LUK 14

Jisu Na Kesakinaa Nyi Kesü sa pi Mehaikecü

1Sabbath tsathang kesü wi Jisu na Farisithu jawi kedi kesü jjen wi dsajjüle wa, nu anyithu na Jisu ghang ben. 2Ciwi anyi kesü atssü tsakenpvü na Jisu wi gho, 3Jisu na Farisithu nu Ayenkesansithu wi keü, “Sabbath tsathang wi nyu sa pi mehai kecü ayen benla nmi nu?”

4Isala mathu na mangla nkhi la. Jisu na anyi tsüwa sa pi mehai cü nu kesun pi bvü thsüa. 5Tsaseng wi Jisu na mathu wi khi, “Keujüla nthu meshu kesü na atsa nyelela amesü süpon kesü ben nu Sabbath tsathang wi atssükhang wi khulidu lethu, Sabbath tsathang wi nthu na wan wala tsü zanshiya nben kwe?”

6Isala mathu na ha ghena mangla khi pi ma luneng meyala.

Mezamegüshu Nu Kijünyi ssikeya

7Jisu na kijünyi thu na apen kemehai ntsa kessi keben kemu wi ma ajühkaghape ha pi mathu tsüdila kiza; 8“Nyu na keshanyi kemishu wi no qhechi lethu, wala apen kemehai ntsa witsü ndonki lalo. Kepaghenanye ma nmiwi kedikiwa la qhechi thengla ben. 9Isathu apvüwa nshinyi qho qhekechiwa na gho no wi ‘Ma yala apen ha wi donki thsülo,’ khithu, ciwi no apen kemehaiwa wina ssanwa wi cüle kesa jügheben. 10#Kem 25.6-7 Tsalina nyu no qhechi lethu, wala apen ssanwa ntsawa wi donkiyalo, isathu npvüwa na ghola no wi ‘Ipvüshangwa, shhughola apen kemehai ntsawa wi benyalo,’ isa khiben. Isathu no akejjenthu tsüdi tuwi keseng pvüyaben. 11#Mat 23.12; Luk 18.14 Kepaghenanye anyi kesü le kesü lela ma ketanla ma sa pi dithang ketenwa zansha cüben, nu thowa na ma ketanla ma satemeni ten khe zanki cüben.”

12Tsaseng wi Jisu na ajjen pvüwa wi kiza, “No aghanen nyelela shitawa nün kedsa wi nyu qhechi lethu, npvüshangthu, nshilithu, njenphon kebanthu, nqhechi lalo, kepaghenanye mathu la no qhechi nu nji tsü dhineng cüben. 13No kemishu kesü sa lethu, ketha-u, akwen nu accü nkemehaithu, nu anyon nkemuthu qhechilo, 14isathu no kemihhi muyaben, kepaghenanye mathu na no dhinengya nben. Anyiza na anyi kemehaithu keshü wi hangneng-keshagha ghanan wi no dhineng cüben.”

Kemishu Keti Kesü Pi Ajühkaghape

(Mat 22.1-10)

15Ciwi meshu kesü na miz kete wi donki keben ajüh ha zaya nu Jisu wi khi, “Anyiza Kadiyyi kemishu wi donkiya ketenthu na khatila mihhi nu!”

16Jisu na ma wi khi, “Ciwi anyi kesü na kemishu keti sa nu anyi kejonla qhechi. 17Kemishu tsü kecu wi ma ma maghawa kesun pi akejjenthu wi kiza thsü, ‘Ghalo, pala tsüdila kiden yadha le!’ 18Isala mathu tsüdila ketizen khie wa. Anyi atuwa na amaghawa wi kiza, ‘Hi alli kesü shei theng, tsalina tsü ghang nwathu yishü benle, hi tizen chicülo.’ 19Kesüwa la khi, ‘Hi amesü süpon tagha shei theng nu tsüthu ghang waden, hi tizen chicülo.’ 20Kepawa na khi, ‘Hi hajü iwubvü yatheng, tsalina hi ghaya nten.’ 21Amaghawa na kheneng whala ha tsüdi khi pi ma pvüwa kiza. Apvüwa na ma lebenminu ntsa saya nu ma maghawa wi kiza, ‘Wan wala alentonti nu anyuti wi ketha-u, anyon nkemu, nu akwen nu accü nkemehaithu tsüdi ssinu gho nenglo.’

22Tsaseng wi amaghawa na khi, ‘Kediwa, no kekhi tsüti sadhale, nu he la apen na ben le!’ 23Tsalina apvüwa na amaghawa wi khi, ‘Wala alentonti wi nu anyuti wi anyithu ci sengho ijjen pongya thsülo. 24Kepaghenanye hi nthu kizaden, anyi hi kishi qhechi kethengthu kesütanla itsse tsü dsa nben!’ ”

Sansikeyawa Na Kesa-u

(Mat 10.37-38)

25Kuti anyitenti keti kesü na Jisu gweghe wa keten wi ma khapeghe wa mathu wi kiza, 26#Mat 10.37 “Anyi kesü le kesü lela ma hi wi ghala ma ba nu ma jja, ma wubvü nu ma tsangathu, ma cünyu nu ma tssüggüthu, nu ma ketanla ma ketizen miwi hi tizen nkeya tsü ma hi sansikeya nyi nsa qo. 27#Mat 10.38; 16.24; Mrk 8.34; Luk 9.23 Thowa na ma ketanla ma kross pvünu isen nie n-gha khe ma hi sansikeya nyi saya nben.

28Keujüla nthu meshu kesü na aducü zhü mvu ben lethu, ma atuwa sa donki nu khaju pi tsü saben khe hesha nanlo. Ma apisa tsü sacenkeya benla nmi khe n-ghang chithu yishü. 29Keujüla ma tsüti nsa lethu, ma aducü giketegü seng wi tsü sacen meyala lethu tsü kemuthu tsüdila ma nankeqhe, 30nu hati khiben, ‘Anyi hawa ha kekuli sa shagha, isala sacen meyaladha.’

31Keujüla kadimi kesü na anyi hazar tagha ssi wa kadimi kepawa anyi hazar ngwe ssi gho ketenwa tsü ssisa lethu, ma atuwa sa donki nu ma kadimi kepawa tsü chaya benla nye khe südhe meyathu yishü. 32Keujüla ma tsüti nsa lethu, kadimi kepawa na alen kesie wi keten na ma nyilothu kesun chi nu manyi jüwi gweghe kemehai sale keü thsüben.” 33Jisu na khi, “Tsü makesü nthu thola nthu keben-keyeng tsüdi teshi nkesa tsü hi sansikeya nyi saya nben.

Amcü Ma men Nkemi

(Mat 5.13; Mrk 9.50)

34“Amcü na mehai, isala keujüla ma kesheng bhatagha lethu, mangwa sa nu tsü sheng thsüya mehai nu? 35Tsüna ayyi nu kepa ghena la mangla nmehai; tsü pi khalaben. Kinayalo, keujüla nthu na akhuna pvüten lethu!”

Currently Selected:

LUK 14: RENGNBSI

Highlight

Copy