MARK 5

Jisu na Anyi Nkemehai Ghamu Ssiketen sa pi mehaikecü

(Mat 8.28-34; Luk 8.26-39)

1Jisu nu ma sansikeyathu na Galilee Ghajü khhakawa Gerasa yyi wi ghoya. 2Jisu na ahun wina shhughoya meyi ciwi anyi kesü nkemehai ghamu ssi keten na ashüjjen jawi na gho ma metu. 3Ma ashüjjen jawi hangden nu thola amighe ssüli lela pi ma bhenya nten. 4Kepaghenanye matsü kejon wi lela amighe ssüli pi ma ccü ma kwen bhen lela ma assüli tsü pvüdhi nu ma ccü pi amighe cügheden. Ma zü ntsawa nu thola ma ghantenya nten. 5Aghaja nu aghanan lela ma ashüjjen ja nu ayikhathu wi kegoe, nu keshüthangla magha nu ma ketanla alon pi ma kechen benden.

6Ma alen kesie wina Jisu muya nu bvü gho kukedu ma kinyi. 7Ma misikhhali magha nu khi, “Kemisintsa Anyiza Tsawa Jisu! No hi pi mangwa sa mvu ben nu? Hi nmeten lalo, hi Anyiza nyan wina no wi khieben.” 8(Ma hati khi, kepaghenanye ha Jisu na “Nkemehai ghamu anyi ha miwi na shhugholo,” khi.)

9Tsalina Jisu ma wi keü, “N-nyan thowa nu?” Anyi tsüwa na khineng, “Inyan na ‘Atenti’ -— kepaghenanye ikhang na kejon la!” 10Ma Jisu wi ayyi tsüwa wina mathu kesun pi nbvü thsü lalo keshikene.

11Ciwi avü khang keti kesü na ayikha wi atsse yaden. 12Tsalina nkemehai ghamuthu na Jisu wi khie, “Ikhang kesun pi avü jawi wa thsülo, isathu, ikhang wala avü gwo wi dua na.” 13Jisu na mathu ya tsüti sa thsüa, nu nkemehai ghamuthu na anyi tsüwa wina shhugho nu wa avüthu gwo wi dua. Akhang tsüwa wi avü hazar keni-u tsüdila kejügüli sen nu alonshi pang wi wha nu aghajü wi du meyanthi shan.

14Anyi avü kehiethu na bvü sen wa anyuti nu alli tsüdi wi ajüh ha pi thangchia. Anyithu na mangwa saben nu kesa ghangle gho, 15nu mathu na Jisu wi kegho wi anyi kheni atsaghang tenti ssi ketenwa tsü muya. Ma ciwi athsü mphi nu ma leben metsashhu donkiben, nu mathu na sashü na messiya. 16Ha mukeyathu na wala anyi atsaghangthu ssi ketenwa nu avüthu miwi mangwa khati sa khe khi pi anyithu kiza.

17Tsalina mathu na Jisu ya mathu yyi wina bvülo khie.

18Jisu na ahun wi du keten wi anyi kheni atsaghang ssi ketenwa tsüna ma wi “Hi la no gweghe wa thsülo” khie.

19Isala Jisu na ma ya tsüti nsa thsü nu ma wi kiza, “Njjen wi ntheghithu wi wha nenglo, nu Apvüwa na nghena mangwa sachi cü, nu ma khatila no nantizen chicü khe pi mathu kizalo.”

20Tsalina anyi tsüwa na Anyuti Tagha tsüdi wi wala Jisu na ma ghena mangwa sa chicü khe khi pi nyu kiza. Nu tsü cüki zakeyathu tsüdila amansa.

Jaira nga nu Nza Jisu Thsü Kedhen kechiwa

(Mat 9.18-26; Luk 8.40-56)

21Jisu na aghajü pvüdhi sen khhakawa wi ki neng. Ciwi aghajü ghüsa wi anyitenti na ma vüben. 22Jaira, Sinagog wi kedi kesü na gho Jisu mukeya wi ma nkhwendu, 23nu Jisu wi keshikene nu khi, “Inga ghanyi tsüna keshü pang sa wadha. No ncha la, ghola nkwen chang pi ma miwi chinu ma ya mehaiya nu hangya thsülo.”

24Jisu na anyi tsüwa gweghe waden. Anyitenti keti na ma niewa keten ghena nyu na ma khebhon sen nu waden.

25Ciwi nza kesü ma gwo wi amapi taghakeni ajjü keji nu ketizen sa ntsa sa, 26nu ma keben tsüdi dedi pi dawakechüthu yala ma noncca thsü lela mehai keyawa nye nmehai pfüpfüla wa kesa nyi na ben. 27Ma Jisu cüki zaya nu anyitenti jawi asengwa na shhugho Jisu thsü katen kidhenchi, 28nu ma ketanla khi, “Keujüla hi ma thsü ketan lela kidhenya lethu, hi mehaiyaben.”

29Ma wala Jisu thsü kidhenya meyi ma gwo wi ajjü kekiji khen; nu ma ketanla ma gwo wi ma kinaa tsü mehaiyadha kesa chüya. 30Tsümeyi Jisu na ma gwo wi kekhang shhudha kesa chüya kesalina ma khapeghe wa anyitenti wi keü, “Thowa na hi kidhenchi nu?”

31Ma sansikeyathu na luneng, “Ghangchilo, anyitenti na no vü nu no khephon ben lethu, no khati nu, ‘Thowa na hi kidhenchi nu?’ isa keü ten nu?”

32Isala Jisu na thowa na tsüti sa khe chüyale ghang kevüli wa. 33Nzawa na ma mehaikeya chüya nu gho ma messila kedheggü sen nu Jisu ccü wi nkhwendu nu ma wi atsentsa tsüdi pi kiza. 34Jisu na nzawa wi khi, “Inga, no kenondi na no sa pi mehai cüdha na; nlebencca whalo, nu no kinaa wi mehai cencuyalo.”

35Jisu na ha khitu keben wi Jaira jjen wina nyilothu pahan na gho ma wi kiza, “N-nga shüdhale. Mangkesa na Kesansiwa likesaghang saben nu?”

36Jisu na mathu jühkekhi tsü nkinala Jaira wi khi, “Nmessi lalo, nondi benyalo.” 37Isanu ma anyi thola ma gweghe nwa thsüla Pitor, James nu ma cünyuwa Johan ma kecheng ketan ssinu wa. 38Mathu na wala Jaira jjen cukeya wi Jisu na anyithu na ahathana nu magha ntsa qai keben muya. 39Ma nduku wi du nu mathu kiza, “Nthu mangkesa na ahathana nu maghala qaiben nu? Ghanyiwa ha nshü, isala ma jen ben le!”

40Mathu na ma nankeqhe wa, tsalina ma mathu tsüdi pi akhemi wi shhu thsüa, nu ma ghanyiwa bajja nu ma sansikeyathu kecheng tsü ketan ssiya nu ghanyiwa pi jen thsü ketheng pen wi du. 41Jisu na lanyiwa kwen tsü zan nu ma wi khi, “Talitha koum,” ma jjügi “Tizüle, hi no kizaben, shaghalo.”

42Tsümeyi ma shagha nu alentsenwa. (Kepaghenanye ma amapi taghakeni sadha.) Hati kesa wi mathu na amansa ntsa sa. 43Isala Jisu na ha pi thola nkiza lalo kesa mathu kiza ntsa sachi, nu “Pala pahan pi ma dsa thsülo” khi.

Currently Selected:

MARK 5: RENGNBSI

Highlight

Copy