MATHI 17

Jisu Tsi makepa Sakesa

(Mrk 9.2-13; Luk 9.28-36)

1Ghanan tugho seng wi Jisu na Pitor, nu ma cünyu James nu Johan ssiya nu mathu gweghe ayikha wi wa. 2Mathu na ghang keben wi Jisu tsi na makepa sa: ma mmi na wegü pila aghani ti nu ma thsümeni na miki pi cwencwe sa. 3Ciwi sansikeyathu na Mosa nu Elijah manyi na Jisu ccüneng keben mu. 4Tsalina Pitor na ajühkhi pi Jisu kiza, “Apvüwa, ikhang hewi keben ha mehai ntsawa le! Keujüla no kenen lethu, hi hewi anithsüjjen kecheng sa na, tsüna kesü nghena, kesü Mosa ghena, nu kesü Elijah ghena.” 5#Ade 22.2; Zak 2.7; Isa 42.1; Mat 3.17; 12.18; Mrk 1.11; Luk 3.22; Aye 18.15 #2 Pi 1.17-18 Ma ha khitu keben wi akulukeshü kemiki na mathu miwi gho nu ciwi ahhai kesü kekhi na, “Hawa ha hi kaghaliwa itsa, hi kenen ntsawa, ma jühkinalo.”

6Sansikeyathu na ahhai tsü zakeya wi mathu messi ntsa saya nu mathu mmi zan nccüggüwa. 7Jisu na gho mathu pa nu khi, “Shaghalo, nmessi lalo.” 8Tsalina mathu yaki shagha ghang chi nan ciwi thola nmila Jisu ketan benla.

9Mathu ayikha wina kedugho wi Jisu na mathu wi kiza, “Nthu na kemanthi kemu cüki ha pi Anyi Tsawa na keshü wina npi hangneng-keshagha chu anyi thola nkiza lalo.”

10 # Mal 4.5 Tsaseng wi sansikeyathu na Jisu keü, “Mangkesa na ayenkesansithu na Elijah atuwa sa gho benle khiben nu?”

11Jisu na luneng, “Ntsakhiwa, Elijah na atuwa sa ghoben, nu ma pala tsüdila kiden yaben. 12#Mat 11.14 Isala hi nthu kizaden, Elijah na ghodhale nu anyithu na ma chü meyala, isala mathu na ma miwi mathu kenenwa tsü sale. Tsü makesü mathu na Anyi Tsawa miwi la mathu kenenwa saben.”

13Tsaseng wi sansikeyathu na ma mathu wi Johan Baptizwa cüki khibenle kesa chüya.

Jisu Na Pvüzanyi kesü Atsaghang Ssiketen sa pi Mehaikecü

(Mrk 9.14-29; Luk 9.37-43)

14Mathu na anyitenti wi ghoneng nan ciwi anyi kesü na gho Jisu tuwi akhhutsü 15nu khi, “Apvüwa, itsa nantizen chicülo! Ma zumaden nu ketizen sa ntsa saden. Ma matsü kejonla anni nu atssü wi khulidu tenle. 16Hi ma ssinu no sansikeyathu wi gho lela mathu na ma sa pi mehai meya.”

17Jisu na luneng, “Nthu na khatila nkenondi nu kesazzi nyithu nu! Hi matsü khathu nthu ssiben ten nu? Matsü khathu nthu ghena hi kekheneng ben nu? Pvüzanyiwa tsü ssinu hi wi gholo.” 18Jisu na atsaghang satekü chi, nu tsüna pvüzanyiwa wina shhugho, nu tsü meyi ma mehaiya.

19Tsaseng wi sansikeyathu na Jisu wi gho nu kuthila ma keü, “Mangkesa ghena ikhang atsaghang tsü jügüshi meyala nu?”

20 # Mat 21.21; Mrk 11.23; 1 Kor 13.2 Jisu na luneng, “Nthu na kenondi kejon nkemi ghena. Hi nthu kizaden, keujüla nthu kenondi na hanuwencü kesü cu lela ben lethu nthu na ayikha ha wi, ‘Ha wina bvülo!’ isathu tsüna bvüaben. Nthu na katsü ha lela saya mehai. 21Isala hati kesa ha kekhie nu kezi wina ketan khe mangla sa nu jügükeya nmi.”

Jisu na Ma Keshü Jjügi Kekhineng

(Mrk 9.30-32; Luk 9.43-45)

22Sansikeyathu tsüdila gho Galilee wi saghukeya wi Jisu na mathu wi kiza, “Anyi Tsawa ha ghan pi anyithu kwen wi chia tendha, 23nu mathu na ma pathia ben; isala ma ghanan kecheng seng wi hangneng-shagha ben.”

Sansikeyathu na sashüna ahathana wa.

Kekinyijjen Ghena Khajana Pi Kecü

24 # Bvü 30.13; 38.26 Jisu nu ma sansikeyathu na Kapernaum wi gho nan Kekinyijjen khajana kekhüthu na Pitor wi gho ma keü, “No kesansiwa na Kekinyijjen khajana pi chitenla nu?”

25Pitor na “Anle,” khinengchi.

Pitor na ajjen wi wha nan Jisu na atuwa sa ma wi, “Simon, no kemeshen tsü khati nu? Thowa na alen nyelela ayyi khajana pi ayyi ha wi kadimithu cüten nu? Ayyi ciwi ahvu la asangthu na pi cüten nu?”

26Pitor na “Asangthu le,” khineng.

Jisu na luneng, “Isalethu, tsü ma jjügi ayyi ciwi ahvuthu na pi cü nten. 27Isala ikhang na anyi hathu nkenen nsa mvu. Tsalina aghajü wi wa nu anga kenne-ji kesü pi cüchilo. Anga atuwa tsü zanshiya lethu ma pang wi ishinyi ghena Kekinyijjen khajana pi kechi qo apisa muyaben. Tsü khuya nu sen wa ishinyi ghena khajana pi mathu cülo.”

Currently Selected:

MATHI 17: RENGNBSI

Highlight

Copy