LEVIYEN 5

Kesami ghena Kekinyi wi Nsathu Keyishü

1Kesami ghena kekinyi wi hathu nsathu yishü. Keujüla anyi kesü ci pi ajüh kaghakhipen wi ma chüza cüki khichilo khi, nu ma kemu nyelela kiza tsü khi meyala lethu ma tsü ghena ketizen saben. 2Keujüla anyi kesü aghandu nsala katsüha keccüna wi nkemetha ameseng tsü kidhen lethu ma tsüti sadha kesa chüya meyi ma sazzidha.

3Keujüla anyi kesü aghandu nsala anyi gwo wi nkemetha katsüha lela kidhen lethu ma tsüti sadha kesa chüya meyi ma sazzidha.

4Keujüla anyi kesü ajjügi katsüha wi lela nkiden nkeshala kishen lethu ma tsüti sadha kesa chüya meyi ma sazzidha.

5Anyi kesü ma sazzi lethu ma kesami tsü nkhishithu yishü, 6nu ma kesami kutimen ghena khaghaneni nyelela aneni aghala kesü sengho Apvüwa wi kekinyi saben. Keqhaikediwa na anyi tsüwa kesami ghena ahhansha saben.

7Keujüla anyi kesü khaghaneni nyelela aneni khuchi meya lethu, ma kesami kutimen ghena nkhetsü nyelela tuktur keni sen nu Apvüwa wi ghoben; kesü na kesami ghena kekinyi nu kepawa na mecang pi kekinyi ghena. 8Ma tsü keni sen nu keqhaikediwa wi ghothu ma awa atuwa pi kesami ghena kekinyi saben. Ma awa sun tsü taghandhi isala ma li tsü zandhi nben. 9nu ma jjü pahan pi kekinyipen kete wi keghü chiben. Ajjü ma gilli tsüpi kekinyipen donbvü ccü wi keji thsü. Hawa ha kesami sen bvüale kesa ghena kekinyi. 10Tsaseng wi ayenthu kenie wina ma wa keniwa tsüpi mecang pi kekinyi saben. Keqhaikediwa na hati nu anyi tsüwa kesami ghena ahhansha sa chithu ma kesami teshi pi cüaben.

11Keujüla anyi kesü nkhetsü nyelela tuktur keni khuchi meya lethu, ma kesami ghena kekinyi ghena awheng kilogram kesü sengho ben. Ma oliv deli nyelela hankedemvu pi ciwi chi nben, kepaghenanye hawa ha asu pi kekinyi nyela kesami ghena kekinyi kesü. 12Ma tsü sen nu keqhaikediwa wi ghothu ma tsüdi pi Apvüwa cü kesa zensu wi awha kesü khuya nu atsse pi kekinyi ti ma tsüpi kekinyipen miwi mecang ben. Hawa ha kesami sen bvüale kesa ghena kekinyi kesü. 13Hati nu keqhaikediwa na anyi tsüwa kesami ghena ahhansha sa chithu ma kesami teshi pi cüaben. Asu pi kekinyi kesa ti awheng kesentu tsüna keqhaikediwa ji saben.

Kedhineng ghena Kekinyithu

14Apvüwa na ayen hathu pi Mosa cü. 15Keujüla anyi kesü aghandu nsala Apvüwa tuwi kemethathu tsüpi ncüla sami lethu, ma kedhineng kekinyi ghena khaghaneni nyelela aneni süpon kesü nyu ghojünkeya mangla nkemi sen nu Apvüwa wi ghoben. Ma men tsüna tsü tsüwi apisa men kenie wina khidhi ben. 16Ma pi ncüla kesa tsü ma mithon tsü miwi gishü meza wi ngwe pi wwapi ndhinengthu yishü. Ma tsüpi keqhaikediwa cüben, nu keqhaikediwa na asahang tsüpi anyi tsüwa kesami ghena ahhansha sa chithu ma kesami teshi pi cüaben.

17Keujüla anyi kesü aghandu nsala Apvüwa yenkhukechithu kesü pakhhi nu sami lethu, ma sazzidha nu tsü kutimen ndhinengthu yishü. 18Ma kedhineng kekinyi sale khaghaneni nyelela aneni süpon nyu ghojünkeya mangla nkemi kesü sen nu keqhaikediwa wi ghoben. Ma men tsüna tsü tsüwi apisa men kenie wina khidhi ben. Keqhaikediwa na anyi tsüwa na aghandu nsala sami kesa ghena ahhansha sa chithu ma kesami teshi pi cüaben. 19Hawa ha ma kesami sapi Apvüwa shun kesa ghena kedhineng kekinyi kesü.

Currently Selected:

LEVIYEN 5: RENGNBSI

Highlight

Copy