MATHI 16

Amankesa Kekuli Kekhie

(Mrk 8.11-13; Luk 12.54-56)

1 # Mat 12.38; Luk 11.16 Farisithu nu Sadukithu na Jisu ghan-nan le gho, nu ma tang wi amankesa kekuli kesü sa pi mathu ccücalo kesa khie. 2Isala Jisu na khineng, “Aghani na du keten wi nthu na hati khiden, ‘Akulu na nmieni keben ghena atsanen mehai benle.’ 3Nu nthu na aghanen wi hati khiden, ‘Akulu nmie pi jang keben ghena atsangho benle.’ Nthu na akulu ghang nu atsanen kemehai keteshü khiya mehai, isala nthu na amankesa hathu matsü tsü khiya nbenle! 4#Mat 12.39; Luk 11.29 Khija-ghashenen nyi ha khatila nmehai nu Anyiza nchüladha nu! Nthu na hi wi amankesa kekuli khieben la? Nyele! Jonah na amankesa sa kechi miwi amankesa kepa wi pi nthu cü nbendha.”

Tsaseng wi ma mathu teshi nu bvüa.

Farisithu nu Sadukithu Zimi

(Mrk 8.14-21)

5Sansikeyathu na aghajü pvüdhi sen nu khhakawa wi wa nan mathu amesa pvüya mali benla. 6#Luk 12.1Jisu na mathu wi kiza, “Farisithu nu Sadukithu zimi ghena nthu meghe-metsa nu kiden-kesha yalo.” 7Mathu jawi hati keccünengli wa, “Ikhang amesa pvüya mali kesa ghena ma hati khiben le.” 8Jisu na mathu hati khi keben tsü chüya nu mathu wi keü, “Mangkesa na nthu jawi amesa pvüya mali kesa cüki tsü khiben nu? Nthu kenondi khatila zeng nu! 9#Mat 14.17-21Nthu na khili la npi chüya kwe? Nthu hi amesa be manga pi anyi hazar manga gishü dsa thsü kesa tsü nchü kwe? Nthu na kedsatu ashijü khaju saghuya nu? 10#Mat 15.34-38 Nu amesa be tagü pi anyi hazar mejü gishü dsa thsü kesa tsü khati nu? Nthu na kedsatu ashijü khaju saghuya nu? 11Hi nthu wi amesa ghena khi nben, nthu na chüzzi keben ha khati nu? Nthu na Farisithu nu Sadukithu zimi ghena kiden-kesha yalo!” 12Tsaseng wi sansikeyathu na ma azimi pi amesa wi chiketen tsüghena nyela Farisithu nu Sadukithu kesansijüh ghena kiden-kesha yalo nu mathu kizabenle kesa tsü chüya.

Pitor Na Jisu Cüki Kekhishi

(Mrk 8.27-30; Luk 9.18-21)

13Jisu na anyuti Kaesarea Filippi yyi kete wi wa nu ma sansikeyathu wi keü, “Anyithu na Anyi Tsawa tsü pi thowa le khiten nu?”

14 # Mat 14.1-2; Mrk 6.14-15; Luk 9.7-8 Mathu na khineng, “Pahan na Johan Baptizwa le khiden; kepathu na Elijah le khi, nu kepa na Jeremiya nyelela atusenjüh-kechü kesü le khiden.”

15Ma mathu wi keü, “Isathu nthu tsü hi pi thowa le saten nu?” 16#Jhn 6.68-69 Simon Pitor na khineng, “No Messiya, hangkeben Anyiza Tsawa le.”

17Jisu na luneng, “Johan tsawa Simon, no kemihhi ntsawa le! Kepaghenanye atsentsa hawa ha anyi sajjü wina pi no ncü, isala tang wi kebenwa iBa pi no chü thsüle. 18Tsalina Pitor, hi no kizaden: no alon kesü, nu hi alon hawa miwi hi kekinyijjen saden, nu keshü lela khiela tsü miwi khangya nben. 19#Mat 18.18; Jhn 20.23 Hi tang wi Kadiyyi shakhen pi no cüden; no ayyi wi mangwa khen khe tang wi la khen shaben, nu no ayyi wi mangwa nkhen la khe tang wi la nkhen laben.” 20Tsaseng wi Jisu na ma Messiya le kesa ma sansikeyathu na pi anyi thola nkiza lalo kiza ntsa sachi.

Jisu Na Ma Ketizenkesa nu Keshü Cüki Kekhi

(Mrk 8.31—9.1; Luk 9.22-27)

21Tsü nten na Jisu na ma sansikeyathu wi khi, “Hi Jerusalem wi wa nu keshenpfüthu, keqhaikedi ntsathu, nu Ayenkesansithu kwen wi ketizen nsathu yishü. Mathu na hi pi shü thsüaben, isala hi ghanan kecheng seng wi hangneng shagha ben.”

22Pitor na ma ssi wa ma kha nu khi, “Apvüwa, Anyiza na tsüti sa nbenle! Khiela nmiwi tsüti sa yishü!”

23Jisu na khapeghe wa Pitor ghang nu khi, “Hi wina bvülo, Satan! No ilen khenben, kepaghenanye no kemeshen ha na Anyiza wi nyela anyi wina keghole.”

24 # Mat 10.38; Luk 14.27 Tsaseng wi Jisu na ma sansikeyathu wi kiza, “Anyi kesü le kesü lela hi nie gha mvu lethu, ma ketanla ma mali nu ma kross pieya nu hi nie n-ghathu yishü. 25#Mat 10.39; Luk 17.33; Jhn 12.25Kepaghenanye anyi thowa na ma kahangli tepagha khe dediaben, isala thowa na ighena ma kahangli khuchi khe tsü mu neng yaben. 26Keujüla anyi kesü na ayyi wi keben tsüdi pi ma ji saya lela ma kahangli dedi lethu ma mangwa kekiyi ben nu? Mangla nmi, nyelela anyi kesü na mangwa pi ma kahangli mithon saya mehai nu? 27#Mat 25.31; Zak 62.12; Rom 2.6 Kepaghenanye Anyi Tsawa na ma Ba nyankethang wi ma nyilothu ssinu gho tendha, nu ma anyi tsüdi papa kekuli kenie wina akutimen pi cüden. 28Hi nthu kizaden, hewi ngan kebenthu pahan na Anyi Tsawa na Kadimi sa kegho npi kemu chu shü nben.”

Currently Selected:

MATHI 16: RENGNBSI

Highlight

Copy