LEVIYEN 6

1 # Scs 5.5-8. Apvüwa na ayen hathu pi Mosa cü. 2-3Keujüla anyi kesü ma pvüshang Israel nyiwa na pi cü ketheng tsüpi nccüneng mvula nyelela ma wi pala pahan ghanfüya nyelela ma mechu nyelela pala pahan bhatagha kesa tsü ghena milimesa nu ma tsü nmule khi nu kekishen wina sami pi Apvüwa shun lethu ma kekinyi kesü saben. 4-5Khathansha wi anyi kesü na ma alen hathu kesü wila sami khe, ma atsentsa nkenye wina mangwa muya khe tsü dhineng ben. Ma sazzidha kesa chükeya ghanan wi ma mithon tsü mi gishü meza wi ngwe pi wwa pi ma pvüwa ndhinengthu yishü. 6Ma Apvüwa wi kedhineng kekinyi ghena khaghaneni nyelela aneni süpon kesü nyu ghojünkeya mangla nkemi sen nu keqhaikediwa wi ghoben. Ma men tsüna tsü tsüwi apisa men kenie wina khidhi ben. 7Keqhaikediwa na anyi tsüwa kesami ghena ahhansha sa chithu ma kesami teshi pi cüaben.

Ahhanshakesa Mabenla Pi Kemecang

8Apvüwa na Mosa kiza, 9mecang pi kekinyi yenthu hapi Aaron nu ma tsathu cü thsü. Mecang pi kekinyi tsüpi aghaja thangthang kekinyipen miwi chi, nu anni ya tsü mecangki ben thsüben. 10Keqhaikediwa na linen gwomejuwa kaghazu nu patono kenkhangwa pvüya nu kekinyipen miwi mecang pi kekinyi khala tsü khupi nu tsüthu pi kekinyipen kete wi chiaben. 11Tsaseng wi ma thsümeni kemiliya nu kemecang khala tsü khusen shhula kemnanpen na ameiwa kemetha pen wi chi. 12Kekinyipen wi anni tsüna n-nün thsüla mecangki ben thsü. Ghanen kaghapenla keqhaikediwa na achan pi anni miwi chi, mecang pi kekinyi ghena kecükepeng pi ma miwi chi, nu kecca ghena kekinyi ma kethu tsü pi mecang. 13Kekinyipen wi anni tsüna n-nün thsüla keshüthangla mecangki ben thsü.

Asu pi Kekinyi

14Hathu ha asu pi kekinyi yen. Aaron nyi keqhaikedi kesü asu pi Apvüwa wi kekinyi tsüna kekinyipen tuwi saben. 15Tsaseng wi ma awheng awha kesü, adeli, nu ma miwi hankedemvu tsü khuya nu tsü maben pi Apvüwa cüdha le kesa zensu wina tsüpi kekinyipen miwi mecang. Apvüwa na kekinyi ha kemecang han nenden. 16-17Keqhaikediwa na ma gilli tsü dsaben. Tsüna azimi pi nchila amesa gü nu Apvüwa ketenpen Nithsüjjen ccühha kemetha pen wi tsü dsaben. Atsse pi kekinyi tsü Apvüwa na keqhaikedithu shei sapi mathu cüdha. Tsüna kesami ghena kekinyi nu kedhineng kekinyi ti metha ntsawa. 18Abvüye shagha keten tsüdi wi Aaron shicü npvüzathu na atsse pi Apvüwa kekinyi mathu shei tsü dsaben. Anyi kesüle kesü lela atsse pi kekinyi tsü kidhen lethu tsü kemetha kekhangwa tsüna ma patena ben.

19Apvüwa na ayen hathu pi Mosa cü, 20tsüna Aaron nyi keqhaikedi kesü khuthi pi satekemetha ghena. Ma khuthi pi satekemetha ghanan wi ma awheng kilogram kesü, (ghanan kaghapen asu pi kekinyi tsü meceqe) pahan pi aghanen nu pahan pi shitawa wi tsüti Apvüwa wi kekinyi saben. 21Adeli pi tsü saghuya nu kegü khu kesü wi güya nu tsü pakhhi paghe pi asu pi kekinyi kesü ti sa, Apvüwa na ma han tsü nenden. 22Abvüye shagha keten tsüdi wi Aaron shicü tsüdi Keqhaikedi ntsa sa kebenwa na kekinyi ha saben. Tsüna ahhansha sapi Apvüwa kecü ti mecangtha saben. 23Keqhaikediwa na asu pi kekinyi kesa tsü keula ndsala maben pi mecang shaben.

Kesami ghena Kekinyi

24Apvüwa na Mosa kiza, 25kesami ghena kekinyi yenthu hapi Aaron nu ma tsathu cü thsü. Kesami ghena kekinyi sahang tsüpi kekinyipen na aghawa mecang pi kekinyi sahang pathi keten pen witsü pathiben. Hawa ha kekinyi kemetha ntsa kesü. 26Asahang pi ahhansha sa keben keqhaikediwa na Apvüwa ketenpen Nithsüjjen ccühha kemetha pen wi tsü dsaben. 27Anyi le atsanqai lela asahang sa tsü kidhen lethu tsü kemetha kekhangwa tsüna ma patena ben. Keujüla asa jjü na athsümeni miwi kaki lethu tsü sen wa ghasülo. 28Ayyipfü pi asa tsü shvu lethu tsü pacha, nu amighepfü sen lethu tsü mese nu atssü pi qhu pilo. 29Keqhaikedi theghi npvüza kesüle kesü lela kekinyi tsse ha dsaya mehai; ha metha ntsawa. 30Isala keujüla ajjü sengho Nithsüjjen non wi kesami sen bvüale kesa keccüna sathu, asahang tsü ndsala tsüpi mecang nsathu yishü.

Currently Selected:

LEVIYEN 6: RENGNBSI

Highlight

Copy