MARK 4

Amacü Kivvüwa Pi Ajühkaghape

(Mat 13.1-9; Luk 8.4-8)

1 # Luk 5.1-3 Jisu na kheneng wa Galilee Ghajü ghüsa wi nyu zhüsansi. Anyitenti kesü ghola ma vüya kesalina ma atssü wi du ahun kesü wi donkiya. Anyitenti na aghüsa wi atssü kete wi donben. 2Ma ajühkaghape wina pala kejon pi mathu zhüsansi nu mathu wi hati kiza:

3“Kinalo, kuti ciwi anyi kesü na amacü vvüwa. 4Ma amacü pi ma lli wi kivvüchi wi pahan na alen wi qancadua nu awathu na gho mcüa. 5Pahan na ayyi keu ketan keben alon miwi qancadua. Ciwi ayyi nkemi ghena amacü na wan shigü shagha. 6Aghani na shhugho tsü thsü kechi wi ma ghazan na dhugü chadu nkeya ghena tsüna wan jü wa. 7Pahan na aghazüthu jawi qancadu nu shigü keshagha wi mathu khwenshaya nu ma bi bün meyala. 8Isala pahan na ayyi kemehai wi qancadu nu shigü shagha ma bi changha, achentugho, nu meza bünya.”

9Jisu na khi, “Nthu akhuna pvü ketenthu kinayalo!”

Ajühkaghape Ma Jjügi

(Mat 13.10-17; Luk 8.9-10)

10Jisu na ma ketan keben wi ma jüh tsü za keyathu pi sansikeyathu taghakeni gweghe ghola ajühkaghape tsü khimetha chilo keü. 11Jisu na luneng, “Anyiza Kadiyyi cüki kekuthi tsü pi nthu cüdha. Isala kepa wi amei wi kebenthu na ajühkaghape wina pala tsüdi za yaben, 12#Isa 6.9-10 isanu

‘Mathu na ghang nu ghang lela muya nben;

mathu na kina nu kina lela chüshiya nben.

Kepaghenanye keujüla mathu na tsüti sa lethu,

mathu na Anyiza wi khenen gho

lethu ma mathu kesami teshi cüaben.’ ”

Jisu na Amacü Kivvüwa pi Ajühkaghape Khimetha kechi

(Mat 13.18-23; Luk 8.11-15)

13Tsaseng wi Jisu na mathu wi keü, “Nthu na ajühkaghape ha ma jjügi nchü kwe? Isathu, nthu na khati nu ajühkaghape kepathu jjügi chüya nu? 14Amacü kivvüwa na Anyiza jüh pi vvüchi. 15Anyi pahan na amacü alen wi keqancathu ti kesa; mathu na ajüh tsü zaya meyi Satan na gho mathu leben wi tsü sen bvüa. 16Anyi kepathu na amacü alon miwi keqancathu ti kesa. Mathu na tsü zaya meyi anonghe ntsa nu yaya. 17Isala mathu ghazan dhugü chadu nkeya ghena matsü kesie ben meya. Tsalina ajüh tsüwa ghena ketizenkesa nu kemeten-kemesha kegho wi mathu na wan tsü teshiden. 18Anyi kepathu na amacü aghazüthu jawi keqancathu ti kesa. Mathu na ajühwa tsü zayadha; 19isala ayyiwa kenen, keben-keyeng ketepagha, nu pala kepa wi tsüdi kenmvu na ajüh tsü khhwensha nu ma bi bün meyala. 20Isala kepathu na amacü ayyi kemehai wi keqancathu ti kesa. Mathu na ajüh tsü zaya nu yaya, nu ma bi bünya; pahan na changha, pahan na achentugho, nu pahan na meza tsüti bünya.”

Palakhang Cakhu wi Ahula Kesü

(Luk 8.16-18)

21 # Mat 5.15; Luk 11.33 Jisu mathu wi kiza, “Anyi kesü la ahula pi ma kedonpen wi ndonla pi palakhang cakhu nyelela awe cakhu wi donten kwe? 22#Mat 10.26; Luk 12.2 Kepaghenanye mangwa na kuthiben khe tsüdila pi nyu chüya thsüaben, nu pala shanbhon kethengthu tsü sen nu kewegü wi ghoaben. 23Nthu akhuna pvüten lethu, kinaya!”

24 # Mat 7.2; Luk 6.38 Ma mathu wi kiza, “Nthu na zakeya tsü ghena kiden-kesha yalo! Kepaghenanye nthu na kede pi nyu kecü tsüti kede pi nthu cü neng den, nu tsü miwi kejiki pi nthu cüden. 25#Mat 13.12; 25.29; Luk 19.26 Anyi thowa na pala pahan ben khe pi wwa neng cüden, isala mangla nkemiwa ma kwen wi keu keben tsü lela sen bvüaben.”

Palacü Keshigü Pi Ajühkaghape

26Jisu khineng wa, “Anyiza Kadiyyi hana anyi kesü amacü pi ma lli wi kivvüchi tsüti kesa. 27Ma aghaja wi jen wa nu atsankethang wi shagha, nu tsü jüwi amacü na pvükhhi nu shigü shagha lela ma nchü. 28Ayyi na ma ketanla tsü sa pi shigü shagha nu ma bi bünya thsü; tsüna atuwa maton, tsaseng wi mawa, nu asakhenwa maji wina mabi kejon bünya thsüden. 29#Jol 3.13 Asubi na nyünya lethu ma akecükhhagha sen nu alli tsü wwiden, kepaghenanye alli kewwi tsüna ghodha.

Hanuwencü pi Ajühkaghape

(Mat 13.31-32,34; Luk 13.18-19)

30Jisu na keü, “Ithu na Anyiza Kadiyyi ha khati kesale khiya mehai, nyelela ajühkaghape mangwa pi tsü jjügi khiya mehai nu? 31Hana anyi kesü na ayyi wi palacüghe jawi kizza ntsawa hanuwencü kesü pi ayyi wi keyangchi ti kesa. 32Tsü pi yangchi lethu shigü shagha aghangthu jawi keti ntsawa saden, nu ma cünathu ketiti shigü shagha nu awathu na gho ma cakhu wi mathu ghacen saden.”

33Anyithu ya chüya kemehai chu Jisu na ajühkaghape hathu ti kesa kejon sen nu mathu khisansi. 34Ma ajühkaghape kesü la nsenla mathu nsansi, isala ma ma sansikeyathu ketan gweghe keben wi tsüthu jjügi tsüdi khimetha pi mathu kizaden.

Jisu na Caghamo Kekhasha

(Mat 8.23-27; Luk 8.22-25)

35Tsü ghanan minulen wi Jisu na ma sansikeyathu wi kiza, “Ikhang aghajü khhaka kawa kina ghalo.” 36Tsalina mathu na anyitenti tsü teshi nu sansikeyathu na Jisu donki keben ahun wi tsü duya nu mathu gweghe wa. Ciwi ahun kepathu la ben. 37Zulila caghamo khang ntsa sa shagha nu atssü na ahun pong dugho kesalina tsü na atssü non wi dua keten ti sa wa. 38Isala Jisu na ahun ccügwen wi amchen miwi jenben. Sansikeyathu na wa Jisu pamechü nu hati khi, “Kesansiwa, no ikhang shü tendha ha nchü kwe?”

39Jisu na shagha ameghü satekü nu atssüketi wi khi, “Nsho la nu ccen ben walo.” Ciwi ameghü na nsho la nu ccen sa. 40Tsaseng wi Jisu na ma sansikeyathu wi khi, “Nthu mangkesa na qhethiketen sa nu? Nthu khili la kenondi nmi kwe?” 41Isala mathu na messi ntsa sa nu khokho wi hati khiwa, “Anyi ha thowa nu? Ameghü nu atssüketi lela ma jühkina keten hana!”

Currently Selected:

MARK 4: RENGNBSI

Highlight

Copy