MARK 6

Nazareth Wi Jisu Meya Mvulakesa

(Mat 13.53-58; Luk 4.16-30)

1Jisu na apen tsü teshi nu ma sansikeyathu ssisen ma hang keshagha nyuti wi tsü wa. 2Ma Sabbath tsathang wi Sinagog wi wa nyu sansi. Ciwi anyi kejonla ben, nu mathu na ma jüh zakeya wi mathu mansa nu keü, “Anyi ha ma khiewi hathu ha tsüdi muya nu? Kemetsa khatila pi ma cütheng nu? Ma khati nu amankesa ha sa yaben nu? 3Ma achankecüwa nu Maria manyi tsa, ma cünyuthu na James, Josef, Judah, nu Simon nye kwe? Nu ma tssüggüthu la he wi ithu gweghe hang nben kwe?” Tsalina mathu na ma meya mvula.

4 # Jhn 4.44 Jisu na mathu wi kiza, “Atusenjüh-kechü kesü tsüna ma kahang nyuti wi ma shilithu nu ma theghithu jawi ketan khe kahe wi tsüdila ma nyuwakü den.”

5Ma ciwi ma kwen chang pi kesakinaathu kezeng-u miwi chi nu mehaikeya tsü ketan khe amankesa kejon kuli meya. 6Anyithu na kenondi nkemi ghena ma amansa.

Jisu na Sansikeyathu Taghakeni Kesunshikechi

(Mat 10.5-15; Luk 9.1-6)

Tsaseng wi Jisu na tsü kevü anyuthu wi wa nu nyu sansi. 7Jisu na sansikeyathu taghakeni cighu chi nu mathu meshu kenini kesunshichi. Ma nkemehai ghamuthu jügüshiya kemehai kekhang pi mathu cü, 8nu mathu kiza, “Nthu kijünyi kewa ghena akhhatssü kesü ketan khe mangla npvü la — kedsakejjü, ajula, nu nthu gwo wi apisa mangla npvü la. 9Accüguwen pvülo isala agwomejuwa gilli npvüla.” 10Ma mathu wi ha la pi mathu kiza, “khiewi nthu ssiya khe nthu na apen tsü npi keteshi chu ajjen tsüwa wi benlo. 11#Kek 13.51 #Luk 10.4-11 Nu khiewi anyithu na nthu ssi meya nu nthu jüh nkina mvula sa khe mathu na kemessi ben le kesa zensu wina nthu na anyu tsü teshi wa keten wi nthu ccü wi ayyinikhu tsü kekhashalo.”

12Tsalina mathu na wala anyithu ya mathu kesami wina khapegheyalo kesa pi sansi. 13#Jos 5.14 Mathu na atsaghangthu kejon jügüshi, nu oliv deli pi kesakinaathu nyen nu mathu kejon sa pi mehai cü.

Johan Baptizwa Keshü

(Mat 14.1-12; Luk 9.7-9)

14Herod Kadimi #6.14:Herod Kadimi; Galilee wi kadikesawa Herod Antipa na ha tsüdi zaya, kepaghenanye Jisu nyankethang na apen tsüdi wila chüwadha. Anyi pahan na Johan Baptizwa na hangneng-shaghadha le! Tsalina ma amankesathu kuliya kemehai kekhang ben.”

15Isala kepathu na ‘ma Elijah le’ khi.

Kepathu na khi, “Ma atusenjüh-kechü kesü, kheni atusenjüh-kechüthu kesü ti kesa le!”

16Herod na ha zakeya wi ma khi, “Ma Johan Baptizwa hi ma li wieya kesawa tsü isala ma hangneng-shaghadha le!” 17#Luk 3.19,20. Herod na ahza khuchi pi Johan ghanya thsü, nu ma bhen pi atssüzüjjen wi chia. Herod hati kesa ha na ma ma cünyuwa Filip wubvü yaya kesawa Herodia tsü ghena. 18Johan Baptizwa na Herod kizala, “No ncünyuwa wubvü keya ayen nmi le.”

19Tsalina Herodia na Johan nanmeghü nu ma pathiale sa, isala ma Herod ghena tsüti sa meyala.

20Herod na Johan messi kepaghenanye ma Johan tsüna anyi mehai nu kemetha nyi ghena ma pi mehaitsü noncca theng. Ma Johan jüh zakeya kaghapeng ma kivvü ntsa sa waten lela ma Johan jüh kina mvuthi saten.

21Asakhen wi Herodia na matsü kemehai muya. Tsüna Herod kebvügha tsathang kesa wi kidhan wi kedithu, süpahi kedithu nu Galilee nyi kedithu tsüdi cichi nu kemishu keti sa. 22Herodia nga#6.22: Herodia nga; zhükechi pahan wi Ma ngawa Herodia ben na ghola nashü, nu Herod nu ma kejjenthu tsüdila tsü nen ntsa sa. Tsalina Kadimiwa na ghalawa wi kiza, “No mangwa yamvu ben khe khielo, hi tsü pi no cüaben na.” 23Ma kishen nu nzawa wi khi, “No hi wi mangwa khie khe tsü pi no cüden, hi kadiyyi gishü pahan lela pi no cüaben.”

24Tsalina ghalawa akhemi wi shhu ma jja wi keü, “Hi mangwa khie nu?”

Ma jja na luneng, “Johan Baptizwa li tsü khielo.”

25Ghalawa na kaghaji bvüsen Kadimiwa wi gho nu khie, “Hi no yala Johan Baptizwa li pi akhu ha wi chi pi hi cü thsü mvu ben le!”

26Kadimiwa na ma hathana ntsa sa isala ma tsü bheghe meyala, kepaghenanye ma ma kejjenthu tsüdi tuwi na kishendha. 27Tsalina Kadimiwa na aghikehiethu kesü kesunchi nu wala Johan li dhi pie gholo ahza khuchia. Aghikehiewa na wala atssüzüjjen wi Johan li dhiya, 28nu pi akhu wi chi sen gho ghalawa cü, nu ma tsü pie wa ma jja cüa. 29Johan sansikeyathu na ha cüki zakeya wi ghola ma kamang pie wa vhüa.

Jisu na Anyi Hazar Manga Ghanjakecü

(Mat 14.13-21; Luk 9.10-17; Jhn 6.1-14)

30Apostelthu na gho neng nu mathu kekuli nu nyu kesansi cüki tsüdi khi pi Jisu kiza. 31Ciwi anyi kejon na gho nu bvü keben ghena mathu na mnan nu dsajjükeya tsü la nmula saben. Tsalina Jisu na mathu wi kiza, “Ghalo, ikhang ketan nyu nkemi pen kesü wi wa nu ciwi nthu ya mnanya thsü na.” 32Tsalina mathu ahun wina nyu nkemi pen kesü wi wa.

33Isala anyi kejon na mathu wa keten tsü mu nu mathu chüben; tsalina mathu anyuti tsüdi wina bvü wa Jisu nu ma sansikeyathu tuwi na apen tsü cuya. 34#Scs 27.17; 1 Kad 22.17; 2 Kc 18.16; Ezk 34.5; Mat 9.36. Jisu na ahun wina shhugho anyitenti muya nan mathu cüki meshen pi ma leben güccüya, kepaghenanye mathu na khaghaneni ma kehiewa nkemi ti kesa. Tsalina ma pala kejon pi mathu sansi shhu. 35Minulen wi sansikeyathu na ma wi gho nu khi, “Minu ntsa wadha, nu ikhang ketan he wi ben. 36Anyithu kesun pi bvü thsü nu mathu yala wa ha kevü alli nu anyuthu wi mathu ketanla kedsakejjü sheiya thsülo.”

37Jisu na luneng, “Nthu na pala pahan pi mathu dsaya thsülo.” Mathu na keü, “No ikhang wala apisa akutimen#6.37: akutimen: rükatssü kesü na akutimen kesü (Mat 20.2 wi ghangchi) meza keni pi amesa shü sengho mathu dsa thsü mvuben kwe?”

38Tsalina Jisu na mathu keü, “Nthu na amesa khaju ben nu? Wala ghangchi nanlo.”

Mathu wa mukeya seng wi gho ma wi kiza, “Amesa be manga nu anga ben keni ben le!” 39Tsaseng wi Jisu na ma sansikeyathu wi anyithu gishü zighe pi akhang sala tsüdila aghang kemejjü miwi donkiya thsülo kiza. 40Tsalina anyithu na mezaza nu denini khang sala donkiya. 41Tsaseng wi Jisu na amesa be manga nu anga ben keni tsü khuya nu tang wi ghang nu Anyiza wi kesawegü khiechi. Ma amesa tsü pakhhi nu pi sansikeyathu cü nu pi anyithu gishüya thsü. Ma anga ben keni tsü la pi mathu gishüya thsü. 42Mathu tsüdila dsa pi anonkwen ntsa saya. 43Tsaseng wi sansikeyathu na amesa nu anga kedsatu tsü ashijü taghakeni saghuya. 44Anyi tsü kedsathu na hazar manga.

Jisu na Atssü Miwi Lenketsen

(Mat 14.22-33; Jhn 6.15-21)

45Tsümeyi Jisu na ma sansikeyathu ya ahun wi duya thsü nu ma tuwi na aghajü khhakawa Bethsaida wi wa thsü. 46Ma anyithu teshi theng nu ayikha kesü wi kekhie sa wa. 47Minulen wi ahun na aghajü non wi ben nu Jisu na ma ketan aghüsa wi ben. 48Jisu na ma sansikeyathu na ketizensa keben tsü mu, kepaghenanye ameghü na sho ntsawa pi mathu moben. Ma aghanen amighe kekihhe kecheng nu tugho jüwi tsü atssü miwi na lentsen sen nu mathu wi gho. Ma mathu thenkeghe wale saben, 49Isala mathu na ma atssü miwi lentsen keten muya. Mathu kemeshen “Ha acenpvü kesü le!” khinu magha. 50Mathu na ma mukeya wi tsüdila qhethiketen sa.

Tsümeyi Jisu na mathu wi khi, “Lebenzüyalo! Hi le, nmessi lalo!” 51Tsaseng wi ma ahun wi dula mathu gweghe benya nan ameghü na nsho la. Sansikeyathu na amansa ntsa sa, 52kepaghenanye mathu na amesa pi anyi hazar manga ghanja kecü jjügi tsü chüshi meya; mathu leben na dhu.

Jisu Na Gennesaret wi kesakinaa sa pi Mehaikecü

(Mat 14.34-36)

53Mathu na aghajü khhaka sen nu Gennesaret yyi wi ghoya nu mathu hun pi aghüsa wi hugia. 54Mathu ahun wina shhugho meyi anyithu na Jisu chüya. 55Mathu na ayyi maben wi la bvü wa; mathu na ma khiewa ben le kesa chüya khe kesakinaathu pi mathu we keshiphi miwi chi pie nu ma wi gho. 56Jisu na apen kahe wi anyu, anyuti, nu allithu wi kewa wi anyithu na kesakinaathu pie nu asenkesapenthu wi gho, nu kesakinaawa yala ma thsü katen lela kidhenya thsülo ma wi khie. Nu tsü kidhen keyathu tsüdila sa pi mehaiya.

Currently Selected:

MARK 6: RENGNBSI

Highlight

Copy