MATHI 15
15
Abamyithu Kesansijüh
(Mrk 7.1-13)
1Farisithu nu Ayenkesansithu pahan na Jerusalem wina gho Jisu keü, 2“Mangkesa na no sansikeyathu na abamyithu kesansijüh tsü nie nten nu? Mathu na akwen mehaitsü nmetsila dsajjü ten le!”
3Jisu na khineng, “Isathu nthu mangkesa na Anyiza yenwa tsü n-niela nthu bamyithu na kesansijühwa tsü nieten nu? 4#Bvü 20.12; Aye 5.16; Bvü 21.17; Lev 20.9. Kepaghenanye Anyiza kekhi na, ‘Nthu ba nu nthu jja kinyiyalo.’ nu ‘Thowa na ma ba nu ma jja kishencü khe ma yala shü thsülo.’ 5Isala nthu na keujüla anyi kesü na pala pahan pi ma ba nu ma jja kiqaya kemehai ben lela ‘Hawa ha Anyiza jile,’ 6ma ma ba nkinyiküla mehai le isa khiden. Hatinu nthu na nthu kesansijühwa tsü niele sala Anyiza yenkhukechiwa tsü nkhichi laden. 7Nthu nkenyeghe kesathu! Isa atusenjüh-kechüwa na nthu ghena kekhi tsüna atsentsale!
8 #
Isa 29.13. ‘Anyiza na khiben, anyi hathu na mathu pang wi hi kinyiküden,
Isala mathu leben tsü hi ssinu temejaden.
9Mathu na hi kekinyi tsüna kaghacang,
kepaghenanye mathu na anyi sa kechi ayenthu tsü pi iyenthu ti nyu sansiden.’ ”
Pala Anyi sa pi Nmetha Thsüla Ketenthu
(Mrk 7.14-23)
10Tsaseng wi Jisu na anyitenti ci pi ma wi chi nu khi, “Kina nu chüyalo! 11Ciwi pala mangla amei wina anyi non wi du nu ma sa pi nmetha thsüla kesa na nmi, isala pala anyi non wina keshhughowa tsüna ma sa pi nmetha thsüla ten le!”
12Tsaseng wi sansikeyathu na ma wi ghonu ma keü, “No hati kekhi wi Farisithu kemeshen yasa kesa tsü no chüben ma?”
13Jisu na khineng, “Achanton kesü le kesü lela iBa tang wi kebenwa na pi nkishen chiwa tsü pfüpi shaben. 14#Luk 6.39. Mathu ghena leben ketizen nsa lalo! Mathu na anyon nkemuthu nu anyon nkemu ccülikesathu; nu anyon nkemu nyi kesü na kepawa lentsütsonthu manyi qho ayyiku wi khuliduaben.”
15Pitor na khi, “Ajühkaghape ha jjügi khimetha pi ikhang kizalo.” 16Jisu na mathu wi khi, “Nthu la khilila tsü nchü kwe? 17Pala mangwa na anyi pang wina apvü wi du khe amei wi shhu keten tsü nthu na nchü kwe? 18#Mat 12.34 Isala mangwa na apang wi shhugho khe tsüna aleben wina shhugho ben, nu tsüthu tsüna anyi sa pi nmetha thsüla tenle! 19Kepaghenanye ma leben wi pala nkemehai kemeshenwa tsüna ma ssi wa nyu pathi, keqheza sa, pala kepa wi nkemehaithu sa, ghanfü, milimesa, nyu nanmeghü isa thsüden. 20Hathu ha anyi sa pi nmetha thsüladen. Isala mathu na nthu salo kekhi nthu kwen nmetsila kedsa hana anyi sa pi nmethala thsüya nbenle.”
Nza Kesü Kenondi
(Mrk 7.24-30)
21Jisu na apen tsü teshi nu Tur nu Sidon nyunutithu ketsaki ayyi wi tsü wa. 22Kanaan nyi nza kesü na ayyi ciwi hang keten na gho ma metu nu khi, “Apvüwa David Tsawa; hi nantizen chicülo! Atsaghang kesü na inga miwi ben, nu ma güccü ntsa saben.
23Isala Jisu na ma wi ajüh kesü la nkhi. Ma sansikeyathu na ma wi khi, “Ma kesun pi bvü thsülo! Ma ikhang nienu hati magha ben le!”
24Tsaseng wi Jisu na khineng, “Hi kesun pi Israel nyithu khaghaneni ti bhatagha kesathu wi ketan chi theng.”
25Isala nzawa tsüna ghola ma tuwi akhhutsüdu nu khi, “Apvüwa, hi kiqa cülo.”
26Jisu na khineng, “Ghanyithu nün tsü khupi affüthu cü kesa tsüna nmeshon.”
27Nzawa na khineng, “Anle, Apvüwa, isala affüthu la mathu pvüwa miz wi qancan-qanlathu tsü dsaden.”
28Tsalina Jisu na ma wi khineng, “No nza kenondi keben ntsa. No kenmvuwa tsü sa pi no cüben.” Isanu tsü tsüwi na ma nga na mehaiya.
Jisu na Nyu Kejon sa pi Mehai kecü
29Jisu na apen tsü teshi nu ma ketan Galilee Ghajü wi wa. Ma ayikha kesü miwi ki donkiben. 30Anyitenti keti na ma wi gho, mathu na anyi accü nkemehai, akwen nkemehai, anyon nkemu, ajühkhi nkeya, nu kesakinaathu kejon ssigho Jisu ccü wi chi, nu ma mathu tsüdi sa pi mehai cüa. 31Anyi ajühkhi nkeyathu na ajühkhiya, accü nkemehaithu na alentsenya, anyon nkemuthu na pala muya kesa tsü mu pi mathu mansa nu mathu na Israel Nyizawa tsü seng.
Jisu Na Anyi Hazar Mejü Ghanja kecü
(Mrk 8.1-10)
32Jisu na ma sansikeyathu ci pi ma wi chi nu khi, “Hi anyi hathu ghena leben güccü benle, kepaghenanye mathu na ghanan kechen hi gweghe ben wadha nu khili mangla kedsa nmiladha. Hi mathu ya ndsa njjüla kesun pi bvü thsü mvu nbenle; kepaghenanye isalethu mathu na wa alenca wi picathiaben.”
33Sansikeyathu na ma wi keü, “Ikhang hewi ayyikeshü wi ha kedsakejjü khiewa pi anyitenti ha ghanjaya nu?”
34Jisu na keü, “Nthu na amesa khaju ben nu?” Mathu na “Amesa be tagü nu anga kizzakiki keu benle!” khinengchi.
35Tsalina Jisu anyitenti ya ayyi wi donkiya thsülo khichi. 36Tsaseng wi ma amesa be tagü nu anga khuya nu Anyiza wi kesawegü khiechi, nu tsüthu pakhhi pi sansikeyathu cü nu pi anyithu gishüya thsü. 37Mathu tsüdila dsa pi anonkwen ntsa saya. Sansikeyathu na kedsatu ashijü tagü saghuya. 38Anyi tsü kedsathu na hazar mejü, tsüna nzathu nu ghanyithu nsichi.
39Tsaseng wi Jisu na anyithu kesun pi bvü thsüa, nu ma ahun kesü wi duya nu Magadan yyi wi wa.
Currently Selected:
MATHI 15: RENGNBSI
Highlight
Share
Copy
Want to have your highlights saved across all your devices? Sign up or sign in
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
