LEVIYEN 7

Kedhineng ghena Kekinyithu

1Ha kedhineng ghena kekinyithu yen, tsüthu na metha ntsawa. 2Kekinyi ha ghena asahang tsüpi kekinyipen na aghawa mecang pi kekinyi sahang pathi keten pen wi tsü pathi ben, nu ma jjü tsüpi kekinyipen ccügwen mejü tsüdi wi keghü chi. 3Ma kethu tsüdila khupia, nu pi kekinyipen miwi kinyi: ma ghanu kethu, ma pvüsheng kemeju kethu, 4ma megen nu ciwi ma kethu, nu ma mechen kemehai ntsawa. 5Keqhaikediwa na ma kethu maben pi kekinyipen miwi atsse pi Apvüwa wi kekinyi ti mecang ben. Hana kedhineng kekinyi kesü. 6Keqhaikedi theghi npvüza kesüle kesü lela ha dsaya mehai, isala tsüpi kemetha pen wi dsaben, kepaghenanye tsüna metha ntsawa.

7Ciwi ayen kesü tsüna kesami ghena kekinyi nu kedhineng kekinyi ghena la saben: asa tsüna keqhaikedi ahhansha sa kechiwa ji. 8Asahang mecang pi kekinyi sa ketenwa hyu tsüna keqhaikedi ahhansha sa kechiwa ji. 9Asu pi kekinyi wi pi annibhon wi gü nyelela kennunpfü nyelela kegü khu wi nnun ketheng tsüdi keqhaikedi kuggü pi Anyiza kecüwa ji. 10Isala npi kegü asu pi kekinyi tsüdi adeli pi saghu le nsaghu lela tsüna Aaron nyi keqhaikedithu ji tsüpi mathu meceqe gishü yaben.

Kecca Ghena Kekinyi

11Ha kecca ghena kekinyi sapi Apvüwa kecü yenthu. 12Keujüla anyi kesü na kekinyi hapi nkesengcha kekinyi sapi Anyiza kecü ti sa lethu, ma asahang pi ahhansha sale kesawa tsüpi azimi nkechi mesa pi kekinyi: awheng pi oliv deli saghu pi kegü mesa nyelela amesa ghapasi gü nu oliv deli pi nyen ketheng nyelela awheng kemehai pi oliv deli saghu amesa gü ketheng, tsü gweghe khuchiben. 13Tsümila ma azimi kechi mesa gü pi chiben. 14Ma amesa tsü alen kesüsü khuya nu pi aju kemehai ntsawa sala pi Apvüwa cüben; tsüna keqhaikedi asa jjü pi kekinyipen kete wi keghü kechiwa ji. 15Asahang pi ahhansha kesa ghanan ma sa tsü dsaben; tsü dsatu pi ghanenwa wi nthengla.

16Keujüla anyi kesü ma khishichi ketheng kenie wina nyelela ma kekinyi samvu kesa kenenkunong wina kecca ghena kekinyi sale senghothu, pi kekinyi ghanan tsü maben ndsakhila, isala kedsatu tsü dhitsüwa wi dsaya mehai. 17Kecheng ghanan wi lela asa tsü ben lethu pi mecang nsathu yishü. 18Keujüla anyi kesü kecheng ghanan wila tsü dsa lethu Anyiza na anyi tsüwa kekinyi tsü ya nben. Kekinyi tsüna ma ghena le sa nben isala pi nkemetha sa ben, nu thowa na tsü dsa khe ma tsü ghena ketizen saben. 19Keujüla keccüna wi nkemetha katsüha lela asa tsü kidhen lethu, tsü ndsala pi mecang nsathu yishü.

Anyi kesüle kesü lela keccüna wi metha kebenwa asa tsü dsaya mehai, 20isala anyi nkemethawa na tsü dsa lethu, ma pi Anyiza nyi kesüle nsadha. 21Tsüti anyi kesüle kesü lela keccüna wi nkemetha anyi le asahang lela kidhen nu kekinyi sa ha dsa lethu, ma pi Anyiza nyi kesüle nsadha.

22Apvüwa na ayen hathu pi Mosa cü, 23ha Israel nyithu ghena. Amesüsi, khaghaneni, nyelela aneni kethu tsü ndsala. 24Asahang ma ketanla keshü nyelela aghangsa na ghan kesa kethu tsü ndsala, isala alen kepa wi ghena tsü senya mehai. 25Anyi kesüle kesü lela thowa na asahang pi atsse sapi Apvüwa kekinyi wi kethu tsü dsa khe ma pi Anyiza nyi kesüle nsadha. 26#Ade 9.4; Lev 17.10-14; 19.26; Aye 12.16,23; 15.23. Israel nyithu na apen kahe wi hang lela khiela awa nyelela asa jjü pi atsse ti nsala. 27Anyi kesüle kesü lela thowa na ayen ha pakhhi khe ma pi Anyiza nyi kesüle nsadha. 28Apvüwa na ayen hathu pi Mosa cü, 29ha Israel nyithu ghena. Thowa na kecca ghena kekinyi sa khe ma tsü pahan sengho aju kemehai ntsa sapi Apvüwa cülo, 30ma tsü sengho atsse pi kekinyi sachi. Ma asahang kethu nu ma nnukhu-kisü saghu sengho aju kemehai ntsa sapi Apvüwa cüben. 31Keqhaikediwa na ma kethu pi kekinyipen miwi mecang ben, isala ma nnukhu-kisü tsüna keqhaikediwa ji. 32Ma kanku ajewa tsüpi aju kemehai ntsa sala pi 33keqhaikediwa ajjü nu ma kethu pi kecca ghena kekinyi sa kebenwa tsü cüben. 34Asahang nnukhu-kisü nu ma kanku ajewa tsüna aju kemehai ntsawa Apvüwa na Israel nyithu wina tsü khuya nu pi keqhaikedithu cüdha. Israel nyithu na matsü ghaketen tsüdi wila hapi keqhaikedithu ncüthu yishü. 35Hawa ha atsse pi Apvüwa wi kekinyi kesa pahan pila Aaron nu ma tsathu khuthi nu satemetha pi keqhaikedithu kesa thsü ghanan wi pi mathu kecü. 36Tsü ghanan kekinyi hapi mathu cülo nu Apvüwa na Israel nyithu kiza. Hawa ha ayen kesü Israel nyithu na matsü ghaketen tsüdi wi n-niethu yishü.

37Tsalina hathu ha mecang pi kekinyi, asu pi kekinyi, kesami ghena kekinyi, kedhineng ghena kekinyi, khuthi pi satekemetha kekinyi, nu kecca ghena kekinyi ghena ayenthu. 38Ayyikeshü Sinai Yikha wi Israel nyithu na kekinyi sa chilo kekiza ghanan Apvüwa na ayen hathu hapi Mosa cü.

Currently Selected:

LEVIYEN 7: RENGNBSI

Highlight

Copy