MATHI 18
18
Thowa na Kedi Ntsawa nu?
(Mrk 9.33-37; Luk 9.46-48)
1 #
Luk 22.24
Tsütsü wi sansikeyathu na Jisu wi gho nu ma keü, “Tang Kadiyyi wi kedi ntsawa na thowa nu?”
2Jisu na ghanyi kesü ci pi mathu tuwi ngan thsü 3#Mrk 10.15; Luk 18.17 nu khi, “Hi nthu kizaden, nthu kahang kemili pi ghanyithu ti sa nkeya tsü nthu na khiela tang Kadiyyi wi duya nben. 4Anyi thowa na ma ketanla ma satemeni nu ghanyi hati saya khe ma tang Kadiyyi wi kedi ntsawa saben. 5Anyi thowa na inyan wina ghanyi hati kesa ha ssiya khe hi la ssiyaden.
Mechu Pi Sami Thsüa
(Mrk 9.42-48; Luk 17.1-2)
6“Anyi thowa na hi kenondithu jawi kizza ntsawa lela kesü sa pi sami thsü khe alon keti kesü pi ma sun wi hugiya nu pi atssükedone wi khalachi kesawa la ma ghena mehai. 7Ciwi pala pahan na anyithu mechu pi sami thsü keten ayyi na khatila nmehai saten nu! Hathu ha keshüthangla saben — Isala anyi tsüthu ya sa thsü ketenwa ghena tsü khatila nmehaila saten nu!
8 #
Mat 5.30
“Keujüla nkwen nyelela nccü na no sa pi sami thsü lethu tsü denthi pi khalalo! Nkwen keni nu nccü keni pvünu anuphanla anni nyen nketen pen wi wa kesa tsü nkwen kesütan nu nccü kesütan pvünu kahang wi keduwa la nghena mehai. 9#Mat 5.29 Nu keujüla n-nyon kesü na no sa pi sami thsü lethu tsü kohoshi pi khalalo! N-nyon keni pvünu annighajü wi wa kesa tsü n-nyon kesütan pvünu kahang wi keduwa la nghena mehai.
Khaghaneni Kebhatagha Pi Ajühkaghape
(Luk 15.3-7)
10“Ghangchilo, nthu na ghanyi kizakikithu ha nkhichi nsa lalo. Hi nthu kizaden, mathu nyilothu na keshüthangla tang wi iBa tuwi benden. 11#Luk 19.10 Kepaghenanye Anyi Tsawa na bhakitaghathu tsü bha ghole.
12“Keujüla anyi kesü na khaghaneni meza keben jawi tsüthu kesü na bhatagha lethu, nthu tsü khatile meshen ben nu? Ma khaghaneni achentugu nu tugu tsü teshi pi ayikha wi atsse yathsü theng nu khaghaneni kebhataghawa tsü npi kemu chu bha waben. 13Hi nthu kizaden, ma khathansha wi tsü muya khe khaghaneni nkebhataghathu achentugu nu tugu miwi hawa ha ghena ma nonghe ntsa saben. 14Tsü makesü nthu Ba tang wi kebenwa la ghanyi kizakikithu ha kesütan la pi bhatagha thsü kesa tsü ma kemeshen nyele!
Acünyu Kesü Kesami
15 #
Luk 17.3. “Keujüla ncünyuwa na ntu wi sami lethu wala ma kesami khi pi ma kizalo. Isala tsüna kuthila nshinyi jüwi ketan salo. Keujüla ma njüh kina lethu no ma miwi mehaiyadha 16Isala keujüla ma njüh nkina mvu lethu, nyu kepa wi meshu kesü keni ssinu no gweghe wa nu Ntsawajüh na kekhi ti ‘kimennijüh tsüdi wi la meshu keni kecheng yala chüza saya thsü’ isale kesalina. 17Isala keujüla ma mathu jüh la nkina mvu lethu, tsaseng wi tsü maben la khi pi kemehu nyithu kizalo. Asakhenwa, keujüla ma kemehu nyithu jüh la nkina mvula lethu, ma pi Anyiza nkechünyi kesü nyele la khajana kekhü kesü ti sa thsülo.
Kekhen Nu Nkekhen
18 #
Mat 16.19; Jhn 20.23 “Tsalina hi nthu tsüdi kizaden: nthu na ayyi wi mangwa khen khe tang wi la khen shaben, nu nthu na ayyi wi mangwa nkhenla khe tang wi la nkhen la shaben.
19“Hi kheneng nthu kizaden, ayyi wi nthu meshu keni na kusi leben kesü sanu mangwa khie khe tang wi kebenwa iBa na tsü sa pi manyi cüben. 20Kepaghenanye khiewi meshu keni kecheng inyan wi saghuben khe hi ciwi mathu gwegheben.”
Kesami Teshi Nkecü Maghawa Pi Ajühkaghape
21 #
Luk 17.3-4
Tsaseng wi Pitor na Jisu wi gho nu ma keü, “Apvüwa, keujüla icünyuwa na ituwi kejon tughu sami wa lethu, hi khaju tughu ma kesami teshi pi cü nu? Tagü tughu la?”
22 #
Ade 4.24
Jisu na khineng, “Nyele, tagü tughu nye; isala achentagü tughu tagü. #18.22: achentagü tughu tagü; nyelela achentagü nu tagü tughu 23Kepaghenanye tang Kadiyyi na hati le. Ciwi kadimi kesü na ma maghathu wi ma men kepvü tsü ghangle kesa südheya. 24Ma tsüti sa wa nan mathu meshu kesü ma men apisatsen hazar tagha pvü kebenwa tsüna gho. 25Amaghawa na ma men kepvü tsü dhi meyala, tsalina kadimiwa na ma wubvü, ma tsangathu pi ma gweghe nssümagha sala jeü nu ma keben tsüdi jeü pi ma men kepvü tsü dhilo khichia. 26Amaghawa na wala kadimiwa tuwi akhhutsü nu khie, ‘Kediwa, hi hie benlalo, hi tsüdila pi no dhineng shaben na!’ 27Kadimiwa na ma nantizen chicü, tsalina ma men kepvü tsü teshi pi cü nu ma ya bvü thsüa.
28“Anyi tsüwa na wa nu ma pvüshang amagha kesü ma men pisatsen meza pvü kebenwa tsü metuya. Ma anyi tsüwa ghan pi ma giyan tsüten nu khi, ‘Imen kepvü tsü pi hi cü nenglo!’ 29Ma pvüshangwa na ma tuwi akhhutsü nu khie, ‘Hi hie ben lalo, hi tsüdila pi no dhineng shaben na!’ 30Isala ma tsü nkinala anyi tsüwa na ma men kepvü npi dhikeya chu ma ghan pi atssüzü sa thsüa. 31Amagha kepathu na tsü mukeya wi mathu hathana ntsa saya nu wala tsü maben la khi pi kadimiwa kiza. 32Tsalina ma amagha tsüwa cichi nu khi, ‘No ma men nkemi nssümaghawa. No hi wi kekhie ghena no imen kepvü tsüdila teshi pi no cüle. 33Hi no nantizen kechi tsüti no la npvüshang amaghawa tsü nantizen kechi-u le!’ 34Kadimiwa na ma ghepvü ntsa saya nu amaghawa tsü pi atssüzüjjen wi chi nu ma men kepvü tsü maben npi dhikeya chu ma meten cü.”
35Jisu na khi, “Tsü makesü nthu kesüsü tsüdila nthu leben wi nthu cünyuwa kesami teshi pi ncü lethu tang wi kebenwa iBa la nthu miwi tsüti saben.”
Currently Selected:
MATHI 18: RENGNBSI
Highlight
Share
Copy
Want to have your highlights saved across all your devices? Sign up or sign in
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
