Izip kandic khou guanghtu the.#Lat 7.18 9Kamei rui kamei nunc khou sa the, “Zauclo mi Isaraelmei nunc hei meic geic the; khatni tanc the; aniu ping khang nai the. 10Suc-rih guangpui ganv khou, kaniw rui aniu ta zauczihmei biak liangcna aniu ta adowna, mi kandic khou rui pak tat kan nuh e. Kaniw hei meicsing geic mbu dat mak khang, aniu ramhkhat sw mak nuh mak khe.”#Lat 7.19 11Kumna Izipmei nunc rui kaniw ta taanv titaanc ranvna, kaniw lungc sw nnau key khang kaniw ruc khou bangh sinmei nunc lou the. Guangh taektw ryloumei bamv sw nimei kaidai Pithom lev Ramesi tei Isaraelmei ta tikasiamh the. 12Izipmei nunc rui Isaraelmei nunc ta rai tihay meicsing mbu hay hay thau the; kumna mi kandic kapwm khou tei lungc lik hay hay thau the. Izipmei nunc tei Isaraelmei nunc ta ping thau the. 13Izipmei nunc tei rui Isaraelmei nunc ruc khou zauzian khat sini maekna taanv titaancna rai thau the. 14Isaraelmei nunc ta niangtauc kasiamhna langcna kai swmei taanv khou khatni kaniw tuang laupuk khou taanv kazaat ntanghna titaanc the, kumna kaniw ta ranvna rai kasic the. Kaniw panty tei kungcsihna lungc the.
15Ibrimeipui nunc ta nahpuanclou bammei nahpuanhpeic Shiphra lev Pua khou Izip guangc rui sa the, 16“Nangney rui Ibrimeipui nunc ta nahpuanclou pwkhou, nggaanvmei nac e thei swluai o; ntumei nac e thei ringc bam kan diu.” 17Tiki nahpuanhpeic nei tei Ravguangc ta ping e; kumna guangh lat tei piu mak khe. Kaney rui nggaanvmei nac ta ni swluai mak e. 18Kumna guangh tei rui nahpuanhpeic nei ta tei kaw guangna, “Nangney tabui swna heikumna sw bam tu cho? Nangney tabui swna nggaanvmei nac nunc ta tei swluai mak tu cho?” twna sa the.
19Kaney rui daw the, “Ibrimeipui nunc thu Izipmei nunc kumh mak ge; aney guang mak khou rui puanc rey raph rap kanna de.” 20Nahpuanhpeic nei ta Ravguangc rui zauzianlou the; kumna Isaraelmei nunc tei meic geic patna tanc thau the. 21Kamei rui Ravguangc ta pingna chakhwang swna lungc tipui zaeng rui kaney khang kaikhunh tiilou the. 22“Ibrimei nggaanvmei nac puanhmei kathuic tei Nail duithuak khou phaiclou nina e tiki ntumei nac thu ringc kan diu” twna Pharao rui kamei guay khou latdanv pat the.#Lat 7.19
Currently Selected:
TATPATMEI 1: RONGBSI
Highlight
Share
Copy
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
