LUK 15

Khaghaneni Bhakitagha

(Mat 18.12-14)

1Ghanan kesü khajana kekhüthu nu kesami nyithu kejonla Jisu jüh kinale gho, 2#Luk 5.29-30 Farisithu nu Ayenkesansithu na kicennali nu khi, “Anyi hawa ha kesami nyithu ssiya nu mathu gweghe dsajjü ben le!”

3Tsalina Jisu na ajühkaghape ha pi mathu kiza: 4“Keujüla nthu meshu kesü na khaghaneni meza ben nu tsüthu jawi kesü bhatagha lethu, ma khati saben nu? Ma khaghaneni achentugu nu tugu tsü pi amou wi teshi theng nu kesü kebhataghawa tsü npi mukeya chu bhawa ben. 5Ma tsü mukeya seng wi ma nonghe ntsa sanu pila ma depfü wi chi pie 6nu ma jjen wi wha ma pvüshangthu nu ma jenphonthu cighu chi nu mathu wi khi, ‘Hi gweghe anonghelo, kepaghenanye hi ikhaghaneni bhatagha kesawa tsü mu neng yadha!’ 7Hi nthu kizaden, tsü makesü, ketsatan nyi achentugu nu tugu leben nkhapeghela mehai kesathu miwi kesami nyi kesü leben khapeghekeya ghena tang wi anonghe ntsa saben.

Apisatsen Bhakitagha

8“Keujüla kinyibvü kesü na apisatsen tagha keben wi kesü bhatagha lethu, ma khati saben nu? Ma ahula canki sen nu ma jjen jjü nu tsü npi mukeya chu bhaben. 9Ma tsü mukeya seng wi ma pvüshangthu nu ma jenphonthu cighu chi nu mathu wi khi, ‘Hi gweghe anonghelo, kepaghenanye hi ipisatsen bhatagha kesawa tsü mu neng yadha!’ 10Hi nthu kizaden, tsü makesü, Anyiza nyilothu na kesami nyi kesü leben khapeghekeya ghena anonghe ntsa saben.”

Atsawa Bhakitagha

11Jisu na khi, “Ciwi anyi kesü na atsa keni ben. 12Ghanyiwa na ma ba wi khi, ‘Iba, keben tsü ishei pi hi cülo.’ Tsalina ma ba na keben tsü pi ma tsa keni gishü cüa. 13Ghanan keu seng wi atsa ghanyiwa na ma keben tsüdi pi jeüya nu apisa sen nu ma jjen teshi bvüa. Ma diyyi kelensie wi wa ma kenen wi hang nu ma pisa tsüdi pi dedi khia. 14Ma keben tsüdi dedikhi kesa seng wi azeng na diyyi tsüwa tsüdi wi gho nu ma mangla nmila. 15Tsalina ma ayyi ciwi kahang nyi kesü jjen wi kulile kewa wi anyi tsüwa na ma kesun pi ma lli wi avüthu noncca thsü. 16Ma avüthu tsse tsü la dsa mvuthi sa, isala thola mangla pi ma ncü. 17Asakhen wi ma ketanla ma chüya nu hati khi, ‘Iba jjen wi kedenga kekulithu tsüdila mathu nkedsakhi saben lethu hi he wi ghamathi shüa tendha le! 18Hi shagha nu iba jjen wi whaden, nu hi hati ma wi khiden, “Iba, hi ntuwi nu Anyiza tuwi la samidhale. 19Hi pi ntsa le nci qo ladha; hi pi no kedenga kekulithu kesü ti sa thsülo.” 20‘Tsalina ma shagha nu ma ba jjen wi wha.

“Ma ajjen na kelensie wi keten wina ma ba na ma muya; ma leben güccü, nu bvüwa ma tsawa khüntaggü nu ma kimang. 21Atsawa na khi, ‘Iba, hi ntuwi nu Anyiza tuwi la samidha le! Hi pi ntsa le nci qo ladha!’ 22Isala ma ba na amaghathu cichi nu khi, ‘Wanwan wala athsümeni kemehai ntsawa sengho ma pvü thsülo. Akwenzza keqhan nu accüguwen pi ma pvü thsülo. 23Tsaseng wi wala amesü zza kekunonwa tsü sengho pathilo, isanu ithu anonkeghe sala mishu na! 24Kepaghenanye itsawa hana shü nan ma hangneng yadha, ma bhatagha nan ma mu neng yadha.’ Isanu mathu na kemishu saben.

25“Tsü tsüwi atsa keqhaiwa na alli wi ben; nu ma ajjen tetsaki kegho wi akhwikesa nu kenashü hhai zaya. 26Tsalina ma amagha kesü cichi nu keü, ‘Mangwa saben nu?’ 27Amaghawa na ma wi kiza, ‘Ncünyuwa na ajjen wi gho nengdha; nu ma kemehai sala gho neng kesa ghena nba na amesü zza kekunonwa pathi pi mishuben.’

28Acünyu keqhaiwa na ma lebenminu ntsa sa nu ajjen non wi ndulaben, tsalina ma ba na shhugho ma la nduku wi dugholo khie. 29Isala ma ma ba wi khi, ‘Meshen nanlo, hi amapi haju ha nssümagha kesü ti no kekuli sa, nu hi khiela njüh kekhi nkinala nsa. No mangwa pi hi cü nu? Aneni zza lela pi hi cü nu ipvüshangthu ssinu nmishu thsü le! 30Isala atsa hawa tsü no keben tsüdi sen wa keqheza menkedsathu wi dedikhia nu gho neng nan no ma ghena amesü kekunonwa pathi ben le!’ 31Abawa na luneng, ‘Itsawa, no keshüthangla hi gweghe benden, hi keben tsüdila nji. 32Isala ithu anonghe nu kemishu-ule, kepaghenanye ncünyuwa ha shü nan ma hangneng yadha, nu ma bhatagha nan mu neng yadha.’ ”

Currently Selected:

LUK 15: RENGNBSI

Highlight

Copy